କରୋନା ମହାମାରୀ ସମୟରେ ବଲିଉଡ୍ର ଅନେକ କଳାକାର ଗରିବ, ଅସହାୟଙ୍କୁ ସହଯୋଗର ହାତ ବଢ଼ାଇଛନ୍ତି। କେହି ଟଙ୍କା ବାଣ୍ଟିଛନ୍ତି ତ ଆଉ କେହି ଭୋକିଲାଙ୍କୁ ଖାଇବାକୁ ଦେଇଛନ୍ତି। ତେବେ ଏହି ତାଲିକାରେ ସବୁଠାରୁ ଆଗରେ ରହିଛନ୍ତି ସୋନୁ ସୁଦ ଏବଂ ଖିଲାଡି ହିରୋ ଅକ୍ଷୟ କୁମାର। ସୋନୁ ପ୍ରବାସୀ ଶ୍ରମିକଙ୍କୁ ଘରେ ପହଞ୍ଚାଇବା ପାଇଁ ଗାଡିଠାରୁ ଆରମ୍ଭ କରି ଖାଇବା ପର୍ଯ୍ୟନ୍ତ ସମସ୍ତ ପ୍ରକାର ବ୍ୟବସ୍ଥା କରିଥିଲେ। ସେହିପରି ଅକ୍ଷୟ କୁମାର ପ୍ରଧାନମନ୍ତ୍ରୀ ରିଲିଫ୍ ଫଣ୍ଡ୍କୁ ସବୁଠାରୁ ଅଧିକ ୨୫ କୋଟି ଟଙ୍କା ଦାନ କରିଛନ୍ତି। ଏବେ ଏହି ୨ କଳାକାରଙ୍କୁ ଦେଶର ସର୍ବୋଚ୍ଚ ସମ୍ମାନ ‘ଭାରତରତ୍ନ’ରେ ସମ୍ମାନିତ କରିବା ପାଇଁ ପ୍ରଶଂସକମାନେ ଦାବି କରିଛନ୍ତି। ଗତ ୩ ଦିନ ହେଲାଣି ଏ ନେଇ ସୋସିଆଲ ମିଡିଆରେ ପ୍ରଶଂସକମାନେ ଟୁଇଟ୍ କରୁଛନ୍ତି। ମହାମାରୀ କରୋନା ସମୟରେ ଅକ୍ଷୟ ଏବଂ ସୋନୁ ଗରିବ ଲୋକଙ୍କ ପାଇଁ ଦେବଦୂତ ପରି କାମ କରିଛନ୍ତି। ଏଭଳି ପରିସ୍ଥିତିରେ ସେମାନେ ଭାରତରତ୍ନ ପାଇବା ଯୋଗ୍ୟ ବୋଲି ଅନେକ ପ୍ରଶଂସକ ଲେଖୁଛନ୍ତି।
