ବିଶ୍ୱରେ ଅନେକ ଦେଶ ରହିଛି। ପ୍ରତ୍ୟେକ ଦେଶରେ ନୀତି ନିୟମ ଭିନ୍ନ ଭିନ୍ନ। ଏମିତି ଏକ ଦେଶ ହେଉଛି ଜାପାନ। ନିଜର ସଂସ୍କୃତିଠାରୁ ଆରମ୍ଭ କରି ଖାଇବା, ପିଇବା, ଟେକ୍ନୋଲୋଜିକୁ ନେଇ ସାରା ଦୁନିଆରେ ବେଶ୍ ପରିଚିତ ଏହି ଦେଶ। ଜାପାନ ଏସିଆର ସବୁଠୁ ବିକଶିତ ଦେଶ ଭାବେ ପରିଗଣିତ। ଏଠାକାର ଲୋକେ ସବୁଠୁ ଅଧିକ କର୍ମଠ। ଏହି ଦେଶ ସହିତ ଜଡ଼ିତ ଆଉ କିଛି ବିଶେଷ ତଥ୍ୟ ସମ୍ପର୍କରେ ଜାଣନ୍ତୁ…
ଜାପାନ ଏକ ପୁରାତନ ଦେଶ। ଏହାର ପରମ୍ପରା, ରୀତିନୀତି ସ୍ବତନ୍ତ୍ର ଅଟେ। ଭାରତ ପରି ଏହି ଦେଶର ଲୋକମାନେ ଦୁଇହାତ ଯୋଡ଼ି ଅଭିବାଦନ ଜଣାଇଥାନ୍ତି। ଏଠାକାର ଯେଉଁ ବ୍ୟକ୍ତି ଯେତେ ପ୍ରତିଷ୍ଠିତ ହୁଅନ୍ତୁନା କାହିଁକି ସମସ୍ତଙ୍କ ସାମ୍ନାରେ ମୁଣ୍ଡ ନୁଆଁଇ ଅଭିବାଦନ ଜଣାଇଥାନ୍ତି। ସବୁଠାରୁ ବଡ଼ କଥା ହେଲା ଏହି ଦେଶରେ ସମୟକୁ ଅଧିକ ଗୁରୁତ୍ୱ ଦିଆଯାଇଥାଏ। ଏଠାକାର ଲୋକେ ବେକାର ନ ହୋଇ ସବୁବେଳେ କିଛି ନା କିଛି କାମରେ ଲାଗିଥାନ୍ତି। ଏପରିକି ଜାପାନର ଟ୍ରେନ୍ ସମୟ ୩୦ ସେକେଣ୍ଡରୁ ଅଧିକ ବିଳମ୍ବ ହୋଇ ନ ଥାଏ। ସଠିକ୍ ସମୟରେ ପ୍ଲାଟ୍ଫର୍ମରେ ଆସି ଲାଗିଥାଏ ଟ୍ରେନ୍।
