କେନ୍ଦୁଝର,୨୬।୫(ସ୍ବ.ପ୍ର): କେନ୍ଦୁଝର ଜିଲାର ବଣପାହାଡ ତଥା ବାଡି ବଗିଚାରେ ଅଞ୍ଚଳରେ ଫଳୁଥିବା ଦେଶୀ ଆମ୍ବର ଚାହିଦା କମିବାକୁ ବସିଛି। ଯାହାକୁ ସ୍ଥାନୀୟ ଭାଷାରେ ସୁଢି ଆମ୍ବ କୁହାଯାଏ। ବର୍ତ୍ତମାନ ହାଟ ବଜାରରେ ଏହି ଆମ୍ବର ସ୍ଥାନ କଲମୀ ଆମ୍ବ ନେଇ ଥିବା ବେଳେ ଆଗଭଳି ଦେଶୀ ଆମ୍ବ ମିଳୁନାହିଁ । ଅନ୍ୟପକ୍ଷରେ ଲୋପ ପାଇବାକୁ ବସୁଥିବା ଦେଶୀ ଆମ୍ବର ନିଆରା ଖଟାମିଠା ସ୍ବାଦ, ସ୍ବାସ୍ଥ୍ୟଗତ ଉପାଦେୟତା ଆଦିକୁ ନେଇ ପୁରୁଣା ଲୋକ ମାନେ ଚିନ୍ତାବ୍ୟକ୍ତ କରିଛନ୍ତି।
ଆଗରୁ ବଣଜଙ୍ଗଲ ବ୍ୟତୀତ ପ୍ରତ୍ୟେକ ଗ୍ରାମର ବିଲ, ବାଡିବଗିଚା, ରାସ୍ତାକଡ ରେ ବହୁ ସଂଖ୍ୟାରେ ଦେଶୀ ଆମ୍ବ ଗଛ ଦେଖିବାକୁ ମିଳୁଥିଲା। ସେହିପରି ପ୍ରତ୍ୟେକ ଗ୍ରାମରେ ଆମ୍ବ ତୋଟା ମଧ୍ୟ ଥିଲା। ତେବେ ବିଭିନ୍ନ କାରଣରୁ ଏହି ସବୁ ଆମ୍ବ ତୋଟା ଲୋପ ପାଇବାକୁ ବସିଲାଣି। ଏହା ବଦଳରେ କଲମୀ ଆମ୍ବ ଗଛ ଚାରା ରୋପଣ କରାଯାଉଥିବାରୁ ଏହି ପାରମ୍ପାରିକ ଦେଶୀ ଆମ୍ବ ଧୀରେ ଧୀରେ ଲୋପ ପାଇ ଯିବାକୁ ବସିଛି। ଗାଁର ଲୋକମାନେ ବିଶେଷ କରି ବନବାସୀ ମାନେ ଆମ୍ବ ଋତୁରେ ବଣଜଙ୍ଗଲ, ତୋଟା ତଥା ରାସ୍ତାଘାଟରୁ ଆମ୍ବ ସଂଗ୍ରହ କରି ନିଜେ ଖାଇବା ସହ ହାଟବଜାର ତଥା ରାସ୍ତା କଡରେ ବସି ବିକ୍ରି ଦୁଇ ପଇସା ରୋଜଗାର କରୁଥିଲେ। ସେଥିରେ ତେଲ ଲୁଣ କିଣି ସଂସାର ଚଳାଉଥିଲେ। ବହୁ ଦୂରରୁ ଚାଲି ଚାଲି ବା ଗାଡିରେ ଆମ୍ବ ଓ ଅନ୍ୟାନ୍ୟ ଫଳ ବୋଝ ମୁଣ୍ଡାଇ ଆସି ହାଟ ବଜାରରେ ବା ରସ୍ତା କଡରେ ଯେଉଁ କିଛି ପସରା ମେଲାଇ ସକାଳୁ ସଂଧ୍ୟା ପର୍ଯ୍ୟନ୍ତ ବସି ରହୁ ଥିଲେ ହେଁ ତାହାର ଉପଯୁକ୍ତ ଦର ପାଇପାରୁନାହାଁନ୍ତି। ଆମ୍ବର ସଂରକ୍ଷଣ ପାଇଁ ଆଦିବାସୀ ଅଞ୍ଚଳରେ ଶୀତଳ ଭଣ୍ଡାର ନାହିଁ। ଫଳରେ ପ୍ରତିଦିନ ବହୁ ପରିମାଣରେ ଫଳ ନଷ୍ଟ ହେଉଛି। ଆଦିବାସୀମାନେ ବାଧ୍ୟ ହୋଇ ବିକ୍ରି ନ ହେଲେ ମାଗଣା ବା ବହୁ କମ୍ ମୂଲ୍ୟରେ ଆମ୍ବ ବିକୁଛନ୍ତି କିମ୍ବା ଫିଙ୍ଗି ଦେଇ ଯିବାକୁ ବାଧ୍ୟ ହେଉଛନ୍ତି। ପର୍ଯ୍ୟାପ୍ତ ପରିମାଣରେ କଲମୀ ଆମ୍ବକୁ ସରକାର ପ୍ରୋତ୍ସାହନ ଦେଉଥିବାରୁ ଏହି ଦେଶୀ ଆମ୍ବ ଏବେ ଅଲୋଡା ହୋଇପଡୁଛି।