ଲକ୍ଷ୍ନୌ: ଉତ୍ତର ପ୍ରଦେଶର ଚାନ୍ଦୋଲିରେ ଏକ ଦୋକାନରୁ ଚୋରି କରିବା ପରେ ଚୋର ଖୁସିରେ ମସ୍ଗୁଲ ହୋଇ ନାଚୁଥିବାର ଏକ ଭିଡିଓ ଭାଇରାଲ ହୋଇଛି। ଚୋର ଜଣକ ହାର୍ଡଓ୍ବେର ଦୋକାନ ଭିତରକୁ ପ୍ରବେଶ କରି ଜିନିଷ ଚୋରି କରିସାରିବା ପରେ ହଠାତ୍ ନାଚୁଥିବା ଏହି ଭିଡିଓରେ ଦେଖିବାକୁ ମିଳିଛି। ଚୋରଙ୍କ ନଜର ଦୋକାନରେ ଲାଗିଥିବା କ୍ୟାମେରା ଉପରେ ପଡ଼ି ନ ଥିବାବେଳେ କ୍ୟାଶ୍ କାଉଣ୍ଟରରୁ ଯେତିକି ଟଙ୍କା ମିଳିଲା ସେତିକି ନେଇ ସେଠାରୁ ଚାଲି ଯାଇଥିଲେ। ଘଟଣା ୧୬ ତାରିଖ ରାତିର। ପରଦିନ ସକାଳେ ଦୋକାନ ମାଲିକ ଆସି ଦେଖିଲାବେଳକୁ ଦୋକନାରେ ସବୁ ଜିନିଷ ଏଣେତେଣେ ଖେଳେଇ ହୋଇ ପଡ଼ିଥିବାବେଳେ କ୍ୟାଶ୍ କାଉଣ୍ଟରରେ ଟଙ୍କା ନ ଥିଲା। ପରବର୍ତ୍ତୀ ମୁହୂର୍ତ୍ତରେ ସିସିଟିଭି ଫୁଟେଜ୍ ଚେକ୍ କରି ସେ ଦେଖିଥିଲେ ଯେ, ଜଣେ ଚୋର ଦୋକାନରେ କଳାକନା ବୁଲାଇବା ପରେ ନାଚୁଛନ୍ତି। ଏହାପରେ ସେ ସ୍ଥାନୀୟ ପୋଲିସ ନିକଟରେ ଏଫ୍ଆଇଆର୍ ଦାଏର କରିଥିଲେ। ତେବେ ଚୋର ନାଚୁଥିବାର ଭିଡିଓ ଏବେ ସୋସିଆଲ ମିଡିଆ ୟୁଜର୍ସଙ୍କ ଦୃଷ୍ଟି ଆକର୍ଷଣ କରିବା ସହ ଲୋକେ ଏହାକୁ ଡ୍ୟାନ୍ସିଂ ଥିଫ୍ ବୋଲି କହିବା ଆରମ୍ଭ କରିଛନ୍ତି।