ଜେରୁଜେଲମ୍, ୧।୪: ମଣିଷ ଭାବପ୍ରବଣ ହେଲେ ପରିବାର ଲୋକ କିମ୍ବା ପ୍ରିୟଜନମାନଙ୍କୁ ନିଜ ଅନୁଭୂତି ସମ୍ପର୍କରେ ଜଣାଇଥାଏ, ଯାହା ଦ୍ୱାରା ମନ କିଛିମାତ୍ରାରେ ହାଲୁକା ହୁଏ। ଠିକ୍ ଏମିତି କିଛି ଉଦ୍ଭିଦଙ୍କ କ୍ଷେତ୍ରରେ ମଧ୍ୟ ଘଟିଥାଏ। ଅବସାଦରେ ଗଛ ମଧ୍ୟ କାନ୍ଦେ। ଏହି ସମୟରେ ଗଛରୁ ଏକ ସ୍ବତନ୍ତ୍ର ପ୍ରକାର ଶବ୍ଦ ବାହାରେ, ଯାହା ଫଳରେ କୌଣସି କାରଣରୁ ଗଛ ଆଘାତ ପାଇଥିବା ଜାଣିହୁଏ। ଇସ୍ରାଏଲସ୍ଥିତ ଟେଲ୍ ଅଭିଭ୍ ୟୁନିଭର୍ସିଟିର ଗବେଷକମାନଙ୍କ ଦ୍ୱାରା କରାଯାଇଥିବା ଅଧ୍ୟୟନରୁ ଏହା ଜଣାପଡ଼ିଛି।
ଅବସାଦ ସମୟରେ ଗଛ କିପରି ବ୍ୟବହାର କରେ ସେ ସମ୍ପର୍କରେ କିଛିଦିନ ପୂର୍ବେ ଏକ ଅଧ୍ୟୟନ କରାଯାଇଥିଲା। ଗଛରେ କମ୍ପନ (ଭାଇବ୍ରେଶନ୍) ସୃଷ୍ଟି ହେଉଥିବା ନେଇ ଗବେଷକମାନେ ଜାଣିବାକୁ
ଅବସାଦରେ ଗଛ ….
ପାଇଥିଲେ। ଗଛ ଦୋହଲିବା ଦ୍ୱାରା ଶବ୍ଦ ତରଙ୍ଗ ସୃଷ୍ଟି ହେବା ଯୁକ୍ତିକୁ ନେଇ ଗବେଷକଙ୍କ ପକ୍ଷରୁ ଆଉ ଏକ ଅଧ୍ୟୟନ ଆରମ୍ଭ କରାଯାଇଥିଲା। ସବୁଜଗୃହର ବିଲାତି ଓ ଗୁଆଗଛକୁ ନେଇ କରାଯାଇଥିବା ଅଧ୍ୟୟନ ଅନୁସାରେ, ଅବସାଦ ସମୟରେ ଗଛରୁ ଏୟାରବର୍ନ ଅଲ୍ଟ୍ରାସୋନିକ୍ ସାଉଣ୍ଡ ବାହାରେ, ଯାହାକୁ ଗଛ କାନ୍ଦେ ବୋଲି କୁହାଯାଉଛି। ପ୍ରତ୍ୟେକ ଗଛ ପାଇଁ ଅବସାଦର କାରଣ ଭିନ୍ନ ହୋଇଥିବାବେଳେ ପ୍ରତ୍ୟେକର ଶବ୍ଦ ଅଲଗା ହୋଇଥାଏ। ତେବେ ଏହି ଶବ୍ଦ ଅତି ଧୀର ହେବାଯୋଗୁ, ଯାହା ମଣିଷ ଶୁଣିପାରେ ନାହିଁ। କିନ୍ତୁ ଗଛର କାନ୍ଦକୁ ବାଦୁଡ଼ି, ମୂଷା ଓ ପୋକଜୋକ ଶୁଣିପାରନ୍ତି ବୋଲି ଗବେଷକମାନେ ଦାବି କରିଛନ୍ତି। ୧୬ କିଲୋହର୍ଜ ପର୍ଯ୍ୟନ୍ତ ଫ୍ରିକ୍ୱେନ୍ସି ଶବ୍ଦକୁ ମଣିଷ ଶୁଣିବା ପାଇଁ ସକ୍ଷମ।
ଗଛରୁ ବାହାରୁଥିବା ଶବ୍ଦକୁ ରେକର୍ଡ କରିବା ପାଇଁ ପ୍ରତିଗଛର ୧୦ ସେଣ୍ଟିମିଟର ଦୂରରେ ଅଲ୍ଟ୍ରାସୋନିକ୍ ମାଇକ୍ରୋଫୋନ ଲଗାଯାଇଥିଲା। ସଂଗୃହୀତ ଶବ୍ଦର ଫ୍ରିକ୍ୱେନ୍ସି ୨୦ରୁ ୨୫୦ କିଲୋହର୍ଜ ରହିଛି। କାନ୍ଦକୁ ମାପିବା ପାଇଁ ବିଶେଷପ୍ରକାର ଆର୍ଟିଫିସିଆଲ ଇଣ୍ଟେଲଜେନ୍ସ (ଏଆଇ) ଆଲଗୋରିଦିମ୍ର ବ୍ୟବହାର କରାଯାଇଥିଲା। ଅଧିକ ଅବସାଦଗ୍ରସ୍ତ ଗଛ ଅଧିକମାତ୍ରାରେ ଶବ୍ଦ ବାହାର କରେ। ଜଳ ପାଇଁ କିମ୍ବା କୌଣସି କାରଣରୁ ଆଘାତ ପାଇଥିବା ଉଦ୍ଭିଦ ଘଣ୍ଟା ପ୍ରତି ଡଜନ୍ରୁ ଅଧିକ ଥର ଶବ୍ଦ କରନ୍ତି ବୋଲି ଗବେଷକ ଲିଲାଚ ହାଦାନି କହିଛନ୍ତି। ଜଳକୁ ନେଇ ଗଛଙ୍କଠାରେ ଦେଖାଯାଉଥିବା ଅବସାଦକୁ ରୋକିହେବ। ସେନ୍ସରର ପ୍ରୟୋଗ ଦ୍ୱାରା ଗଛ କେତେବେଳେ ଜଳ ଦରକାର କରୁଛି ତାହା ସହଜରରେ ଜାଣିହେବ। ତେବେ ଏହା କୃଷି କ୍ଷେତ୍ରରେ ଉପଯୋଗୀ ସାବ୍ୟସ୍ତ ହେବ, ଯାହା ଦ୍ୱାରା ଜଳ ଅପଚୟ ମଧ୍ୟ ରୋକି ହେବ।