ନୂଆଦିଲ୍ଲୀ,୧୫।୩:ଦେଶର ଅଗ୍ରଣୀ ତଥା ଇ ପ୍ଲାଟ୍ଫର୍ମ (ଡିଜିଟାଲ) ଜରିଆରେ ଆର୍ଥିକ ସେବା ପ୍ରଦାନ କରୁଥିବା ପେଟିଏମ୍ ବର୍ତ୍ତମାନ ସମୟରେ ତୃତୀୟ ପକ୍ଷ ୟୁପିଆଇ ଆପ୍ରେ ପରିଣତ ହୋଇଛି। ଫଳରେ ପେଟିଏମ୍ ହିତାଧିକାରୀମାନେ ପ୍ରାଥମିକ ପର୍ଯ୍ୟାୟରେ କାରବାର ସହ ସ୍ବୀକୃତିପ୍ରାପ୍ତ ବ୍ୟାଙ୍କ ସହ ଜଡିତ ହେବା ପାଇଁ ମଧ୍ୟ କୁହାଯାଇଛି। ସେହିଭଳି ନ୍ୟାଶନାଲ ପେମେଣ୍ଟ କର୍ପୋରେଶନ ଅଫ୍ ଇଣ୍ଡିଆ (ଏନ୍ପିସିଆଇ) ଗୁରୁବାର ମଲ୍ଟି ବ୍ୟାଙ୍କ ମଡେଲ ଅଧୀନରେ ତୃତୀୟ-ପକ୍ଷ ଆବେଦନ ପ୍ରଦାନକାରୀ ଭାବେ ୟୁପିଆଇରେ ଅଂଶଗ୍ରହଣ କରିବାକୁ ପେଟିଏମ୍-ମାଲିକ ଓ୍ବାନ୍ ନାଇନ ସେଭନ କମ୍ୟୁନିକେଶନ୍ ଲିମିଟେଡ୍କୁ ଅନୁମୋଦନ ପ୍ରଦାନ କରିଛି। ଏପରିକି ଆକ୍ସିସ୍ ବ୍ୟାଙ୍କ, ଏଚ୍ଡିଏଫ୍ସି ବ୍ୟାଙ୍କ, ଷ୍ଟେଟ ବ୍ୟାଙ୍କ ଅଫ୍ ଇଣ୍ଡିଆ ଏବଂ ୟେସ୍ ବ୍ୟାଙ୍କ ପେଟିଏମ୍କୁ ପେମେଣ୍ଟ ସିଷ୍ଟମ ପ୍ରଦାନକାରୀ ବ୍ୟାଙ୍କ ଭାବେ କାର୍ଯ୍ୟ କରିବେ। ସେହିପରି ୟେସ୍ ବ୍ୟାଙ୍କ ମଧ୍ୟ ଓ୍ବାନ୍ ନାଇନ ସେଭନ କମ୍ୟୁନିକେଶନ୍ ଲିମିଟେଡ୍ ପାଇଁ ବିଦ୍ୟମାନ ତଥା ନୂତନ ୟୁପିଆଇ ବ୍ୟବସାୟୀମାନଙ୍କ ପାଇଁ ବ୍ୟାଙ୍କ ଅଧିଗ୍ରହଣକାରୀ ଭାବେ କାର୍ଯ୍ୟ କରିବ। ବିଶେଷକରି @ ପେଟିଏମ୍ ହ୍ୟାଣ୍ଡେଲକୁ ଗ୍ରହଣ ପାଇଁ ୟେସ୍ ବ୍ୟାଙ୍କକୁ ପୁନଃ ନିର୍ଦ୍ଦେଶ ପ୍ରଦାନ କରାଯିବ ବୋଲି ଏନ୍ପିସିଆଇ ପକ୍ଷରୁ ବିସ୍ତୃତ ଉଲ୍ଲେଖ କରାଯାଇଛି। ଉଲ୍ଲେଖଯୋଗ୍ୟ, ମଲ୍ଟି ବ୍ୟାଙ୍କ ମଡେଲ ଅଧୀନରେ ତୃତୀୟ-ପକ୍ଷ ଆବେଦନ ପ୍ରଦାନକାରୀ ଭାବେ ୟୁପିଆଇରେ ଅଂଶଗ୍ରହଣ କରିବାକୁ ଏନ୍ପିସିଆଇ ଓ୍ବାନ୍ ନାଇନ ସେଭନ କମ୍ୟୁନିକେଶନ୍ ଲିମିଟେଡ୍କୁ ଅନୁମୋଦନ ପ୍ରଦାନ କରିଛି। ଅପରପକ୍ଷରେ ଏନ୍ପିସିଆଇର ନିଷ୍ପତ୍ତି ଭାରତୀୟ ରିଜର୍ଭ ବ୍ୟାଙ୍କର ଅବଧି ସମୟ ସୀମାର ଗୋଟିଏ ଦିନ ପୂର୍ବରୁ ପେଟିଏମ୍ ପେମେଣ୍ଟସ୍ ବ୍ୟାଙ୍କ ଲିମିଟେଡ୍ (ପିପିବିଏଲ୍) ର ଗ୍ରାହକ ଏବଂ ବଣିକମାନଙ୍କୁ ୨୦୨୪ ମାର୍ଚ୍ଚ ୧୫ ସୁଦ୍ଧା ସେମାନଙ୍କ ଆକାଉଣ୍ଟକୁ ଅନ୍ୟ ବ୍ୟାଙ୍କକୁ ସ୍ଥାନାନ୍ତର କରିବାକୁ ପରାମର୍ଶ ସହ ବିଜ୍ଞପ୍ତି ପ୍ରକାଶ କରିଛି।