ଭୁବନେଶ୍ୱର, ୧୯।୯(ଅସମାପିକା ସାହୁ):ନୀଳାଦ୍ରିବିହାରସ୍ଥିତ ଇସାନେଶ୍ୱର ମନ୍ଦିର ପରିସର ସୋମବାର ସାପମୟ ହୋଇଯାଇଥିଲା। ମନ୍ଦିରର ଜଣେ ପୂଜକ ସଞ୍ଜୟ କୁମାର ଦାସ ଦୈନନ୍ଦିନ କାର୍ଯ୍ୟ ସମ୍ପାଦନ କରିବା ପାଇଁ ଯାଉଥିବାବେଳେ ତାଙ୍କ ସାମ୍ନାରେ ବଉଳ ଗଛରୁ କିଛି ଗୋଟେ ପଦାର୍ଥ ପଡ଼ିବା ଦେଖିବାକୁ ପାଇଲେ। ଜିନିଷଟି କ’ଣ ଦେଖୁ ଦେଖୁ ତା’ଭିତରୁ ଏକ ସବୁଜ ରଙ୍ଗର ସାପ ବାହାରି ଧିରେ ଧିରେ ଚାଲିବାକୁ ଲାଗିଲା। ତା’ପରେ ଗୋଟିକ ପରେ ଗୋଟିଏ ସେହିଭଳି ଜିନିଷ ଗଛରୁ ପଡ଼ିଲା ଏବଂ ଅଳ୍ପ କିଛି ସେକେଣ୍ଡରେ ସବୁଜ ରଙ୍ଗର ସାପ ଛୁଆ ମୁଣ୍ଡ ହଲେଇ ବାହାରି ଚାଲିଲେ। ମନ୍ଦିରରେ ଭକ୍ତଙ୍କ ଗହଳି ମଧ୍ୟ ଅଧିକ ଥିଲା। ସାପ କଥା ଶୁଣୁ ଭକ୍ତମାନେ ଭୟଭୀତ ହୋଇପଡିଥିଲେ। ତେଣୁ ମନ୍ଦିର କମିଟି ସମ୍ପାଦକ ଉକ୍ତ ବଉଳ ଗଛ ଚାରିପଟେ ବାଉଁଶ ବାରିକେଡ୍ କରିବା ସହିତ ସାପଗୁଡିକ ବାହାରକୁ ଆସିତବା ରାସ୍ତାକୁ ବନ୍ଦ କରି ଦେଇଥିଲେ। ମନ୍ଦିର କମିଟି ଚେୟାରମ୍ୟାନଙ୍କଠାରୁ ଖବର ପାଇ ସ୍ନେକ୍ ହେଲ୍ପ ଲାଇନର ସାଧାରଣ ସମ୍ପାଦକ ଶୁଭେନ୍ଦୁ ମଲ୍ଲିକ ଓ ସଦସ୍ୟ ପୂର୍ଣ୍ଣ ଚନ୍ଦ୍ର ଦାସ ଘଟଣା ସ୍ଥଳରେ ପହଞ୍ଚତ୍ଥିଲେ। ସେତେବେଳକୁ ମନ୍ଦିର କର୍ମଚାରୀମାନେ ୭ଟି ସବୁଜ ରଙ୍ଗର ସାପ ଛୁଆଙ୍କୁ ବାଡ଼ିରେ ଟେକି ଏକ ପ୍ଲାଷ୍ଟିକ ଟବ୍ ଭିତରେ ସୁରକ୍ଷିତ ରଖି ସାରିଥିଲେ। ତେବେ ଆଉ ୪-୫ଟି ଛୁଆ ଚାରିଆଡୁ ଚାଲି ପଳାଇଥିଲେ। ଏଗୁଡିକ ଲାଉଡଙ୍କିଆ ସାପ ଛୁଆ ଥିଲା ଓ ସେସବୁକୁ ମନ୍ଦିର ପାଖରୁ ଅନତିଦୂରରେ ଜଙ୍ଗଲିଆ ସ୍ଥାନରେ ଛାଡ଼ି ଦିଆଯାଇଥିବା ଶୁଭେନ୍ଦୁ କହିଛନ୍ତି। ସେ କୁହନ୍ତି, କିଛି ସାପ ଅଣ୍ଡା ଦେଇଥାନ୍ତି ଓ ପ୍ରାୟ ଦୁଇ ମାସ ପରେ ସେଇ ଅଣ୍ଡାରୁ ଛୁଆ ଫୁଟିଥାଏ। କିଛି ସାପ ସିଧାସଳଖ ଛୁଆ ଜନ୍ମ କରିଥାନ୍ତି। ଏହି ଲାଉଡଙ୍କିଆ ସାପଙ୍କ ଛୁଆମାନେ ଏକ ପାରଦର୍ଶୀ ଝିଲ୍ଲି ଆବରଣ ଯୁକ୍ତ ଖୋଳ ଭିତରେ ବଢ଼ି ଥାଆନ୍ତି। ମାଆ ପେଟରୁ ବାହାରି ଗଛରୁ ତଳେ ପଡ଼ିବାବେଳେ ସେ ଝିଲି ଫାଟି ଯାଇଥାଏ ଓ ଛୁଆମାନେ ବାହାରକୁ ଆସିଥାଆନ୍ତି। ଝିଲି ଭିତରେ ଥିବା ତରଳ ପଦାର୍ଥ ଯୋଗୁ ସାପ ଛୁଆଙ୍କର ଗଛରୁ ତଳେ ପଡ଼ିବା ଦ୍ୱାରା କିଛି କ୍ଷତି ହୋଇ ନ ଥାଏ ବୋଲି ଶୁଭେନ୍ଦୁ କହିଛନ୍ତି। ଏଥିରେ ମନ୍ଦିର ପରିସରରେ ମା’ ସାପ ରହିଥିବା ଆଶଙ୍କା କରାଯାଉଛି।
