କେନ୍ଦୁଝର,୯।୫(ସ୍ବ.ପ୍ର.): ଆନନ୍ଦପୁର ବନ୍ୟପ୍ରାଣୀ ଡିଭିଜନ ଅଧିନସ୍ଥ ଦେଓଗାଁ ରେଞ୍ଜ ଶଗଡ଼ପଟା ଗ୍ରାମ ନିକଟରେ ଶନିବାର ରାତିରେ ରେଳ ଦୁର୍ଘଟଣା ପରେ ଆହତ ହୋଇଥିବା ହାତୀର ଅବସ୍ଥାରେ ସୁଧାର ହେଉନି। ହାତୀର ଗୋଡ଼ରେ ମାଡ଼ ହୋଇଥିବାରୁ ଠିଆ ହୋଇପାରୁନି। ଏଣୁ ତଳେ ପଡ଼ି ରହିଛି। ଡିଏଫ୍ଓ ଅଜିତ ଶତପଥୀଙ୍କ ତତ୍ତ୍ୱାବଧାନରେ ହାତୀର ଚିକିତ୍ସା କରିବା ସହ ଉଠାଇବାକୁ ଉଦ୍ୟମ କରାଯାଉଛି। ଉକ୍ତ ରାସ୍ତାରେ ସର୍ବଦା ହାତୀମାନେ ଯାତାୟାତ କରିଥାନ୍ତି। ଏଣୁ ସତର୍କତା ଫଳକ ଲାଗିଛି। ଉକ୍ତ ଦନ୍ତା ହାତୀଟି ଦୀର୍ଘଦିନ ହେଲା ଉକ୍ତ ଅଞ୍ଚଳରେ ଏକୁଟିଆ ବୁଲୁଥିବା ଏବଂ ଟ୍ରେନ୍ ଲାଇନ ପାର ହୋଇ ଯାତାୟାତ କରୁଥିଲା। ତେବେ କେଉଁ ପରିପ୍ରେକ୍ଷୀରେ ଦୁର୍ଘଟଣା ଘଟିଲା ତାହା ତଦନ୍ତସାପେକ୍ଷ। ବନ ବିଭାଗ ପକ୍ଷରୁ ହାତୀର ଟ୍ରାକ ରଖିଥିଲେ କି ନାହିଁ ଏବଂ ଉକ୍ତ ସ୍ଥାନରେ ଟ୍ରେନର ବେଗ ତଥା ହର୍ନ ବାଜିଥିଲା କି ନାହିଁ ତଦନ୍ତ ପରେ ଜଣାପଡ଼ିବ।