ଡେରାବିଶ,୧୬।୪(ସ୍ବ.ପ୍ର.): ସମଗ୍ର ରାଜ୍ୟରେ ତାପମାତ୍ରାର ବୃଦ୍ଧି ଯୋଗୁ ବିଭିନ୍ନ ଅଞ୍ଚଳରେ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଛି ା ଏଥିରୁ ବି ବାଦ ପଡ଼ିନି କେନ୍ଦ୍ରାପଡ଼ା ଜିଲା ଡେରାବିଶ ବ୍ଳକର ବିଭିନ୍ନ ପଞ୍ଚାୟତ ା ଶନିବାର ସକାଳ ୮ଟା ୩୦ ସୁଦ୍ଧା ତାପମାତ୍ର ୩୬ ଡିଗ୍ରୀ ଛୁଇଁଥିବା ବେଳେ ଦିନ ୧ଟାରେ ତାହା ୪୦ ଡିଗ୍ରୀ ହୋଇଥିବା ନେଇ ଭୁବନେଶ୍ୱର ପାଣିପାଗ ବିଭାଗ ପକ୍ଷରୁ ସୂଚନା ଦିଆଯାଇଛି ା ଡେରାବିଶ ବ୍ଲକ ଅଧୀନ ୨୬ ପଞ୍ଚାୟତରେ ତାପମାତ୍ରର ବୃଦ୍ଧି ଚିନ୍ତାର କାରଣ ହୋଇଛି ା ଗାଁ ଗଣ୍ଡାଠାରୁ ଆରମ୍ଭ କରି ବ୍ଳକ ଅଧୀନ କଟକ-ଚାନ୍ଦବାଲି ରାସ୍ତା ଓ ଚଣ୍ଡିଖୋଲ-ପାରାଦୀପ ୫୩ ନଂ. ରାଜପଥ ଦିନ ୧୧ଟାରୁ ୫ଟା ପର୍ଯ୍ୟନ୍ତ ଶୂନଶାନ୍ ହୋଇପଡୁଛି ା ଏପରି ପରିସ୍ଥିତିରେ ଇଟାଭାଟିର ନିଆଁ ଓ ଧୂଆଁ ତାପମାତ୍ର ବଢ଼ାଇ ଚାଲିଛି ବୋଲି ଅଭିଯୋଗ ହୋଇଛି ା ଡେରାବିଶ ତହସିଲ ଅଧୀନରେ ରହିଥିବା ୧୫ରୁ ଊର୍ଦ୍ଧ୍ୱ ପଞ୍ଚାୟତରେ ବେଆଇନ ଇଟାଭାଟି କୁଟୀର ଶିଳ୍ପ ପାଲଟିଛି ା ପ୍ରଶାସନିକ କଟକଣାକୁ ସମ୍ପୂର୍ଣ୍ଣ ବେଖାତିର କରି ଇଟାଭାଟି ନିର୍ମାଣ ଚାଲିଛି ବୋଲି ଜିଲା ଚାଷୀ ଶ୍ରମିକ ସଂଘର ସଭାପତି ପଣ୍ଡିତ ଶରତ ଚନ୍ଦ୍ର ମିଶ୍ର କହିଛନ୍ତି ା ମିଶ୍ରଙ୍କ ସୂଚନା ଅନୁଯାୟୀ, ତହସିଲଦାରଙ୍କ ଠାରୁ ଆରମ୍ଭ କରି ବିଭିନ୍ନ ପ୍ରଶାସନିକ ଅଧିକାରୀ ଏ ବିଷୟରେ ସମ୍ପୂର୍ଣ୍ଣ ଅବଗତ ଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ। ଇଟା ବ୍ୟବସାୟୀମାନେ ତହସିଲ କର୍ମଚାରୀଙ୍କୁ ହାତ କରି ଭାଟି ଚଳାଉଛନ୍ତି ବୋଲି ଗ୍ରାମବାସୀ କହିଛନ୍ତି। ତୁରନ୍ତ ଏ ଦିଗରେ ପଦକ୍ଷେପ ନେବାକୁ ଜିଲାପାଳଙ୍କ ନିକଟରେ ଦାବି କରାଯାଇଛି। ଏ ବିଷୟରେ ତହସିଲଦାର ଅକ୍ଷୟ ପରିଡ଼ାଙ୍କୁ ଯୋଗାଯୋଗ କରିବାରୁ ସୋମବାରଠାରୁ ବ୍ଲକର ବିଭିନ୍ନ ଅଞ୍ଚଳକୁ ଯାଇ ବେଆଇନ ଇଟାଭାଟି ଠାବ କରାଯିବ। ତୁରନ୍ତ ସେ ସଂକ୍ରାନ୍ତରେ ପଦକ୍ଷେପ ଗ୍ରହଣ କରାଯିବ ବୋଲି ସେ କହିଛନ୍ତି ା