କେନ୍ଦୁଝର,୧ା୭ (ନରେଶ ଚନ୍ଦ୍ର ପଟ୍ଟନାୟକ/ ଦୀପକ ମିଶ୍ର): କେନ୍ଦୁଝର ସହରରେ ଟ୍ରାଫିକ ସମସ୍ୟା ଗୁରୁତର ହେଉଛି। ବିଶେଷ କରି ରାମ ରାମ ଗଳି ରାସ୍ତାରେ ଦିନକୁ ଦିନ ଟ୍ରାଫିକ ସମସ୍ୟା ବିଗୁଡୁଛି। ଗାଡ଼ି ପାର୍କିଂ ପାଇଁ ସ୍ଥାନ ନ ଥିବାରୁ ଲୋକେ ରାସ୍ତା ଉପରେ ପାର୍କିଂ କରିବାକୁ ବାଧ୍ୟ ହେଉଛନ୍ତି। ସହର ମଧ୍ୟରେ ଭାରିଯାନ ଚଳାଚଳ ପରିସ୍ଥିତିକୁ ଅଧିକ ଜଟିଳ କରିଦେଉଛି। ବିଶେଷକରି ସହର ମଧ୍ୟରେ ଆଳୁ, ପିଆଜ, ଫଳ, ଖାଦ୍ୟ ସାମଗ୍ରୀ ଲୁଗାପଟା ଆଦି ଗୋଦାମ ଘର ଚାଲୁଥିବାରୁ ଏଭଳି ପରିସ୍ଥିତି ସୃଷ୍ଟି ହେଉଛି ବୋଲି ମତପ୍ରକାଶ ପାଉଛି। ଏ ସମ୍ପର୍କରେ କେନ୍ଦୁଝର ପୌରପରିଷଦରେ ଅନେକ ଥର ଅଭିଯୋଗ କଲେ ବି କିଛି ଫଳ ମିଳୁନାହିଁ।
ସୂଚନା ଅନୁଯାୟୀ, ଅଜନ୍ତା ଗଳି, ରାମରାମ ଗଳି ରାସ୍ତାଗୁଡ଼ିକ ବଡ଼ ଟ୍ରକ୍ ଦ୍ୱାରା ଘଣ୍ଟା ଘଣ୍ଟା ଜବରଦଖଲ ହୋଇ ରହୁଛି। ଏଥିପ୍ରତି ପୋଲିସ କିମ୍ବା ପୌର ପ୍ରଶାସନ ପକ୍ଷରୁ ପଦକ୍ଷେପ ନିଆଯାଉ ନ ଥିବାରୁ ଉକ୍ତ ଅଞ୍ଚଳରେ ରହୁଥିବା ସରକାରୀ କର୍ମଚାରୀ ଓ ସାଧାରଣ ଲୋକମାନେ ଅକଥନୀୟ ଯନ୍ତ୍ରଣା ଭୋଗୁଛନ୍ତି। ରାସ୍ତା ଓ ଡ୍ରେନ୍ ଭାଙ୍ଗୁଥିବାରୁ ଲକ୍ଷାଧିକ ଟଙ୍କା କ୍ଷତି ହେବା ସହ ଟ୍ରାଫିକ ଜାମ୍ ହେଉଥିଲେ ହେଁ ପ୍ରଶାସନ ନ ଶୁଣି ଚୁପ୍ ରହୁଛି। ଏଭଳି ପରିସ୍ଥିତିକୁ ନେଇ ଉକ୍ତ ଗଳି ରାସ୍ତା ଗୁଡ଼ିକରେ କିଛି ବର୍ଷ ପୂର୍ବେ ଲୁହା ଗେଟ୍ ଲଗାଯାଇ ଟ୍ରକ୍ ଯାତାୟାତ ବାରଣ କରାଯାଇଥିଲା। ଗୋଦାମ ଘର ସହର ବାହାରେ କରିବା ପାଇଁ କୁହାଯାଇଥିଲା। କିନ୍ତୁ ଇତି ମଧ୍ୟରେ ବହୁ ବର୍ଷ ବିତିଯାଇଥିଲେ ହେଁ ଗୋଦାମ ସ୍ଥାନାନ୍ତର କରାଯାଉନାହିଁ କିମ୍ବା ପୁଣି ଲୁହା ଗେଟ୍ ଲଗାଇ କଟକଣା ଲଗାଯାଉନାହିଁ। ବିଶେଷିକରି ସାପ୍ତାହିକ ହାଟ ଭିଡ଼ ସମୟରେ ତଥା ଅନ୍ୟ ଦିନ ମାନଙ୍କରେ ଦିନ ୯/୧୦ଟା ସମୟରେ ମଧ୍ୟ ଉକ୍ତ ଗଳି ରାସ୍ତାରେ ଟ୍ରକ୍ ଚଳାଚଳ ଏବଂ ପାର୍କିଂ କରାଯାଉଛି। ଫଳରେ ଯାତାୟାତ ସମସ୍ୟା ସୃଷ୍ଟି ହେବା ସହ ପାହାଡ଼ରୁ ଆସି ରାସ୍ତା କଡ଼ରେ ବିକ୍ରି କରୁଥିବା ଆଦିବାସୀ ଓ ଛୋଟ ବେପାରୀମାନଙ୍କୁ ନାଲିଆଖି ଦେଖାଇ ଉଠାଇ ଗାଡ଼ି ଚଳାଚଳ କରାଯାଉଥିବା ଅଭିଯୋଗ ହେଉଛି। ଗଳି ରାସ୍ତା କଡ଼ରେ ଫଳ, ଆଳୁ, ଅନ୍ୟାନ୍ୟ ଖାଉଟି ଦ୍ରବ୍ୟର ଗୋଦାମ ରହିବା ହେତୁ ଦିନରେ ବଡ଼ ବଡ଼ ଟ୍ରକ ଲାଗି ସାମ୍ରୀ ଖାଲି କରାଯାଉଛି। ଫଳରେ ଟ୍ରାଫିକ୍ ସମସ୍ୟା ବଢ଼ୁଛି ବୋଲି ବୁଦ୍ଧିଜୀବୀ ରବିନ୍ଦ୍ର ପାଢ଼ୀ କହିଛନ୍ତି। ରାସ୍ତାର ଦୁଇ ପାଖରେ ଲୁହା ବାର ଲଗାଇ ବାକୁ ଦାବି ହୋଇ ଆସୁଥିଲେ ମଧ୍ୟ କେନ୍ଦୁଝର ଗଡ଼ ପୌରପରିଷଦ କର୍ଣ୍ଣପାତ କରୁ ନ ଥିବା କୁହାଯାଇଛି। ଏ ସମ୍ପର୍କରେ ମ୍ୟୁନିସିପାଲିଟି ଏଜକ୍ୟୁଟିଭ ଅଫିସର ମଧୁସ୍ମିତା ସାମନ୍ତରାୟଙ୍କୁ ପଚାରିବାରୁ ଏ ଦିଗରେ ପଦକ୍ଷେପ ନିଆଯିବ ବୋଲି କହିଛନ୍ତି। ଏନେଇ କେନ୍ଦୁଝରଗଡ଼ ପୌରପାଳିକା ସଂଗ୍ରାମ ବେହେରା କହିଛନ୍ତି, ପୌରପାଳିକା ପକ୍ଷରୁ ପଦକ୍ଷେପ ନେବାକୁ ନିଷ୍ପତ୍ତି ନିଆଯାଇଛି। ଖୁବ୍ ଶୀଘ୍ର ସହର ଓ ଗଳି ରାସ୍ତାରେ ଭାରିଯାନ ଚଳାଚଳ ପାଇଁ ବୋର୍ଡ ବା ଗେଟ୍ ଲଗାଯାଇ କଟକଣା କରାଯିବ। ରାସ୍ତା, ଡ୍ରେନ୍ ଭାଙ୍ଗିଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।