ଭୁବନେଶ୍ୱର, ୬।୨(ବ୍ୟୁରୋ):ରାଜ୍ୟରେ ରବିବାର ରାତିରୁ ଧୀରେ ଧୀରେ ତାପମାତ୍ରା ୨ରୁ ୩ ଡିଗ୍ରୀ ଯାଏ ବୃଦ୍ଧି ହେବାର ସମ୍ଭାବନା ରହିଛି। ଏଥିସହିତ ଆସନ୍ତା ଦୁଇଦିନ ରାଜ୍ୟର ବିଭିନ୍ନ ସ୍ଥାନରେ କୁହୁଡ଼ି ଦେଖାଦେବ। ସୋମବାର ବାଲେଶ୍ୱର, ଭଦ୍ରକ, କେନ୍ଦ୍ରାପଡ଼ା, ଜଗତସିଂହପୁର ଓ କଟକ ଏବଂ ମଙ୍ଗଳବାର ଯାଜପୁର, କଟକ, ଅନୁଗୋଳ, ଢେଙ୍କାନାଳ, ଖୋର୍ଦ୍ଧା, ପୁରୀ, କେନ୍ଦ୍ରାପଡ଼ା, ଜଗତ୍ସିଂହପୁର, ଭଦ୍ରକ ଓ ବାଲେଶ୍ୱରରେ କୁହୁଡ଼ି ଅନୁଭୂତ ହେବ ବୋଲି ଭୁବନେଶ୍ୱର ଆଞ୍ଚଳିକ ପାଣିପାଗ କେନ୍ଦ୍ର ପୂର୍ବାନୁମାନ କରିଛି। ସେପଟେ ରବିବାର ରାଜ୍ୟର ବିଭିନ୍ନ ସହରରେ ଶୀତଲହରୀ ଅନୁଭୂତ ହୋଇଥିଲା। ରାଉରକେଲା, ଫୁଲବାଣୀ, ହୀରାକୁଦ ଓ ଝାରସୁଗୁଡ଼ାରେ ଶୀତଲହରୀ ଅନୁଭୂତ ହୋଇଥିଲା। ରବିବାର ୬ଟି ସହରରେ ତାପମାତ୍ରା ୯ ଡିଗ୍ରୀ ତଳେ ରହିଥିଲା। ଫୁଲବାଣୀରେ ସର୍ବନିମ୍ନ ୬ ଡିଗ୍ରୀ ତାପମାତ୍ରା ଥିବାବେଳେ କୋରାପୁଟ ୯, ସୁନ୍ଦରଗଡ଼ ୯, ରାଉରକେଲା ୯.୫, ଝାରସୁଗୁଡ଼ା ୯, ହୀରାକୁଦ ୯.୯ ଡିଗ୍ରୀ ରହିଥିଲା। ସେହିପରି ଭବାନୀପାଟଣା ୧୦, ସୋନପୁର ୧୦.୫, ଅନୁଗୋଳ ୧୧.୬, କେନ୍ଦୁଝର ୧୧.୪, ଢେଙ୍କାନାଳ ୧୨, ବରଗଡ଼ ୧୨, ନବରଙ୍ଗପୁର ୧୨, ସମ୍ବଲପୁର ୧୨, ବାରିପଦା ୧୨.୬ ଓ ଭୁବନେଶ୍ୱରରେ ସର୍ବନିମ୍ନ ତାପମାତ୍ରା ୧୪ ଡିଗ୍ରୀ ରେକର୍ଡ କରାଯାଇଛି।
