ଦୁବାଇ, ୮।୧୦(ପି.ଟି.)- ପ୍ରଥମ ଆମେରିକୀୟ କ୍ରିକେଟରଭାବେ ଇଣ୍ଡିଆନ ପ୍ରିମିୟର ଲିଗ୍ରେ ସାମିଲ ହୋଇଥିବା ଅଲୀ ଖାଁ ପ୍ରତିଯୋଗିତାରୁ ଓହରିଯାଇଛନ୍ତି। କୋଲକାତା ନାଇଟ ରାଇଡର୍ସର ଏହି ଦ୍ରୁତ ବୋଲର ଆହତ ସମସ୍ୟା ଯୋଗୁ ଏପରି ନିଷ୍ପତ୍ତି ନେଇଛନ୍ତି। ଆହତ ସମସ୍ୟା ସମ୍ପର୍କରେ ସବିଶେଷ ତଥ୍ୟ ଦିଆଯାଇ ନ ଥିଲେ ହେଁ ସେ ଓହରିଯିବା ନେଇ ଆଇପିଏଲ ପକ୍ଷରୁ ସ୍ପଷ୍ଟ କରାଯାଇଛି। ଟୁର୍ନାମେଣ୍ଟ ପୂର୍ବରୁ ଇଂଲଣ୍ଡ ସିମର ହ୍ୟାରି ଗୁର୍ନେ ଆହତ ହେବାରୁ ବଦଳ ଖେଳାଳିଭାବେ ଅଲୀଙ୍କୁ ନିଆଯାଇଥିଲା। କୌଣସି ମ୍ୟାଚ ଖେଳିବା ପୂର୍ବରୁ ଅଲୀ ଖାଁ ଦୁର୍ଭାଗ୍ୟବଶତଃ ଆହତ ହୋଇ ପ୍ରତିଯୋଗିତାରୁ ଓହରି ଯାଇଛନ୍ତି ବୋଲି ଏକ ବିବୃତିରେ ପ୍ରକାଶ କରାଯାଇଛି। କାରିବିୟନ ପ୍ରିମିୟର ଲିଗ୍ରେ ୨୯ ବର୍ଷୀୟ ଅଲୀ ଟାଇଟଲ ବିଜୟୀ ଟ୍ରିନବାଗୋ ନାଇଟ ରାଇଡର୍ସ ପକ୍ଷରୁ ପ୍ରତିନିଧିତ୍ୱ କରିଥିଲେ। ପାକିସ୍ତାନ ଜନ୍ମିତ ଏହି ଆମେରିକୀୟ ଖେଳାଳି ସେହି ପ୍ରତିଯୋଗିତାରେ ୮ଟି ଉଇକେଟ ନେଇଥିଲେ।
