ଢେଙ୍କାନାଳ ଅଫିସ, ୭।୮: ହାତୀପଲ ପାଇଁ ଅଟକିଲା ବଲାଙ୍ଗୀର-ଭୁବନେଶ୍ୱର ସୁପରଫାଷ୍ଟ ଟ୍ରେନ୍। ଢେଙ୍କାନାଳ ଜିଲା ସଦର ରେଞ୍ଜ ମୋଟଙ୍ଗା ଥାନା ଅଧୀନ ମେରାମଣ୍ଡଳୀ ରେଳଷ୍ଟେଶନ ଏବଂ ହଳଦିଆବାହାଳ ମଝିରେ ଶନିବାର ରାତି ପ୍ରାୟ ୯ଟାରେ ଏହି ଘଟଣା ଘଟିଛି। ଫଳରେ ଟ୍ରେନ୍ ଚଳାଚଳ ଘଣ୍ଟାଏରୁ ଅଧିକ ସମୟ ବିଳମ୍ବିତ ହୋଇଥିଲା। ରାତି ପ୍ରାୟ ୯ଟାରେ ଏକ ପଲରେ ୩୩ ହାତୀ ବ୍ରାହ୍ମଣୀ ନଦୀ ଅବବାହିକାରୁ ରେଳଧାରଣା ପାର ହୋଇ ୫୫ନଂ. ଜାତୀୟ ରାଜପଥ ମୁହଁା ହୋଇଥିଲେ। ରେଳଧାରଣା ଆଖପାଖ ଅଞ୍ଚଳରେ ହାତୀ ଚଳପ୍ରଚଳ କରୁଥିବାରୁ ଦୁର୍ଘଟଣା ଆଶଙ୍କାରେ ବଲାଙ୍ଗୀର-ଭୁବନେଶ୍ୱର ସୁପରଫାଷ୍ଟ ଟ୍ରେନ୍ ଘଣ୍ଟାଏରୁ ଅଧିକ ସମୟ ଧରି ଅଟକି ରହିଥିଲା। ସୂଚନା ପାଇ ସଦର ରେଞ୍ଜର ବିଭୁଦେନ୍ଦୁ ମିଶ୍ର ଓ ବନ କର୍ମଚାରୀ ପହଞ୍ଚତ୍ ହାତୀଙ୍କୁ ଘଉଡ଼ାଇଥିଲେ। ବନ ବିଭାଗ ପକ୍ଷରୁ ସବୁଜ ସଙ୍କେତ ମିଳିବା ପରେ ଟ୍ରେନ୍ ଛାଡ଼ିଥିଲା। ଏ ନେଇ ରେଞ୍ଜର କୁହନ୍ତି, ରେଳଧାରଣରେ ୩୩ ହାତୀ ପାର ହେବା କାରଣରୁ ଟ୍ରେନ୍ ଅଟକି ରହିଥିଲା। ହାତୀପଲ ରେଳଧାରଣା ପାର ହୋଇସାରିଲେଣି। ସେମାନଙ୍କ ଉପରେ ବନ ବିଭାଗ ପକ୍ଷରୁ ନଜର ରଖାଯାଇଛି।