ବରୀ,୨୩ା୭(ଡି.ଏନ.ଏ.): ବରୀ ବ୍ଲକ ଅଞ୍ଚଳର ବିଭିନ୍ନ ସ୍ଥାନରୁ ବେଧଡ଼କଭାବେ ଗଛକଟା ଚାଲିଛି। ହେଲେ ଏଦିଗରେ ପ୍ରଶାସନ ପକ୍ଷରୁ କୌଣସି ପଦକ୍ଷେପ ନିଆଯାଉନାହିଁ। ଯାହାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ଗୁରୁବାର ବରୀ କଳାମାଟିଆ ପୂର୍ତ୍ତବିଭାଗ ରାସ୍ତାକୁ ସଂଯୋଗ କରୁଥିବା ବରୀ-ବାଲିବିଲି ଗ୍ରାମ୍ୟ ଉନ୍ନୟନ ରାସ୍ତା କଡ଼ରୁ ୟୁକାଲପଟାସ ଗଛ କଟାଯାଇ ଚାଲାଣ କରାଯାଇଛି। ତେବେ ଏନେଇ ସ୍ଥାନୀୟ ଲୋକେ ବରୀ ତହସିଲଦାର ମାନସ ରଞ୍ଜନ ଭୋଇଙ୍କୁ ଜଣାଇଥିଲେ। ସେ ଘଟଣାସ୍ଥଳରେ ପହଞ୍ଚତ୍ ଏହା ବନ ବିଭାଗର ଦାୟିତ୍ୱ। ତାଙ୍କୁ ଏ ବିଷୟରେ ପତ୍ର ମାଧ୍ୟମରେ ଅବଗତ କରାଇବି ବୋଲି କହି ଫେରି ଆସିଥିଲେ। ତହସିଲଦାରଙ୍କ ମନ୍ତବ୍ୟକୁ ନାପସନ୍ଦ କରାଯାଇଛି। ଏସମ୍ପର୍କରେ ଯାଜପୁର ରୋଡ୍ ବନବିଭାଗ ରେଞ୍ଜର ଜ୍ୟୋତି ମହାପାତ୍ର କହିଛନ୍ତି, ଗଛଗୁଡ଼ିକ ଯେଉଁ ବିଭାଗ ରାସ୍ତା କଡ଼ରେ ରହିଛି ସେମାନେ ଅଭିଯୋଗ କଲେ ଆମେ କାର୍ଯ୍ୟାନୁଷ୍ଠାନ ଗ୍ରହଣ କରିବୁ। ଅଭିଯୋଗ ନ ଆସିଲେ ପଦକ୍ଷେପ ନେଇ ପାରିବୁ ନାହୁଁ। ପ୍ରକାଶଯୋଗ୍ୟ, ବିଗତ ଦିନରେ ବରୀ-ବରୁହଁ। ପୂର୍ତ୍ତ ବିଭାଗ ରାସ୍ତା କଡ଼ରୁ ବେଆଇନ ଗଛ କଟା ଯିବା ଘଟଣାକୁ ନେଇ ବରୀ ଭାଜପା ପକ୍ଷରୁ ତହସିଲ କାର୍ଯ୍ୟାଳୟ ଘେରାଉ କରାଯାଇଥିଲା। ତହସିଲଦାର ଯାଜପୁର ଉପଜିଲାପାଳ ଓ ବନ ବିଭାଗକୁ ଚିଠି ଲେଖି କାର୍ଯ୍ୟାନୁଷ୍ଠାନ ନିମନ୍ତେ ନିବେଦନ କରିଥିଲେ। ହେଲେ ଏ ପର୍ଯ୍ୟନ୍ତ ଗଛକାଟି ଥିବା ବ୍ୟକ୍ତିଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ।