ଚୌଦ୍ୱାର,୨୨।୧(ଡି.ଏନ.ଏ.): ବିବାହ ବନ୍ଧନରେ ବାନ୍ଧି ହୋଇଛନ୍ତି ଦୁଇଜଣ ଦୃଷ୍ଟିହୀନ। ପରସ୍ପରକୁ ଜୀବନସାଥୀ କରିବାର ନିଷ୍ପତ୍ତି ନେଇ ଟାଙ୍ଗୀ-ଚୌଦ୍ୱାର ବ୍ଲକ କୟଳପଡା ପଞ୍ଚାୟତ ଅଧୀନ ଶିମିଳିହାଣ୍ଡ ଗ୍ରାମର ରାଧାମାଧବ ମଠରେ ଉଭୟ ଉଭୟଙ୍କ ହାତ ଧରିଛନ୍ତି। ଏହି ବିବାହ ଉତ୍ସବରେ ଗ୍ରାମବାସୀ ଯୋଗଦେଇ ନବ ଦମ୍ପତିକୁ ଆଶୀର୍ବାଦ କରିଛନ୍ତି।
ଶିମିଳିହାଣ୍ଡ ଗ୍ରାମର ଦିବାକର ନାୟକଙ୍କ ଝିଅ ରିନୁ ଜନ୍ମରୁ ଦୃଷ୍ଟିହୀନ। ପିଲାଦିନେ ମା ଚାଲିଯିବା ପରେ ସାହିପଡିଶା ଲୋକଙ୍କ ମେଳରେ ରିନୁ ବଢିଥିଲେ। ସେ ଦଶମ ଶ୍ରେଣୀ ପର୍ଯ୍ୟନ୍ତ ପାଠ ପଢିଛନ୍ତି। ସେହିପରି କଖଡି-ବରମପୁର ଗ୍ରାମର ମୁନା ନାୟକ ମଧ୍ୟ ଦୃଷ୍ଟିହୀନ। ମୁନାଙ୍କୁ ୩ବର୍ଷ ହୋଇଥିବାବେଳେ ତାଙ୍କ ମାଆଙ୍କ ମୃତ୍ୟୁ ଘଟିଥିଲା। ୫ବର୍ଷ ବୟସରେ ତାଙ୍କ ବାପା ଆରପାରିକୁ ଚାଲିଗଲେ। ମାବାପା ଛେଉଣ୍ଡ ମୁନା କୟଳପଡା ପଞ୍ଚାୟତ ଢିହସାହି ଗ୍ରାମର ଅଜାଙ୍କ ଘରେ ରହୁଛନ୍ତି। ମୁନା ମଧ୍ୟ ମାଟ୍ରିକ ପର୍ଯ୍ୟନ୍ତ ପାଠ ପଢିଛନ୍ତି। ଏବେ ସେ ବିଭିନ୍ନ ଅନୁଷ୍ଠାନରେ ସଙ୍ଗୀତ ପରିବେଷଣ କରିବା ସହିତ ଟ୍ରେନ୍ରେ ଗୀତ ବୋଲି ଯାତ୍ରୀଙ୍କ ମନୋରଞ୍ଜନ କରୁଛନ୍ତି। ଏଥି ସହିତ ଟ୍ରେନ୍ରେ ଷ୍ଟେସନେରି ସାମଗ୍ରୀ ବିକ୍ରି କରୁଛନ୍ତି। ତେବେ ମୁନା ଓ ରିନୁଙ୍କ ବିବାହ ପାଇଁ ଉଭୟ ପରିବାର ସହମତି ପ୍ରକାଶ କରିଥିଲେ। ଫଳରେ ଗ୍ରାମବାସୀ ଓ ଉଭୟ ପରିବାର ଲୋକଙ୍କ ଉପସ୍ଥିତିରେ ରାଧାମାଧବ ମଠରେ ଉଭୟଙ୍କ ବିବାହ ସମ୍ପନ୍ନ ହୋଇଥିଲା। ଏହି ବିବାହ ଉତ୍ସବରେ ଚୌଦ୍ୱାର-କଟକ ବିଧାୟକ ସୌଭିକ୍ ବିଶ୍ୱାଳ ଯୋଗଦେଇ ନବଦମ୍ପତିଙ୍କୁ ଆଶ୍ରୀର୍ବାଦ କରିବା ସହ ଶୁଭକାମନା ଜଣାଇଥିଲେ। ଅନ୍ୟପକ୍ଷରେ ରିନୁ ଘର କାମ କରିପାରୁଥିବାରୁ ବିବାହ ପରେ କିଛି ଅସୁବିଧା ହେବନାହଁି ବୋଲି ଦିବାକର କହିଛନ୍ତି। ଏହି ଦମ୍ପତି ପରସ୍ପରକୁ ଦେଖି ନ ପାରିଲେ ମଧ୍ୟ ଜୀବନସାଥୀ କରିବା ସଂକଳ୍ପ ନେଇ ସମାଜ ପାଇଁ ଉଦାହରଣ ସୃଷ୍ଟି କରିଛନ୍ତି। ଏମାନଙ୍କ ପାଇଁ ସରକାରଙ୍କ ଯୋଜନାରେ ସୁବିଧାସୁଯୋଗ ଯୋଗାଇବାକୁ ବ୍ଲକ ଉପାଧ୍ୟକ୍ଷା ଜାନକୀ ପରିଡା କହିଛନ୍ତି ା
