ଉମରକୋଟ, ୨୫।୫(ସ୍ବ.ପ୍ର.) ଉମରକୋଟ ବ୍ଲକ ଭାସ୍କେଲ ଡ୍ୟାମ୍ ନିକଟରେ ଏକ ନଳକୂପ ଟ୍ରକ୍ ଓଲଟିବା ଫଳରେ ଟ୍ରକ୍ ଡ୍ରାଇଭର ଖାଣ୍ଡା ଗ୍ରାମର ଦୀନାକର ନେତାମ ଗୁରୁତର ଅଛନ୍ତି। ଟ୍ରକ୍ରେ କାମ କରୁଥିବା ପ୍ରାୟ ୫ ଜଣ ଶ୍ରମିକ ଟ୍ରକ୍ରୁ ଡେଇଁ ନିଜ ଜୀବନ ବଞ୍ଚାଇବାରେ ସଫଳ ହେଇଛନ୍ତି।
ସୂଚନାନୁଯାୟୀ, ବୁଧବାର ମଧ୍ୟରାତ୍ରିରେ ଡ୍ୟାମ୍ ଅଞ୍ଚଳରେ ଯାନବାହନ ପ୍ରବେଶ ନିଷେଦ୍ଧ ଥିଲେ ମଧ୍ୟ ଏହି ଟ୍ରକ୍ଟି ଭିତରେ ପ୍ରବେଶ କରିଥିଲା। ୪୦ ଫୁଟ ଉପରକୁ ଯିବାପରେ ରାସ୍ତା ଉପରେ ଲୋକେ ମକା ଶୁଖାଇଥିବା ଦେଖି ଡ୍ରାଇଭର ଟ୍ରକ୍କୁ ପଛକୁ ତଳ ରାସ୍ତାକୁ ଖସାଇବାକୁ ଚେଷ୍ଟା କରିଥିଲେ। ଭାରସାମ୍ୟ ହରାଇ ଗାଡ଼ିଟି ଡ୍ୟାମ୍ ଗାର୍ଡୱାଲ ଭାଙ୍ଗି ପ୍ରାୟ ୪୦ ଫୁଟ ତଳକୁ ଖସି ପଡ଼ିଥିଲା। ଦୁର୍ଘଟଣା ଯୋଗୁ ଡ୍ୟାମ୍ର ପ୍ରାୟ ୧୪ ଫୁଟ୍ ଗାର୍ଡ ୱାଲ ଭାଙ୍ଗିଯାଇଥିବା ଡ୍ୟାମ ଏସ୍ଡିଓ ରେଣୁକା ଠାକୁର ସୂଚନା ଦେଇଛନ୍ତି। ଦୁର୍ଘଟଣା ପରେ ଡ୍ରାଇଭରଙ୍କୁ ନିକଟସ୍ଥ ପୂଜାରୀଗୁଡା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି। ଏ ନେଇ ଏସ୍ଡିଓ ରେଣୁକା ଠାକୁରଙ୍କୁ ପଚାରିବାରୁ ଉମରକୋଟ ଥାନାରେ ଏତଲା ଦିଆଯାଇଛି। ବିଭାଗ ପକ୍ଷରୁ ସ୍ଥାୟୀ ଜଗୁଆଳି ନ ଥିବାରୁ ନିଷିଦ୍ଧାଞ୍ଚଳରେ ବଡ଼ ବଡ଼ ଯାନବାହନ ପ୍ରବେଶ କରୁଛି ବୋଲି ସେ କହିଛନ୍ତି।
