ଢେଙ୍କାନାଳ ଅଫିସ,(ରତନ ନାୟାର) ୨୭।୮: ଭାରତର ଗ୍ରାମାଞ୍ଚଳର ଲୋକଙ୍କ ଭିତରେ ରହିଥିବା ଆତ୍ମୀୟତା, ଉତ୍ତମ ବ୍ୟବହାର ସାଙ୍ଗକୁ ଭିନ୍ନଧରଣର ଖାଦ୍ୟପେୟ, ଲୋକକଳା ଏବଂ ପାରମ୍ପରିକ କୁଟୀର ଶିଳ୍ପ ଦେଶବିଦେଶର ପର୍ଯ୍ୟଟକଙ୍କୁ ଟାଣି ଆଣିବାର ସାମର୍ଥ୍ୟ ରଖେ। ଏହାକୁ ନଜରରେ ରଖି ଗ୍ରାମୀଣ ପର୍ଯ୍ୟଟନ (ରୁରାଲ୍ ଟୁରିଜମ୍) ଉପରେ ଦୃଷ୍ଟି ନିବଦ୍ଧ କରିଛି ସରକାର, ଯାହା ବାରିହୋଇପଡୁଛି ଢେଙ୍କାନାଳ ଜିଲାର ଡୋକ୍ରା ଶିଳ୍ପୀଙ୍କ ଗାଁ ନବଜୀବନପୁର (ସଦେଇବେରେଣୀ)ରୁ। ରୁରାଲ ଟୁରିଜମରେ ଯୋଡ଼ିହେବା ପରେ ଏହି ଗାଁ ନୂଆ ରୂପରେ ଝଲସୁଛି। ପର୍ଯ୍ୟଟକଙ୍କ ଆଗମନ ହେଲେ ବିଦେଶୀ ପୁଞ୍ଜି ପ୍ରବାହ ସହ ପାରମ୍ପରିକ ଡୋକ୍ରା ହସ୍ତଶିଳ୍ପ ସ୍ବତନ୍ତ୍ର ପରିଚୟ ପାଇବ ବୋଲି ଆଶାବାଦୀ ଅଛନ୍ତି ଅଞ୍ଚଳର ଶିଳ୍ପୀ ପରିବାର।
ଢେଙ୍କାନାଳ ଜିଲାର ଗ୍ରାମୀଣ ପର୍ଯ୍ୟଟନକୁ ବଳ ଯୋଗାଇବାକୁ ସଦର ବ୍ଲକ ସପ୍ତଶଯ୍ୟାକୁ ଆକର୍ଷଣୀୟ କରିବା ପାଇଁ ପଦକ୍ଷେପ ନେଇଥିଲେ ସରକାର। ଫୋକସ୍ରେ ରହିଥିଲା ପ୍ରସିଦ୍ଧ ଡୋକ୍ରା ହସ୍ତଶିଳ୍ପୀଙ୍କ ଗାଁ ନବଜୀବନପୁର। ୨୦୧୬-୧୭ ଆର୍ଥିକ ବର୍ଷରେ ତତ୍କାଳୀନ ଜିଲାପାଳ ରୂପାରୋଶନ ସାହୁଙ୍କ ପ୍ରସ୍ତାବ କ୍ରମେ ଏଠାରେ ଆରମ୍ଭ ହୋଇଥିଲା ଉନ୍ନୟନ କାର୍ଯ୍ୟ। ଏଥିଲାଗି ପ୍ରଥମ ପର୍ଯ୍ୟାୟରେ ୩ କୋଟି ଏବଂ ଦ୍ୱିତୀୟ ପର୍ଯ୍ୟାୟରେ ମଞ୍ଜୁର ହୋଇଥିଲା ୨ କୋଟି ଟଙ୍କା। ପ୍ରାକୃତିକ ପରିବେଶ ପାଇଁ ସପ୍ତଶଯ୍ୟା ଦେଶବିଦେଶରେ ସୁନାମ ଅର୍ଜନ କରିଥିବାବେଳେ ନବଜୀବନପୁରରେ ପର୍ଯ୍ୟଟକ ଅନୁକୂଳ ବାତାବରଣ ତିଆରି କରିବାକୁ ଦିଆଯାଇଥିଲା ଗୁରୁତ୍ୱ, ଯାହା ସାକାର ରୂପ ନେଇଛି। ଅନୁଦାନ ମିଳିଥିବା ୫ କୋଟି ଟଙ୍କାରେ ମୁଖଶାଳା, ଡୋକ୍ରା କାରିଗରମାନେ ହସ୍ତଶିଳ୍ପ ନିର୍ମାଣ ଲାଗି ଏକ ହଲ୍, ସାମଗ୍ରୀ ବିକ୍ରୟ କେନ୍ଦ୍ର, ପ୍ରଦର୍ଶନୀ ହଲ୍, ବୈଠକଖାନା, ପର୍ଯ୍ୟଟକ ରହଣି ସ୍ଥଳ ନିର୍ମାଣ କରାଯାଇଛି। ପ୍ରକଳ୍ପ ରକ୍ଷଣାବେକ୍ଷଣ ଦାୟିତ୍ୱ ପଞ୍ଚାୟତକୁ ପ୍ରଦାନ କରାଯାଇଛି। ଇତିମଧ୍ୟରେ ପାଖାପାଖି ସମସ୍ତ କାମ ଶେଷ ହୋଇସାରିଥିବାବେଳେ ପର୍ଯ୍ୟଟକଙ୍କ ଅପେକ୍ଷାରେ ରହିଛି ଏହି ଶିଳ୍ପୀ ଗ୍ରାମ। କରୋନା କଟକଣା ହଟିବା ପରେ ନବଜୀବନପୁର ନୂଆ ଅଧ୍ୟାୟ ସୃଷ୍ଟି କରିବ ବୋଲି ଆଶାପ୍ରକାଶ ପାଇଛି।
ସୂଚନାଯୋଗ୍ୟ, ନବଜୀବନପୁର ଅଞ୍ଚଳରେ ୧୨୦ ଡୋକ୍ରା ଶିଳ୍ପୀ ରହୁଛନ୍ତି। ସେମାନଙ୍କ ମଧ୍ୟରୁ କେତେଜଣ ଗ୍ରାମରେ ହସ୍ତଶିଳ୍ପ ନିର୍ମାଣ କରୁଛନ୍ତି। ଅନ୍ୟ କେତେକ ପରିବାର ସପ୍ତଶଯ୍ୟା ପାହାଡ଼ ପାଦଦେଶକୁ ଉଠିଯାଇ ଡୋକ୍ରା କଳାକୃତି ଗଢୁଛନ୍ତି। ଏହି ଦୁଇଗୋଷ୍ଠୀଙ୍କୁ ଏକାଠି କରାଗଲେ ଡୋକ୍ରା ଶିଳ୍ପର ବିକାଶ ହୋଇପାରିବ ବୋଲି ବୁଦ୍ଧିଜୀବୀମାନେ ମତବ୍ୟକ୍ତ କରିଛନ୍ତି।
ପର୍ଯ୍ୟଟକ ଆସିଲେ ସଫଳତା ଜଣାପଡ଼ିବ
ଗ୍ରାମୀଣ ପର୍ଯ୍ୟଟନର ବିକାଶ ଲାଗି ମଞ୍ଜୁର ହୋଇଥିବା ଅନୁଦାନରେ ସମସ୍ତ କାର୍ଯ୍ୟ ଶେଷ ହୋଇଛି। ଶିଳ୍ପୀଗ୍ରାମ ନବଜୀବନପୁର ଏବେ ପର୍ଯ୍ୟଟକଙ୍କୁ ଅପେକ୍ଷା କରିଛି। ଆଗନ୍ତୁକ ଆସିବା ପରେ ପ୍ରକଳ୍ପର ସଫଳତା ଜଣାପଡ଼ିବ।
-ଜେଶସ ସାହୁ, ସପ୍ତଶଯ୍ୟା ସରପଞ୍ଚ
ଭିନ୍ନ ଅନୁଭୂତି ସାଉଁଟିବେ ଆଗନ୍ତୁକ
ଢେଙ୍କାନାଳ ଜିଲାକୁ ପ୍ରତିବର୍ଷ ହଜାର ହଜାର ସଂଖ୍ୟାରେ ପର୍ଯ୍ୟଟକ ଆସିଥାନ୍ତି। ରୁରାଲ ଟୁରିଜମରେ ଯୋଡ଼ି ହୋଇଥିବା ନବଜୀବନପୁର ସେମାନଙ୍କୁ ଭିନ୍ନ ଅନୁଭୂତି ଦେବ। ଏଥିଲାଗି ସମସ୍ତ ବ୍ୟବସ୍ଥା କରାଯାଇଛି।
-ନରୋତ୍ତମ ବେହେରା, ପିଡି ଡିଆର୍ଡିଏ
ପ୍ରକଳ୍ପକୁ ବ୍ୟାପକ କରାଯିବ
ନବଜୀବନପୁରରେ ହୋଇଥିବା ସମସ୍ତ ପର୍ଯ୍ୟଟନ ସମ୍ପର୍କିତ ପ୍ରକଳ୍ପର ରକ୍ଷଣାବେକ୍ଷଣା ଦାୟିତ୍ୱ ପଞ୍ଚାୟତକୁ ହସ୍ତାନ୍ତର କରାଯାଇଛି। କରୋନା ସ୍ଥିତି ସୁଧୁରିବା ପରେ ପର୍ଯ୍ୟଟକଙ୍କ ଆଗମନକୁ ଲକ୍ଷ୍ୟ କରି ଆବଶ୍ୟକ ପଡ଼ିଲେ ପ୍ରକଳ୍ପକୁ ବ୍ୟାପକ କରାଯିବ।
-ଭୂମେଶ ଚନ୍ଦ୍ର ବେହେରା, ଜିଲାପାଳ
