ରାଇଘର, ୩୧।୧୨(କିରଣ ପଟ୍ଟନାୟକ)ବାହାଘରର ୧୭ ବର୍ଷ ପରେ କୋଳକୁ ଆସିଥିଲା ପୁଅ। କିନ୍ତୁ ଅସାବଧାନତାରୁ କୁନିପୁଅ ଉପରେ ଚଢ଼ିଗଲା ଟ୍ରକ୍। ମା’ ବାପାଙ୍କ ଆଗରେ ଚାଲିଗଲା ତା ଜୀବନ। ପିଲାଟିର ମୃତଦେହ ଧରି ରାସ୍ତା ଉପରେ ମୁଣ୍ଡ ପିଟି କାନ୍ଦୁଥିଲେ ମା’ ବାପା। ଗ୍ରାମବାସୀ ମୃତଦେହ ରଖି କୁନ୍ଦେଇ -ରାଇଘର ମୁଖ୍ୟରାସ୍ତା ଅବରୋଧ କରିଥିଲେ। ଏହି ଦୁର୍ଘଟଣା ନବରଙ୍ଗପୁର ଜିଲା ରାଇଘର ବ୍ଲକ ଦେଓଭରଣ୍ଡି ଗ୍ରାମରେ ଶନିବାର ଘଟିଛି। ମୃତକ ହେଲେ ଛତିଶଗଡ଼ କୋଣ୍ଡାଗଁା ଜିଲା ବିଶ୍ରାମପୁରୀ ଥାନା ଅଧୀନ ମଛଲୀ ପଞ୍ଚାୟତ ଉରିଦ ଗ୍ରାମର ରାଜକୁମାର କୋରାମଙ୍କ ପୁଅ ଗୌରବ(୪)।
ଦଶାହରେ ଯୋଗଦେବାକୁ ରାଜକୁମାର ସ୍ତ୍ରୀ ଓ ପୁଅ ଗୌରବଙ୍କୁ ଧରି ଶୁକ୍ରବାର ସାରେ ଶ୍ୱଶୁରଘର ଦେଓଭରଣ୍ଡି ଗ୍ରାମକୁ ଆସିଥିଲେ। ପ୍ରବଳ ଥଣ୍ଡା ହେଉଥିବାରୁ ଶନିବାର ସକାଳ ୭ଟାରେ ରାଜକୁମାର ଓ ତାଙ୍କ ମା’ ଗୌରବଙ୍କୁ ଧରି ଖରାରେ ରାସ୍ତାରେ ଛିଡ଼ା ହୋଇଥିଲେ। ହଠାତ୍ ଗୌରବ ବାପାଙ୍କ ହାତ ଛାଡ଼ି ବିପରୀତ ଦିଗକୁ ଯିବାକୁ ଦୌଡ଼ିଥିଲେ। ସାମ୍ନା ପଟୁ ଏକ ମାଲ୍ ବୋଝେଇ ଟ୍ରକ୍ (ଏପି-୩୯ଡବ୍ଲ୍ୟୁ-୫୯୮୦) ଗୌରବଙ୍କୁ ଧକ୍କାଦେଇ ଘୋଷାଡ଼ି ନେଇଥିଲା। ତାଙ୍କ ମୁଣ୍ଡରେ ଟ୍ରକ୍ ଚକା ଚଢି ଯିବାରୁ ଘଟଣାସ୍ଥଳରେ ମୃତ୍ୟୁ ହୋଇଥିଲା। ପୂର୍ବାହ୍ନ ପ୍ରାୟ ୧୧ଟାରେ ରାଇଘର ତହସିଲଦାର ଜନ୍ମେଜୟ ବେହେରା ଓ ଗାଡ଼ି ମାଲିକ ଘଟଣାସ୍ଥଳକୁ ଆସି ଗ୍ରାମବାସୀଙ୍କ ସହ ଆଲୋଚନା କରିଥିଲେ। କ୍ଷତି ପୂରଣ ବାବଦକୁ ୧ଲକ୍ଷ ଟଙ୍କା ସହ ଇନ୍ସ୍ୟୁରାନ୍ସ ବାବଦରେ ମିଳିବାକୁ ଥିବା ଟଙ୍କା ପରିବାର ଲୋକେ ପାଇବେ ବୋଲି ଗାଡି ମାଲିକ ପ୍ରତିଶ୍ରୁତି ଦେଇଥିଲେ। ତହସିଲଦାର ରେଡ୍କ୍ରସ୍ ପକ୍ଷରୁ ପରିବାର ଲୋକଙ୍କୁ ୧୦ ହଜାର ଟଙ୍କା ଦେବା ପରେ ରାସ୍ତାରୋକୋ ହଟିଥିଲା। ଏହି ସମୟରେ ରାଇଘର ଥାନାଧିକାରୀ ରଘୁନାଥ ମାଝି, ରାଜସ୍ବ ଅଧିକାରୀ ମୃତ୍ୟୁଞ୍ଜୟ ରାଉଳ, ରମେଶ ହାଲବା, ସୁପରଭାଇଜର ବିନୋଦ ଅଧିକାରୀ ପ୍ରମୁଖ ଉପସ୍ଥିତ ଥିଲେ। ଡ୍ରାଇଭର ଟ୍ରକ୍ ସହ ରାଇଘର ଥାନାରେ ଅଟକ ରହିଛନ୍ତି। ରାଇଘର ପୋଲିସ ନଂ. ୨୩୧/୨୩ରେ ମାମଲା ରୁଜୁ କରିଛି।
