ଦଶପଲ୍ଲା,୩ା୧(ଡି.ଏନ୍.ଏ.): ପୁରୀରେ ଶ୍ରୀଜୀଉମାନଙ୍କ ରଥ ନିର୍ମାଣ ପାଇଁ ଆବଶ୍ୟକ କାଠ ନୟାଗଡ ଜିଲା ଦଶପଲ୍ଲା ବନାଞ୍ଚଳରୁ ଯୋଗାଇ ଦିଆଯିବାର ବିଧି ରହିଛି। ସେଥିପାଇଁ ଶ୍ରୀମନ୍ଦିର ପଞ୍ଜିକାରଙ୍କ ଗଣନା ଆଧାରରେ ଦିନ, ବାର, ସମୟ ସ୍ଥିର ହେବା ପରେ ପ୍ରସ୍ତୁତି ଆରମ୍ଭ ହୁଏ। ତଦନୁଯାୟୀ ଚଳିତବର୍ଷ ଆସନ୍ତା ୧୨ତାରିଖ ମଙ୍ଗଳବାର ଗଛ କଟା ଅନୁକୂଳ କରାଯିବ। ପରମ୍ପରା ଅନୁଯାୟୀ ଶ୍ରୀମନ୍ଦିରରୁ ନୀତିପ୍ରଶାସକଙ୍କ ସହ ଏକ ଦଳ ପ୍ରଭୁଙ୍କ ଆଜ୍ଞାମାଳ, ପାଟପତନୀ, ଖଣ୍ଡୁଆ, ମହାପ୍ରସାଦ ନେଇ ନୟାଗଡ଼ରେ ପହଞ୍ଚିବା ପରେ ତାଙ୍କୁ ପାଛୋଟି ଆଣି ଅତିଥି ଶାଳାରେ ରଖାଯିବ। ତା’ପରଦିନ ପ୍ରତ୍ୟୁଷରୁ ଗଣିଆ ବ୍ଲକ ଛାମୁଣ୍ଡିଆ ପଞ୍ଚାୟତ ବେଠିଆସାହି ଶ୍ରୀଜଗନ୍ନାଥଙ୍କ ମନ୍ଦିରରେ ପହଞ୍ଚି ପୂଜାର୍ଚ୍ଚନା କରି ମା’ବଡରାଉଳଙ୍କ ପୀଠକୁ ଯିବେ। ସେଠାରେ ଶ୍ରୀଜୀଉଙ୍କ ଆଜ୍ଞାମାଳ ଆଦି ସମର୍ପଣ ସହ ହୋମ କରାଯିବ। ପରେ ମହାରଣା ସେବକ ଗଛ ଚିହ୍ନଟ କରି ପ୍ରଥମ ଚୋଟ ଦେବା ପରେ କାଠ କଟା ଆରମ୍ଭ ହେବ। ଏହି ନୀତିକୁ ଦର୍ଶନ କରିବାକୁ ଶତାଧିକ ଗ୍ରାମବାସୀ ଏକାଠି ହୋଇଥାନ୍ତି। ଗଛ କଟା ସମୟରେ ଶ୍ରଦ୍ଧାଳୁଙ୍କ ହରିବେଲ, ହୁଳହୁଳିରେ ସେହି ଅଞ୍ଚଳ ପ୍ରକମ୍ପିତ ହୋଇଉଠିଥାଏ।