ନୂଆଦିଲ୍ଲୀ, ୨୯ା୬ (ପି.ଟି.): ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ୱାର୍ଲଡ ଟେଷ୍ଟ ଚାମ୍ପିୟନଶିପ୍ ସମୟଚକ୍ରର ଅବଧି ବୃଦ୍ଧି କରିିବା ଉଚିତ୍ ବୋଲି ବାଂଲାଦେଶ କ୍ରିକେଟ ବୋର୍ଡ (ବିସିବି) କହିଛି। ତା ’ ନହେଲେ କୋଭିଡ୍-୧୯ ମହାମାରୀ ଯୋଗୁ ନିକଟରେ ଏହାର ବାତିଲ ୮ଟି ମ୍ୟାଚ ଖେଳାଯିବା ସମ୍ଭବପର ହେବନାହିଁ। ମହାମାରୀ ଅନ୍ତର୍ଜାତୀୟ କ୍ୟାଲେଣ୍ଡରକୁ ପ୍ରଭାବିତ କରିଛି। ଆଇସିସି ଟେଷ୍ଟ ଚାମ୍ପିୟନଶିପ୍ ଗତବର୍ଷ ଅଗଷ୍ଟ ୧ରେ ଉନ୍ମୋଚନ ହୋଇଛି। ବାଂଲାଦେଶ ୮ଟି ଟେଷ୍ଟ ମ୍ୟାଚ ଖେଳିପାରିନାହିଁ। ଦଳ ଏପ୍ରିଲରେ ପାକିସ୍ତାନ ବିପକ୍ଷରେ ଦେଶ ବାହାରେ ଏକ ମ୍ୟାଚ, ଜୁନ୍ରେ ଅଷ୍ଟ୍ରେଲିଆ ବିପକ୍ଷରେ ଦୁଇ ମ୍ୟାଚ ବିଶିଷ୍ଟ ସିରିଜ, ନ୍ୟୁଜିଲାଣ୍ଡ ବିପକ୍ଷରେ ଦୁଇଟି ଟେଷ୍ଟ ଏବଂ ଶ୍ରୀଲଙ୍କା ବିପକ୍ଷରେ ତିନୋଟି ମ୍ୟାଚ ଖେଳିପାରି ନାହିଁ। ବର୍ତ୍ତମାନ ଚାଲିଥିବା ଆଇସିସି ଟେଷ୍ଟ ଚାମ୍ପିୟନଶିପ୍ ସମୟଚକ୍ରର ଅବଧିକୁ ଯଦି ବୃଦ୍ଧି କରା ନ ଯାଏ ତେବେ ପ୍ରଥମ ସମୟଚକ୍ରର ଧାର୍ଯ୍ୟ ସମୟସୀମା ମଧ୍ୟରେ ୮ଟି ଟେଷ୍ଟ ମ୍ୟାଚ ଖେଳିବା ସମ୍ଭବପର ନୁହେଁ ବୋଲି ବିସିବି ଚେୟାରମ୍ୟାନ ଆକ୍ରାମ ଖାଁ କହିଛନ୍ତି। ଓ୍ବାଲର୍ଡ ଟେଷ୍ଟ ଚାମ୍ପିୟନଶିପ୍ (ଡବ୍ଲ୍ୟୁଟିସି) ଟେଷ୍ଟ ଖେଳୁଥିବା ୧୨ଟି ଦେଶ ମଧ୍ୟରୁ ୯ଟି ଦେଶକୁ ନେଇ ଅନୁଷ୍ଠିତ ହେଉଛି। ଦୁଇ ବର୍ଷିଆ ସମୟଚକ୍ରରେ ପ୍ରତ୍ୟେକ ଦଳ ୬ଟି ଲେଖାଏଁ ଟେଷ୍ଟ ସିରିଜ ଖେଳିବେ। ତନ୍ମଧ୍ୟରୁ ତିନୋଟି ନିଜ ଦେଶ ଏବଂ ଅନ୍ୟ ତିନୋଟି ବିଦେଶରେ। ହେଲେ ସିରିଜରେ ଟେଷ୍ଟ ମ୍ୟାଚ ସଂଖ୍ୟା ସମାନ ରହିବ ନାହିଁ। ପ୍ରତ୍ୟେକ ସିରିଜରୁ ଗୋଟିଏ ଦଳ ସର୍ବାଧିକ ୧୨୦ ପଏଣ୍ଟ ସ୍କୋର କରିପାରିବ। ଲିଗ୍ ପର୍ଯ୍ୟାୟ ଶେଷ ହେବା ପରେ ଆସନ୍ତା ବର୍ଷ ଜୁନ୍ରେ ଫାଇନାଲ ଖେଳାଯିବା କାର୍ଯ୍ୟକ୍ରମ ରହିଛି। ୨୦୧୯ ଜୁଲାଇରୁ ୨୦୨୧ ମାର୍ଚ୍ଚ ୩୧ ମଧ୍ୟରେ ମୋଟ ୭୨ ଟେଷ୍ଟ ମ୍ୟାଚ ଖେଳାଯିବା କଥା। ସୂଚନାଯୋଗ୍ୟ, ବିଶ୍ୱ ଟେଷ୍ଟ ଚାମ୍ପିୟନଶିପ୍ ଷ୍ଟାଣ୍ଡିଂରେ ଭାରତ ବର୍ତ୍ତମାନ ପ୍ରଥମ ସ୍ଥାନରେ ରହିଥିବାବେଳେ ଅଷ୍ଟ୍ରେଲିଆ ଦ୍ୱିତୀୟ ସ୍ଥାନରେ ଅଛି।