ବଳଙ୍ଗା,୨୩।୨(ଡି.ଏନ୍.ଏ.): ବଳଙ୍ଗା ଥାନା ଶାଇଁଶ ଶାସନ ପଞ୍ଚାୟତ ଦୁର୍ଗାପୁର, କାଶୀପୁର, ଭଗତୀପୁର ଗ୍ରାମରେ ପାନୀୟ ଜଳର ଘୋର ଅଭାବ ଦେଖାଯାଇଛି। ଏହି ୩ଗ୍ରାମରେ ଲୋକେ ପାନୀୟ ଜଳ ପାଇଁ ନାନା ଅସୁବିଧାର ସମ୍ମୁଖୀନ ହେଉଥିବା ଅଭିଯୋଗ କରିଛନ୍ତି। ଅନ୍ୟପଟେ ଗ୍ରାମର ନଳକୂପ ଥିବା ସତ୍ତ୍ୱେ ତାହା ଦୀର୍ଘଦିନ ହେବ ଅଚଳ ହୋଇପଡ଼ିଛି। ଏହି ୩ ଗ୍ରାମର ପ୍ରାୟ ୬ଶହ ପରିବାର ବାସ କରୁଛନ୍ତି। ଗ୍ରାମ ଚାରିପଟେ ପ୍ରାୟ ପାଞ୍ଚ ଶହ ହେକ୍ଟର ଜମିରେ ରିଧାନ ହେଉଛି। କେନାଲ ଜଳ ଯୋଗାଣ ନ ଥିବାରେ ୨ଶହରୁ ଊଦ୍ଧର୍ବ ଏଲ ଆଇ ପଏଣ୍ଟ ବସିଛି। ମାତ୍ରାଧିକ ପଏଣ୍ଟ ଯୋଗୁ ଜଳସ୍ତର ଦ୍ରୁତ ବେଗରେ କମିଯାଉଛି। ଏହାଦ୍ବାରା ଅଧିକାଂଶ ନଳକୂପ ଅଚଳ ହୋଇପଡ଼ିଛି। ବାକି ଥିବା ନଳକୂପରେ ସ୍ବଳ୍ପ ପାଣି ବାହାରୁ ଥିବାରୁ ଆବଶ୍ୟକ ମେଣ୍ଟାଇ ପାରୁ ନାହିଁ। ଫଳରେ ଗ୍ରାମବାସୀ ବାଧ୍ୟହୋଇ କାଦୁଅ ପଙ୍କରେ ବିଲକୁ ଯାଇ ଏଲ ଆଇ ପଏଣ୍ଟରେ ସ୍ନାନଶୌଚ ହେବା ସହିତ ପାନୀୟ ଜଳ ବ୍ୟବହାର କରୁଛନ୍ତି। ଏପରିକି ଗ୍ରାମବାସୀ ପାନୀୟ ଜଳ ପାଇଁ ବହୁ ସମୟ ଧରି ଅପେକ୍ଷା କରି ରହିଛନ୍ତି। ବସୁଧା ଯୋଜନାରେ ପାନୀୟ ଜଳ ପ୍ରକଳ୍ପ ଏବଂ ଆବଶ୍ୟକ ପରିମାଣର ଡାନିଡା ନଳକୂପ ନାହିଁ। ଆଗାମୀ ଗ୍ରୀଷ୍ମ ଋତୁରେ ପାନୀୟ ଜଳ ନିମନ୍ତେ ପରିସ୍ଥିତି ଅଣାୟତ୍ତ ହେବାର ଆଶଙ୍କା ଦେଖାଦେଇଛି। ପାନୀୟ ଜଳ ପ୍ରକଳ୍ପ ନିର୍ମାଣ ଆବଶ୍ୟକୀୟ ନଳକୂପ ବସାଇବା ସହିତ ବର୍ତ୍ତମାନ ସ୍ଥିତିରେ ପାଣି ଟାଙ୍କି ଦ୍ବାରା ଜଳଯୋଗାଣ ନିମନ୍ତେ ଜିଲପାଳଙ୍କ ନିକଟରେ ଗ୍ରାମବାସୀ ଦାବି କରିଛନ୍ତି। ଏ ନେଇ ସରପଞ୍ଚ ଗୀତାଞ୍ଜଳି ପ୍ରଧାନ କହିଛନ୍ତି, ଏ ବିଷୟରେ ମୁଁ ଅବଗତ ଅଛି। ଜଳ ସମସ୍ୟା ଦୂର କରିବା ପାଇଁ ଉପରିସ୍ଥ ଅଧିକାରୀଙ୍କ ସହ ଆଲୋଚନା କରି ଖୁବଶୀଘ୍ର ଜଳ ଯୋଗାଣ ବ୍ୟବସ୍ଥା ଦୂର କରାଯିବ ବୋଲି କହିଛନ୍ତି।
