ଦାରିଙ୍ଗବାଡ଼ି,୯ା୧୦(ଡି.ଏନ୍.ଏ.): କନ୍ଧମାଳ ଜିଲା ଦାରିଙ୍ଗବାଡ଼ିର ସର୍ବ ପୁରାତନ ପୋଖରୀରେ ନିର୍ମାଣାଧୀନ କାର୍ଯ୍ୟ ଭୁଶୁଡ଼ି ପଡ଼ିଛି। ଅତି ନିମ୍ନମାନର କାର୍ଯ୍ୟ କରାଯାଉଥିବରୁ ଭୁଶୁଡ଼ି ଯାଇଥିବା ଗ୍ରାମର ଓକିଲ ପ୍ରଦୀପ ସାହୁ ଅଭିଯୋଗ କରିଛନ୍ତ। ସେ କହିଛନ୍ତି, ପୂର୍ବରୁ ଏନେଇ ପ୍ରଶାସନଙ୍କୁ ଅବଗତ କରାଯାଇଥିଲା। ହେଲେ କେହି ଶୁଣିବା ପରିବର୍ତ୍ତେ ସେଠାରେ ଲକ୍ଷାଧିକ ଟଙ୍କା ଖର୍ଚ୍ଚ କରିଥିଲେ ହେଁ ଏବେ ତାହା କୌଣସି କାମକୁ ଆସିଲା ନାହିଁ ବୋଲି ଅଭିଯୋଗ ହୋଇଛି।
ପ୍ରକାଶ ଯେ, କିଛି ବର୍ଷ ତଳେ ଉକ୍ତ ପୋଖରୀର ପୁନରୁଦ୍ଧାର କାର୍ଯ୍ୟରେ ଲକ୍ଷାଧିକ ଟଙ୍କା ଖର୍ଚ୍ଚ କରାଯାଇଥିବା ବେଳେ ଏବେ ଦୁଇଟି ପର୍ଯ୍ୟାୟରେ ୧୫ଲକ୍ଷ ଟଙ୍କା ଅନୁଦାନରେ କାର୍ଯ୍ୟ କରାଯାଉଥିଲା। ପ୍ରଥମ ପର୍ଯ୍ୟାୟରେ ୫ଲକ୍ଷ ଟଙ୍କା ଅନୁଦାନରେ ଫେବର ପକାଯିବା ସହ ସୌନ୍ଦର୍ଯ୍ୟକରଣ କରାଯାଇଥିଲା। ହେଲେ ବର୍ଷା ଯୋଗୁ ଏବେ ଉକ୍ତ କାର୍ଯ୍ୟ ଧୋଇଯିବା ସହ ଏହା ନିମ୍ନମାନର କାର୍ଯ୍ୟ କରାଯାଇଥିବା ସାଧାରଣରେ ଅଭିଯୋଗ ହୋଇଛି। ଏନେଇ କନିଷ୍ଠ ଯନ୍ତ୍ରୀ ଧୀରେନ ସେଠୀ କହିଛନ୍ତି, ପୂର୍ବରୁ କରାଯାଇଥିବା ପୁରୁଣା ପୋଖରୀ ଓ୍ବାଲ ଉପରେ ଫେବର ପଡ଼ିଥିଲା। ଉକ୍ତ ଓ୍ବାଲ ଭୁଶୁଡ଼ିବାରୁ ଏଭଳି ପରିସ୍ଥିତି ହୋଇଛି ବୋଲି ସେ କହିଛନ୍ତି।
