ବ୍ରହ୍ମପୁର ଅଫିସ,୧୪।୯: କୋଭିଡ ମହାମାରୀ କାରଣରୁ ଗତ ୨ ବର୍ଷ ଧରି ଜିଲା ପ୍ରଶାସନର କଟକଣା ମଧ୍ୟରେ ସହରରେ ପୂଜା ମଣ୍ଡପରେ ଶାରଦୀୟ ଦୂର୍ଗା ପୂଜା ପାଳିତ ହୋଇଥିଲା। ତେବେ ମହାମାରୀ ହ୍ରାସ ପାଇବା ପରେ ଚଳିତ ବର୍ଷ ସହରରେ ବିଭିନ୍ନ ପୂଜା କମିଟି ପକ୍ଷରୁ ମହାଆଡମ୍ବରରେ ପାଳନ କରିବା ପାଇଁ ପ୍ରସ୍ତୁତି ଆରମ୍ଭ ହୋଇଛି। ଚଳିତ ବର୍ଷ ସହରର ପୁରୁଣା ବସ୍ଷ୍ଟାଣ୍ଡ ବାରାକ୍ସ ଦୁର୍ଗା ପୂଜା କମିଟି ୫୯ ତମ ପୂଜା ପାଳନ କରିବାକୁ ଯାଉଛି। ଗତ ୪ ତାରିଖରେ ପୂଜା ନିମନ୍ତେ ଶୁଭଖୁଣ୍ଟି ସ୍ଥାପନ ହୋଇଥିଲା। କମିଟି ପକ୍ଷରୁ ପ୍ରଥମେ ୧୯୬୩ରେ ପୂଜା ଆରମ୍ଭ କରାଯାଇଥିଲା। ସେ ସମୟରେ ଅରକ୍ଷୀ ପାତ୍ର ଓ ଅର୍ଜୁନ ମହାରଣାଙ୍କ ସମେତ କେତେଜଣ ବଦାନ୍ୟ ବ୍ୟକ୍ତିଙ୍କ ସହଯୋଗ କ୍ରମେ ପୂଜା ଆରମ୍ଭ ହୋଇଥିଲା। କମିଟି ପକ୍ଷରୁ ପ୍ରଥମେ ମୂର୍ତ୍ତି ପୂଜା ହୋଇଥିଲା। ନବରାତ୍ରିରୁ ପୂଜା ଆରମ୍ଭ ହୋଇଥାଏ। ଚଳିତ ଥର କମିଟି ପକ୍ଷରୁ ଏକ ମନ୍ଦିର ତୋରଣ ଆକର୍ଷଣର କେନ୍ଦ୍ର ବିନ୍ଦୁ ପାଲଟିବ ବୋଲି କମିଟି ଆବାହକ ଶିବରାମ ସାହୁ କହିଛନ୍ତି। ଏହି ତୋରଣର ଉଚ୍ଚତା ୬୦ ଫୁଟ ରହିବ। କଲିକତା କାରିଗରଙ୍କ ଦ୍ୱାରା ୭ ଫୁଟ ଉଚ୍ଚତା ବିଶିଷ୍ଟ ମୂର୍ତ୍ତି ନିର୍ମାଣ କରାଯିବ। ଆସନ୍ତା ୨୬ ତାରିଖ ନବରାତ୍ରିଠାରୁ ପୂଜା ଆରମ୍ଭ ହେବ ବୋଲି କୁହାଯାଇଛି। ଗତ ୨ବର୍ଷ ଧରି କୋଭିଡ୍ ମହାମାରୀ ସମୟରେ ମଧ୍ୟ ଜିଲା ପ୍ରଶାସନର ନିୟମକୁ ଅନୁକରଣ କରି ପୂଜା ଅନୁଷ୍ଠିତ ହୋଇଥିଲା। ପୂଜାରେ ପୁରୁଣା ବସ୍ଷ୍ଟାଣ୍ଡ ଟ୍ୟାକ୍ସି ସଂଘ ପରିଚାଳନା କରୁଛନ୍ତି।
ଏକ ମହାତ୍ମ୍ୟ ରହିଛି। ଆବାହକଙ୍କ କହିବା ମୁତାବକ, ୧୯୯୯ ମହାବାତ୍ୟା ସମୟରେ ତୋରଣ ସହ ମୂର୍ତ୍ତି ଭାଙ୍ଗି ରୁଜି ଯାଇଥିବା ବେଳେ ଅଖଣ୍ଡ ଦୀପ ଲିଭି ନ ଥିଲା। ମା’ଙ୍କ କରୁଣାରୁ ଏଭଳି ଅଲୌକିକ ଘଟଣା ଘଟିଥିଲା। ଚଳିତ ଥର ପୂଜା କମିଟି ସଭାପତି ଦୁର୍ଗା ପ୍ରସାଦ ପଣ୍ଡା, ସମ୍ପାଦକ ବାବୁଲା ପାତ୍ରଙ୍କ ସମେତ ହେମନ୍ତ ପଣ୍ଡା ଓ କ୍ରିଷ୍ଣା ରେଡ୍ଡୀ ପ୍ରମୁଖ ପରିଚାଳନାରେ ସହଯୋଗ କରୁଛନ୍ତି।