ବାରିପଦା ଅଫିସ,୫ା୯:ମୟୂରଭଞ୍ଜ ଜିଲା ବାରିପଦାସ୍ଥିତ ପ୍ରତିଜ୍ଞା ନିଶା ନିବାରଣ କେନ୍ଦ୍ରର ମୁଖ୍ୟ ଅବନୀ ପତିଙ୍କୁ ଟାଉନ ପୋଲିସ ପୁଣି ଥରେ ଗିରଫ କରି ରବିବାର କୋର୍ଟ ଚାଲାଣ କରିଛି। ଜିଲାପାଳଙ୍କ ନିର୍ଦ୍ଦେଶକୁ ଅବମାନନା କରି ପୂର୍ବଭଳି ଉକ୍ତ କେନ୍ଦ୍ର ଖୋଲିବାରୁ ତାଙ୍କୁ ଗିରଫ କରାଯାଇଥିବା ପୋଲିସ କହିଛି। ଏନେଇ ଥାନାରେ ଏକ ମାମଲା(ନଂ.୭୫୦/୨୨)ରୁଜୁ ହୋଇଛି। ଅନ୍ୟପକ୍ଷେ ଅନ୍ତେବାସୀଙ୍କୁ ଖୁଣ୍ଟରେ ବାନ୍ଧି ଗୋଇଠା ମାଡ଼ ମାରିବା ସହ ପିନ୍ କଣ୍ଟା ବାଡ଼େଇ ଲହୁଲୁହାଣ କରିବା ଭଳି ଏକ ଅମାନବୀୟ ଭିଡିଓ ଭାଇରାଲ ହେବା ଘଟଣାକୁ ନେଇ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରିଛି।
ସୂଚନାଯୋଗ୍ୟ, କିଛି ଦିନ ତଳେ ଉକ୍ତ ନିଶା ନିବାରଣ କେନ୍ଦ୍ରରେ ଜଣେ ଦିବ୍ୟାଙ୍ଗ ଅନ୍ତେବାସୀଙ୍କୁ କେନ୍ଦ୍ରର ମୁଖ୍ୟ ପତି ମ୍ୟୁଜିକର ତାଳେ ତାଳେ ନୃତ୍ୟ କରି ଏକ ପ୍ଲାଷ୍ଟିକ ପାଇପ୍ରେ ମାଡ଼ ମାରିବା ସହ ପାଦ ଚଟାଇଥିଲେ। ଏହାର ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ପୋଲିସ ପକ୍ଷରୁ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା। କେନ୍ଦ୍ରର ମୁଖ୍ୟ ପତି ଓ ତାଙ୍କ ସହଯୋଗୀଙ୍କୁ ପୋଲିସ ଗିରଫ କରି କୋର୍ଟ ଚାଲାଣ କରିଥିଲା ା କିଛି ଦିନ ପରେ ବିଚାରବିଭାଗୀୟ ହାଜତରୁ ଜାମିନରେ ଫେରିବା ପରେ ପୁନର୍ବାର ସେ ଏହି କେନ୍ଦ୍ରକୁ ଚାଲୁ କରିଥିଲେ। ତେବେ ଏହି ଘଟଣାକୁ ନେଇ ଜିଲା ସାମାଜିକ ସୁରକ୍ଷା ଅଧିକାରୀ ଓ ପୋଲିସ ମିଳିତ ତଦନ୍ତ କରିଥିଲେ। ତଦନ୍ତ ରିପୋର୍ଟ ପ୍ରଦାନ କରିବା ପରେ ଜିଲାପାଳ ବିନୀତ ଭରଦ୍ୱାଜ ଉକ୍ତ କେନ୍ଦ୍ରକୁ ବନ୍ଦ କରିବା ସହ ସିଲ୍ କରିବାକୁ ନିର୍ଦ୍ଦେଶ ଦେଇଥିଲେ। ନିଶା ନିବାରଣ କେନ୍ଦ୍ର ପାଇଁ କୌଣସି ସରକାରୀ ଅନୁମତି ନ ଥିବା ବେଳେ କେବଳ ଏକ ଟ୍ରଷ୍ଟ ରହିଥିବା ଥାନାଧିକାରୀ ବୀରେନ୍ଦ୍ର ସେନାପତି କହିିଛନ୍ତି। ବେଆଇନ ଭାବେ ନିଶା ନିବାରଣ କେନ୍ଦ୍ର ଖୋଲି ଅନ୍ତେବାସୀଙ୍କଠାରୁ ମାସକୁ ୬୫୦୦ ଟଙ୍କା ଆଦାୟ କରି ଅତି ନିମ୍ନମାନର ଖାଦ୍ୟ ସାଙ୍ଗକୁ ଚିକିତ୍ସା କରୁଥିଲେ। ଏପରିକି ଅନ୍ତେବାସୀମାନେ ମୁହଁ ଖୋଲିଲେ ତାଙ୍କୁ ଅକଥନୀୟ ନିର୍ଯାତନା ଦେଉଥିବା ସମୟର ଏକ ଭିଡିଓ ପୋଲିସର ହସ୍ତଗତ ହୋଇଛି। ଏପରି ଲୋମହର୍ଷଣକାରୀ ଭିଡିଓକୁ ଦେଖିବା ପରେ ପୋଲିସ କେନ୍ଦ୍ରର ମୁଖ୍ୟ ପତିଙ୍କୁ ଗିରଫ କରିଛି। ତେବେ କେନ୍ଦ୍ରରେ ଥିବା ଅନ୍ତେବାସୀମାନଙ୍କୁ ଅନ୍ୟତ୍ର ଥଇଥାନ କରାଯିବା ପରେ କେନ୍ଦ୍ରକୁ ସିଲ୍ କରାଯିବ ବୋଲି ଥାନାଧିକାରୀ ସେନାପତି ପ୍ରକାଶ କରିଛନ୍ତି।
