କେସିଙ୍ଗା,୨୯ା୫(ଡି.ଏନ୍.ଏ.): କଳାହାଣ୍ଡି ଜିଲା କେସିଙ୍ଗା ବ୍ଲକର କଶ୍ରୁପଡ଼ା ପଞ୍ଚାୟତ ଅଧିନସ୍ଥ ବିନେକେଲା ଗ୍ରାମର ଜଣେ ବୃଦ୍ଧଙ୍କର କାଳବୈଶାଖୀରେ ମୃତ୍ୟୁ ଘଟି ଥିବା ବେଳେ ବହୁ ଗଛ ପଡ଼ି ରାସ୍ତା ଅବରୋଧ ହୋଇଥିଲା। ମୃତକ ଜଣକ ହେଲେ ବିନେକେଲା ଗ୍ରାମର ଜୟ ରାମ ହରପାଳ (୭୫)। ସେ ଛେଳି ଚରାଇବାକୁ ଯାଇ ଥିଲେ। ହଠାତ୍ କାଳବୈଶାଖୀ ଆସିବାରୁ ଏକ ଘରେ ଆଶ୍ରୟ ନେଇ ଥିଲେ। ବର୍ଷା ଓ କାଳବୈଶାଖୀ ପ୍ରଭାବରେ ଘରର କାନ୍ଥ ପଡ଼ି ଜୟରାମଙ୍କ ମୃତ୍ୟୁ ଘଟିଥିଲା। ଏହି ପଞ୍ଚାୟତର ଅନେକ ଜାଗାରେ ଗଛ ପଡ଼ି ଯାଇ ରାସ୍ତା ଅବରୋଧ ହୋଇଥିଲା କସୁରପଡ଼ା ନୂତନ ଅମୃତଧାରାରେ ତେନ୍ତୁଳି ଗଛ ପଡ଼ିଯିବାରୁ ଭାଙ୍ଗି ନଷ୍ଟ ହୋଇଛି। ପଞ୍ଚାୟତର ଷ୍ଟ୍ରିଟ୍ଲାଇଟ୍ ଭାଙ୍ଗି ଯାଇଛି। କେସିଙ୍ଗା ଅଗ୍ନିଶମ ବିଭାଗର କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ଗଛ କାଟି ସଫା କରିଥିଲେ।
