ବରଗଡ଼ ଅଫିସ୍,୧୨।୩ ବରଗଡ଼ ଜିଲାର ବିଭିନ୍ନ ସ୍ଥାନରେ ଶନିବାର ଭୋର୍ରୁ କାଳବୈଶାଖୀ ପ୍ରଭାବ ଦେଖିବାକୁ ମିଳିଛି। ଭୋର୍ ୫ଟାରୁ ଝଡ଼ବର୍ଷା ହୋଇ ପ୍ରାୟ ୪୫ ମିନିଟ୍ ଧରି ଲାଗି ରହିଥିଲା। ପ୍ରବଳ ବେଗରେ ପବନ ବହିବାରୁ ବରଗଡ଼ ସହର ଉପକଣ୍ଠ ଘୁଲିପାଲି ସମେତ ଅନେକ ସ୍ଥାନରେ ଗଛ ଡାଳ ଭାଙ୍ଗି ରାସ୍ତାରେ ପଡିବାରୁ ଯାତାୟାତ ବାଧାପ୍ରାପ୍ତ ହୋଇଥିଲା। ସେହିପରି କିଛି ଜାଗାରେ ବିଦ୍ୟୁତ୍ ତାର ଓହଳି ପଡ଼ିବା ସହିତ ଛିଣ୍ଡି ଯାଇଥିଲା। ଫଳରେ ବିଦ୍ୟୁତ ସରବରାହ ଦୀର୍ଘ ସମୟ ଧରି ବନ୍ଦ ରହିଥିଲା। ବର୍ଷା ଲାଗି ରହିବାରୁ ବରଗଡ଼ ସରକାରୀ ବସ୍ଷ୍ଟାଣ୍ଡ ସମେତ ବିଭିନ୍ନ ସ୍ଥାନ ଜଳାର୍ଣ୍ଣବ ହୋଇପଡ଼ିଥିବା ବେଳେ ମଇଳା, ଆବର୍ଜନାରେ ରାସ୍ତାଘାଟ ପୂରି ରହିଥିଲା।
ଏଥର ଅନୁକୁଳ ପାଗ ଯୋଗୁ ଆମ୍ବ ବଉଳ ଭଲ ହୋଇଥିଲା। କେତେକ ଗଛରେ ଆମ୍ବକଷି (ଫଳ) ମଧ୍ୟ ହୋଇଥିଲା। କାଳବୈଶାଖୀ ଯୋଗୁ ତାହା ଝଡିପଡିଛି। ମହୁଲ ଗଛ ଗୁଡ଼ିକରେ ମଧ୍ୟ ଅନୁରୂପ ସ୍ଥିତି ପରିଲକ୍ଷିତ ହୋଇଛି। ଏଭଳି ପାଗ ଲାଗି ରହିଲେ ମହୁଲ ସଂଗ୍ରହ ଯଥେଷ୍ଟ ହ୍ରାସ ପାଇବ ବୋଲି ଆଶଙ୍କା ପ୍ରକାଶ ପାଇଛି । ଫଳରେ ଆମ୍ବଚାଷୀ, ମହୁଲ ସଂଗ୍ରହକାରୀଙ୍କୁ ଏବେଠାରୁ ହତାଶ ହେବାକୁ ପଡ଼ିଛି। ଝଡ଼ବର୍ଷାରେ ପରିବା ଚାଷ ପ୍ରଭାବିତ ହୋଇଥିବା ଚାଷୀମାନେ କହିଛନ୍ତି। ପଦ୍ମପୁର ଉପଖଣ୍ଡରେ ଶନିବାର ଭୋରରୁ କାଳବୈଶାଖୀର ପ୍ରଭାବ ସେତେ ଅନୁଭୂତ ହୋଇ ନ ଥିଲା। ସାମାନ୍ୟ ପବନ ବହିଥିବାବେଳେ ଉକ୍ତ ଅଞ୍ଚଳରେ ବର୍ଷା ହୋଇ ନ ଥିଲା। ଫଳରେ ସମ୍ପୃକ୍ତ ଅଞ୍ଚଳର ମଣ୍ଡି ଗୁଡ଼ିକର ଖୋଲା ଆକାଶତଳେ ପଡ଼ିଥିବା ଲକ୍ଷାଧିକ କୁଇଣ୍ଟାଲ ଧାନ ଝଡ଼ବର୍ଷା ଦାଉରୁ ରକ୍ଷା ପାଇଯାଇଛି। କିନ୍ତୁ ଝଡ଼ବର୍ଷା ସମ୍ଭାବନା ଟଳି ନ ଥିବାରୁ ସମ୍ପୃକ୍ତ ଅଞ୍ଚଳରେ ବର୍ଷା ହେଲେ ଚାଷୀଙ୍କ ଧାନ ଉଜୁଡ଼ି ଯିବା ଆଶଙ୍କା ରହିଛି। ଧାନ ଉଠାଣ ଦାବିରେ ପଦ୍ମପୁରରେ ଚାଷୀଙ୍କ ଆନ୍ଦୋଳନ ୩୧ଦିନରେ ପହଞ୍ଚି ଥିବା ବେଳେ ଏପର୍ଯ୍ୟନ୍ତ ସରକାରୀ କଳ ଏବଂ ପ୍ରଶାସନ ସେ ଦିଗରେ ଠୋସ୍ ପଦକ୍ଷେପ ନେଇନାହିଁ। ଆଗକୁ ପୁଣି କାଳବୈଶାଖୀ ସମ୍ଭାବନା ଥିବାରୁ ଝଡ଼ବର୍ଷା ପୂର୍ବରୁ ମଣ୍ଡିରେ ପଡ଼ିଥିବା ଧାନକୁ ଉଠାଇବା ପାଇଁ ଚାଷୀମାନେ ଦାବି କରିଛନ୍ତି।