ସଜନାଗଡ଼, ୩।୪ (ଡି.ଏନ.ଏ.) ନୀଳଗିରି ବ୍ଲକ ଆରବନ୍ଧ ପଞ୍ଚାୟତରେ ମହାତ୍ମାଗାନ୍ଧୀ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନା(ଏମ୍ଜିଏନଆରଇଜିଏସ୍)ରେ ଅନିୟମିତତା ଅଭିଯୋଗ କରି ଦୁଇ ଗୋଷ୍ଠୀ ମୁହାଁମୁହିଁ ହୋଇଛନ୍ତି। କାମ ନ ହୋଇ ବି ବିଲ୍ ହୋଇଥିବା ଗ୍ରାମର ଗୋଟିଏ ଗୋଷ୍ଠୀ ଅଭିଯୋଗ କରିଛନ୍ତି। ଏହାକୁ ପୂର୍ବତନ ସରପଞ୍ଚ, ନବ ନିର୍ବାଚିତ ସରପଞ୍ଚଙ୍କ ସମେତ ଆଉ ଗୋଟିଏ ଗୋଷ୍ଠୀ ଖଣ୍ଡନ କରିଛନ୍ତି।
ବ୍ଲକ ଆରବନ୍ଧ ପଞ୍ଚାୟତରେ ଜମି ଉନ୍ନତିକରଣ ପାଇଁ ଶୁକ୍ରବାର ରାତି ଅଧରେ ଏମ୍ଜିଏନଆରଇଜିଏସ୍ରେ ମେଶିନ ଲଗାଇ କାମ ହେଉଥିବା ବେଳେ ୭ଟି ମାଟି ବୋଝେଇ ଟ୍ରାକ୍ଟରକୁ ଗ୍ରାମର ଗୋଟିଏ ଗୋଷ୍ଠୀ ଅଟକ ରଖିଥିଲେ। ଏନେଇ ଗାଁରେ ଉତ୍ତେଜନା ଦେଖାଦେଇଥିଲା। ଶନିବାର ପୂର୍ବାହ୍ନରେ ବରହମପୁର ଥାନା ଅଧିକାରୀ ହେମନ୍ତ କୁମାର ମାଝି ପହଞ୍ଚତ୍ ମାଟି ଟ୍ରାକ୍ଟରକୁ ଥାନାକୁ ନେଇଥିବା ବେଳେ ଉନ୍ନୟନମୂଳକ କାର୍ଯ୍ୟରେ ଅନିୟମିତତା ହୋଇଥିବା ଗ୍ରାମବାସୀ ଅଭିଯୋଗ କରିଛନ୍ତି। ଅନ୍ୟପକ୍ଷେ ଅଭିଯୋଗକୁ ବର୍ତ୍ତମାନର ସରପଞ୍ଚ କୁଳମଣି ନାୟକ ଓ ପୂର୍ବତନ ସରପଞ୍ଚ ତନୁଜାଶ୍ରୀ ନାୟକ ସମ୍ପୂର୍ଣ୍ଣ ଭାବେ ଖଣ୍ଡନ କରିବା ସହ ପଞ୍ଚାୟତରେ ଦୁର୍ନୀତି ହୋଇନାହିଁ, ସବୁପ୍ରକାର ତଦନ୍ତ ପାଇଁ ପ୍ରସ୍ତୁତ ଥିବା କହିଛନ୍ତି। ନିର୍ବାଚନରେ ଯେଉଁମାନେ ପରାଜିତ ହୋଇଥିଲେ ସେମାନେ ଆକ୍ରୋଶ ରଖି କିଛି ଲୋକଙ୍କୁ ଶିଖାଇ ମୋତେ ବଦନାମ କରିବା ପାଇଁ ପ୍ରାୟୋଜିତ ଷଡ଼ଯନ୍ତ୍ର କରିଛନ୍ତି ବୋଲି କହିଛନ୍ତି। ଏ ବିଷୟରେ ନୀଳଗିରି ବିଡିଓ ଅଶେଷ କୁମାର ନାୟକ କହିଛନ୍ତି, ଉକ୍ତ ପଞ୍ଚାୟତରେ ୬ଟି ପ୍ରକଳ୍ପ ତଦନ୍ତ ହୋଇଥିଲା, ସେସବୁ ଠିକ୍ ଅଛି। ଏବେ ଯେଉଁ ଅଭିଯୋଗ ହୋଇଛି ଏହାର ମଧ୍ୟ ତଦନ୍ତ କରାଯିବ।
