ଢେଙ୍କାନାଳ ଅଫିସ,୯।୨: ସ୍ବାମୀଙ୍କ ଚାପୁଡ଼ାରେ ରୋଷେଇ ଘରେ ଚେତାଶୂନ୍ୟ ହୋଇପଡ଼ିଥିଲେ ସ୍ତ୍ରୀ। ସଂଜ୍ଞାହୀନ ସ୍ତ୍ରୀଙ୍କୁ ମୃତ ଭାବି ଚାଳିଆରେ ଲଗାଇ ଦେଇଥିଲେ ନିଅଁା। ପୋଡ଼ିଯାଇ ସ୍ତ୍ରୀ ଚିତ୍କାର କରିବା ପରେ ସେ ଜୀବିତ ବୋଲି ଜାଣିପାରିଥିଲେ ଅଭିଯୁକ୍ତ ସ୍ବାମୀ। ହେଲେ ସେତେବେଳକୁ ଡେରି ହୋଇଯାଇଥିଲା। ନିଅଁାର ଅଁା ଗିଳି ସାରିଥିଲା ମହିଳାଙ୍କ ଶରୀରକୁ। ଢେଙ୍କାନାଳ ଜିଲା କଙ୍କଡ଼ାହାଡ଼ ଥାନା କଣ୍ଟାପାଳ ପଞ୍ଚାୟତର ଚୁନରଗଡ଼ି ଗ୍ରାମର ବହୁଚର୍ଚ୍ଚିତ ରିଙ୍କି ମହାକୁଡ଼ (୨୬) ହତ୍ୟାକାଣ୍ଡ ମାମଲା ପଛରେ ରହିଛି ଏଭଳି ହୃଦୟଥରା କାହାଣୀ। ପୋଲିସ ଜେରାର ସମ୍ମୁଖୀନ ହୋଇ ନ ପାରି ଅଭିଯୁକ୍ତ ସ୍ବାମୀ ନବକିଶୋର କବାଟ ଦୋଷ ସ୍ବୀକାର କରିଛନ୍ତି। ସୋମବାର ତାଙ୍କୁ ଗିରଫ ପରେ କୋର୍ଟ ଚାଲାଣ କରାଯାଇଛି। ପୋଲିସ ସୂଚନା ଅନୁଯାୟୀ, ୨୦୧୭ ମାର୍ଚ୍ଚରେ ଭୁବନ ଥାନା ବଡ଼କାଠିଆ ଗ୍ରାମର ରିଙ୍କିଙ୍କୁ କଙ୍କଡ଼ାହାଡ଼ ଥାନା ଚୁନରଗଡି ଗ୍ରାମର ନବକିଶୋର ବିବାହ କରିଥିଲେ। ସେମାନଙ୍କର ୨ ବର୍ଷର ଏକ ଶିଶୁକନ୍ୟା ଅଛି। କୌଣସି କାରଣରୁ ସ୍ତ୍ରୀସ୍ବାମୀଙ୍କ ଦାମ୍ପତ୍ୟ ଜୀବନରେ ସୃଷ୍ଟି ହୋଇଥିଲା ଅଶାନ୍ତି। ଘରେ ଗଣ୍ଡଗୋଳ ସାଧାରଣ ଘଟଣା ପାଲଟିଥିଲା। ଗୁରୁବାର ବିଳମ୍ବିତ ରାତିରେ ମଧ୍ୟ ନବକିଶୋର ଏବଂ ରିଙ୍କିଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। ଉତ୍ତ୍ୟକ୍ତ ନବକିଶୋର ଶକ୍ତ ଚାପୁଡ଼ାରେ ସ୍ତ୍ରୀ ରୋଷେଇଘରେ ଚେତାଶୂନ୍ୟ ହୋଇପଡ଼ିଥିଲେ ରିଙ୍କି। ତାଙ୍କର ମୃତ୍ୟୁ ହୋଇଯାଇଛି ବୋଲି ଭାବିଥିଲେ ଅଭିଯୁକ୍ତ ସ୍ବାମୀ। ପୋଲିସ ଗିରଫଦାରି ଏଡ଼ାଇବାକୁ ସେ ପାଞ୍ଚତ୍ଥିଲେ ଯୋଜନା ଏବଂ ଚାଳିଆ ରୋଷେଇ ଘରେ ନିଅଁା ଲଗାଇ ଦେଇଥିଲେ। ନିଅଁା ଧାସ ବାଜି ରିଙ୍କିଙ୍କ ସଂଜ୍ଞା ଫେରିବା ବେଳକୁ ତାଙ୍କ ଶରୀରର ଅର୍ଦ୍ଧାଧିକ ଭାଗ ଜଳିଯାଇଥିଲା। ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା। ଶୁକ୍ରବାର ଘଟଣା ପ୍ରଘଟ ହେବା ପରେ ପୋଲିସ ତଦନ୍ତ ଆରମ୍ଭ କରିଥିଲା। ତେବେ ଛୋଟିଆ ଚାଳିଆ ଘରେ ନିଅଁା ଲାଗି ଜଣେ ମହିଳାଙ୍କ ମୃତ୍ୟୁ ଘଟିବା ଅନେକ ପ୍ରଶ୍ନ ଛିଡ଼ା କରାଇଥିଲା। ସ୍ବାମୀଙ୍କ ଉପରେ ସନ୍ଦେହ ଦୃଢ଼ୀଭୂତ ହେବାପରେ ମୃତ ମହିଳାଙ୍କ ପରିବାର ଲୋକେ ଥାନାରେ ହତ୍ୟା ମାମଲା ରୁଜୁ କରିଥିଲେ। ପୋଲିସ ବିଭିନ୍ନ ଦିଗକୁ ଆଧାରକରି ଛାନ୍ଭିନ୍ ଆରମ୍ଭ କରିଥିଲା। ଅଭିଯୁକ୍ତଙ୍କୁ ଅଟକ ରଖି ପଚରାଉଚୁରା ଜାରି ରଖିଥିଲା। ନବକିଶୋର ନିଜର ବୟାନରେ ଦୋଷ ସ୍ବୀକାର କରିଛନ୍ତି। ଏଥିରେ ଆଉ କାହାରି ସମ୍ପୃକ୍ତି ଅଛି କି ନାହିଁ ତାହାର ଖୋଳତାଡ଼ ଚାଲିଥିବା ଥାନା ଅଧିକାରୀ ଆଶିଷ କୁମାର ଜେନା କହିଛନ୍ତି। ଏ ସଂକ୍ରାନ୍ତରେ ଥାନାରେ ନଂ. ୧୪/୨୧, ଦଫା ୪୯୮ (ଏ), ୩୦୨, ୩୦୪ (ବି) ଓ ୨୦୧ରେ ଏକ ମାମଲା ରୁଜୁ ହୋଇଛି।