ଚମ୍ପୁଆ,୩୧।୧୨(ଡି.ଏନ.ଏ): କେନ୍ଦୁଝର ଜିଲାର ଚମ୍ପୁଆ ଉପଖଣ୍ଡରେ ରହିଥିବା ପର୍ଯ୍ୟଟନସ୍ଥଳୀ କେଶରୀ କୁଣ୍ଡ ଓ କଙ୍ଗିରା ମୁହାଣ(ଦୋ ମୁହାଣି) ଚଳିତ ବର୍ଷ ପର୍ଯ୍ୟଟକଙ୍କୁ ଆକୃଷ୍ଟ କରିପାରିନି। କୋଭିଡ୍ କଟକଣା ଏହାର ପ୍ରମୁଖ କାରଣ ସାଜିଥିବା ବେଳେ ବଣଭୋଜିର ଆସର ଏଠାରେ ଦେଖିବାକୁ ମିଳୁନାହିଁ। କାଁ ଭାଁ କେତେଜଣଲୋକଙ୍କୁ ଛାଡିଦେଲେ ପୂର୍ବ ବର୍ଷ ଭଳି ପିକ୍ନିକ୍ ପାର୍ଟିଙ୍କ ଦେଖାନାହିଁ। ପ୍ରତ୍ୟେକ ବର୍ଷ ଡିସେମ୍ବର ୨୫ ତାରିଖରୁ ଏହି ପର୍ଯ୍ୟଟନସ୍ଥଳୀଗୁଡିକୁ ବଣଭୋଜି ସହିତ ପ୍ରାକୃତିକ ମନୋରମ ଦୃଶ୍ୟ ଉପଭୋଗ କରିବା ପାଇଁ ହଜାର ହଜାର ପର୍ଯ୍ୟଟକ ଆସୁଥିବା ବେଳେ ଚଳିତ ବର୍ଷ ସେମିତି କିଛି ହୋଇନାହିଁ।
ଅନୁସାରେ ଚମ୍ପୁଆ ଅଞ୍ଚଳର ଲାଇଫ୍ଲାଇନ୍ କୁହାଯାଉଥିବା ବୈତରଣୀ ନଦୀ ତଟରେ ଅବସ୍ଥିତ ଏହି ଦୁଇ ପର୍ଯ୍ୟଟନସ୍ଥଳୀରେ ଡିସେମ୍ବର ୨୫ରୁ ଜାନୁୟାରୀ ୧୫ ପର୍ଯ୍ୟନ୍ତ ପର୍ଯ୍ୟଟକଙ୍କ ଭିଡ଼ ଲାଗିଥାଏ। ଓଡ଼ିଶା ତଥା ଓଡ଼ିଶା ବାହାରୁ ପ୍ରକୃତିର ଏହି ମନୋରମ ସମ୍ଭାରକୁ ଉପଭୋଗ କରିବା ସହିତ ବଣଭୋଜିର ଆନନ୍ଦ ଉଠାଇବା ପାଇଁ ପର୍ଯ୍ୟଟକଙ୍କ ସୁଅ ଛୁଟିଥାଏ। କେଶରୀ କୁଣ୍ଡ ଠାରେ ରହିଥିବା ୩ ଗୋଟି ପୌରାଣିକ ବଦ୍ଧିତ କୁଣ୍ଡ ଏକ ପବିତ୍ର କୁଣ୍ଡ ବୋଲି ବିଶ୍ୱାସ କରାଯାଉଥିବା ବେଳେ ବହୁ ପର୍ଯ୍ୟଟକ ଏଠାରେ ସ୍ନାନ ଆଦି କରିଥିାନ୍ତି। ବୈତରଣୀର ବିସ୍ତୀର୍ଣ୍ଣ ବାଲୁକା ଶଯ୍ୟା ସହିତ ପଥର ଚଟାଣକୁ ଚିରି ବହିଯାଉଥିବା ନଦୀର ଜଳ ବେଶ୍ ଉପଭୋଗ୍ୟ ହୋଇଥାଏ। ସେହିପରି କଙ୍ଗିରା ମୁହାଣ ବା ଦୋ ମୁହାଣିଠାରେ ବୈତରଣୀ ଓ କଙ୍ଗିରା ନଦୀର ମିଳନ ସ୍ଥଳ ସହିତ ନଦୀ ପଠାକୁ ଲାଗିରହିଥିବା ଜଙ୍ଗଲ ପର୍ଯ୍ୟଟକଙ୍କୁ ବେଶ୍ ଆକୃଷ୍ଟ କରିଥାଏ। କିନ୍ତୁ ଚଳିତବର୍ଷ ସବୁ ଖାଁ ଖାଁ ହୋଇଯାଇଛି।
ରାଜା ଯଯାତି କେଶରୀଙ୍କ ସମୟରେ କେଶରୀ କୁଣ୍ଡକୁ ଏକ ପୁଣ୍ୟ ତୀର୍ଥଭାବେ ପରିଗଣିତ କରାଯାଇଥିଲା। ଯେଉଁମାନେ ଗଙ୍ଗାଗୟା ଯିବାରେ ଅକ୍ଷମ ହୁଅନ୍ତି, ସେମାନେ ଏଠାରେ ପିଣ୍ଡଦାନ କରି ପୁଣ୍ୟପ୍ରାପ୍ତ କରିଥାନ୍ତି। ଏପରିକି ମକର ସମୟରେ ବହୁ ଭକ୍ତ ଏଠାରେ ବୁଡ ପକାଇ ପୁଣ୍ୟ ଅର୍ଜନ କରିଥିବା ଅନୁମାନ କରାଯାଏ। ଏହାର ସୁରକ୍ଷା ଓ ପର୍ଯ୍ୟଟକଙ୍କ ପାଇଁ ସୁବ୍ୟବସ୍ଥା କରା ନ ଗଲେ ଏହି ପର୍ଯ୍ୟଟନସ୍ଥଳୀକୁ ପର୍ଯ୍ୟଟକଙ୍କ ସୁଅ କମିଯିବ।
-ପଦ୍ମିନୀ ମିଶ୍ର, କବି ତଥା ଆଇନଜୀବୀ
କେଶରୀ କୁଣ୍ଡ ୨୦୦୮ ମସିହାରୁ ପର୍ଯ୍ୟଟନ ସ୍ଥଳୀର ମାନ୍ୟତା ପାଇଥିଲେ ମଧ୍ୟ ଆଖି ଦୃଶିଆ ସେପରି କିଛି ଉନ୍ନତି ହୋଇପାରିନାହିଁ। ଫଳରେ ପର୍ଯ୍ୟଟକଙ୍କ ମଧ୍ୟରେ ବିମୁଖତା ଦେଖାଦେଇଛି। ପ୍ରତ୍ୟେକ ବର୍ଷ ଡିସେମ୍ବରରୁ ମାର୍ଚ୍ଚ ପର୍ଯ୍ୟନ୍ତ ଏଠାରେ ପର୍ଯ୍ୟଟକଙ୍କ ଭିଡ ଜମିଥାଏ। ଚଳିତବର୍ଷ କୋଭିଡ୍ କଟକଣା ପାଇଁ ପର୍ଯ୍ୟଟକଙ୍କ ସଂଖ୍ୟା କମିଯାଇଛି। ଏହି ପର୍ଯ୍ୟଟନ ସ୍ଥଳୀର ଉନ୍ନତି ପାଇଁ ପଦକ୍ଷେପ ଗ୍ରହଣ କରିବାକୁ ନିବେଦନ କରିଛନ୍ତି।
-ବିଦୁ ଭୂଷଣ ପତି, ସ୍ଥାନୀୟ ବାସିନ୍ଦା