ସୁନ୍ଦରଗଡ଼,୨୧।୯(ଡି.ଏନ.ଏ.):ସୁନ୍ଦରଗଡ଼ ଅର୍ଥନୀତିରେ ଏକ ପ୍ରମୁଖ ଭୂମିକା ଗ୍ରହଣ କରେ କୋଇଲା ପରିବହନ। ସୁନ୍ଦରଗଡ ଜିଲା ହେମଗିରି ବ୍ଲକସ୍ଥିତ ବସୁନ୍ଧରା ଅଞ୍ଚଳରେ ଥିବା ଖଣି ଏସିଆ ମହାଦେଶର ସର୍ବବୃହତ୍ କୋଇଲା ଖଣି। ଏହି ଖଣିରୁ ବେଦାନ୍ତ, ହିଣ୍ଡାଲକୋ ଇତ୍ୟାଦି ଶିଳ୍ପସଂସ୍ଥାଗୁଡ଼ିକୁ କୋଇଲା ପରିବହନ କରାଯାଇଥାଏ। ଏହି କୋଇଲା ପରିବହନ ଦ୍ୱାରା ସୁନ୍ଦରଗଡ଼ର ଅନେକ ବ୍ୟକ୍ତି ରୋଜଗାରକ୍ଷମ ହୋଇପାରିଛନ୍ତି। ଏହି ପରିପ୍ରେକ୍ଷୀରେ ଜୟ ଜଗନ୍ନାଥ ଟ୍ରକ ମାଲିକ ସଂଘ, ସୁନ୍ଦରଗଡ ଟ୍ରକ ମାଲିକ ସଂଘ ଓ ବିସ୍ଥାପିତ ଟ୍ରକ ମାଲିକ ସଂଘ ଏକତ୍ରିତ ହୋଇ ସମସ୍ତ ଟ୍ରକ ମାଲିକଙ୍କ ସ୍ବାର୍ଥ ସାଧନ ପାଇଁ ସମନ୍ବିତ କୋଇଲା ଟ୍ରକ ମାଲିକ ସଂଘ ଗଠନ କରାଯାଇଥିଲା। କୋଇଲା ପରିବହନ ସମ୍ବନ୍ଧୀୟ ସମସ୍ତ ନିଷ୍ପତ୍ତି ଏହି ସଂଘ ଦ୍ୱାରା ନେବାକୁ ସ୍ଥିରୀକୃତ ହୋଇଥିଲା। ମାତ୍ର ପ୍ରଶାସନ ଉପସ୍ଥିତିରେ ଦୁଇ ଥର ଭଡା ବୃଦ୍ଧି ପ୍ରସଙ୍ଗରେ ବୈଠକ ହୋଇଥିଲା ା
ଏହି ସମୟରେ ଜୟ ଜଗନ୍ନାଥ ଟ୍ରକ ମାଲିକ ସଂଘ ସମସ୍ତ ପକ୍ଷଙ୍କ ସହିତ ଆଲୋଚନା ଓ ଆପୋଷ ବୁଝାମଣା ମାଧ୍ୟମରେ ଭଡା ବୃଦ୍ଧି ନେଇ ଉଦ୍ୟମ କରି ଥିଲା । ତେବେ ଜୟ ଜଗନ୍ନାଥ ଟ୍ରକ ମାଲିକ ସଂଘର ଅସହମତି ସତ୍ତ୍ୱେ ସୁନ୍ଦରଗଡ଼ ଟ୍ରକ ମାଲିକ ସଂଘ ଓ ବିସ୍ଥାପିତ ଗାଡ଼ି ମାଲିକ ସଂଘ ଚକାବନ୍ଦର ନିଷ୍ପତ୍ତି ନେଇ କୋଇଲା ପରିବହନକୁ ବନ୍ଦ କରିଦେଇଥିଲେ। ଜୟ ଜଗନ୍ନାଥ ଟ୍ରକ ମାଲିକ ସଂଘ ନୈତିକ ଭାବରେ ଭଡା ବୃଦ୍ଧିକୁ ସମର୍ଥନ କରିଥିଲେ ଅଧ୍ୟ ଚକ ବନ୍ଦରୁ ନିଜକୁ ଦୂରେଇ ରଖିଥିଲା। ଏହି ପରିସ୍ଥିତିକୁ ଏଡ଼ାଇବା ପାଇଁ ପ୍ରଶାସନ ଓ ଶିଳ୍ପ ପ୍ରତିଷ୍ଠାନ କର୍ତ୍ତୃପକ୍ଷମାନଙ୍କ ସହିତ ଆଲୋଚନା ଜାରି ରହିଥିଲା। ପରିଶେଷରେ ଏହି ପ୍ରତୀକ୍ଷାର ଅନ୍ତ ଘଟି ସୁନ୍ଦରଗଡରୁ ଝାରସୁଗୁଡ଼ା ଓ ସମ୍ବଲପୁର ପାର୍ଶ୍ୱରେ ଥିବା ଶିଳ୍ପ ପ୍ରତିଷ୍ଠାନଗୁଡିକୁ କୋଇଲା ପରିବହନ ଭଡା ଟନ ପିଛା ୬୦ ଟଙ୍କା ବୃଦ୍ଧି କରାଯିବାର ନିଷ୍ପତ୍ତି ମିଳିତ ଭାବରେ ଗ୍ରହଣ କରାଯାଇଥିବା ନେଇ ସୋମବାର ସନ୍ଧ୍ୟାରେ ଜୟ ଜଗନ୍ନାଥ ଟ୍ରକ ମାଲିକ ସଂଘର ମତାମତ ବୈଠକରେ ସଂଘର ଅଧ୍ୟକ୍ଷ ସଞ୍ଜୟ ନନ୍ଦ ଘୋଷଣା କରିଥିଲେ। ଏହାଛଡା ସଂଘ କିପରି ଭାବରେ ଆଗକୁ ସଦସ୍ୟମାନଙ୍କୁ ଅନ୍ୟାନ୍ୟ ସୁବିଧା ଦେଇ ପାରିବ ସେହି ବିଷୟରେ ବିସ୍ତୃତ ବର୍ଣ୍ଣନା କରିଥିଲେ। ଏହି ବୈଠକରେ ସଂଘର ଅଧ୍ୟକ୍ଷ ନନ୍ଦଙ୍କ ସହିତ ବରିଷ୍ଠ ସଦସ୍ୟ ମନୋରଞ୍ଜନ ବହିଦାର, ହାଜି ଅବଦୁଲ ସଇଦ, ଦିଲୀପ ଷଡ଼ଙ୍ଗୀ,ଉପନଗରପାଳ ଲଲାଟେନ୍ଦୁ ପରିଡ଼ା ମଞ୍ଚାସୀନ ଥିଲେ ା ବିଶ୍ୱରଞ୍ଜନ ହୋତା ମଞ୍ଚ ପରିଚାଳନା କରିଥିଲେ।