ଭୁବନେଶ୍ୱର,୬।୬(ବ୍ୟୁରୋ): ଭୁବନେଶ୍ୱର ମହାନଗର ନିଗମ (ବିଏମ୍ସି), ଭୁବନେଶ୍ୱର ଉନ୍ନୟନ ପ୍ରାଧିକରଣ (ବିଡିଏ) ଏବଂ ସ୍ମାର୍ଟସିଟି ପକ୍ଷରୁ ରାଜଧାନୀର ବିକାଶ ପାଇଁ ବିଭିନ୍ନ ଯୋଜନା ହାତକୁ ନିଆଯାଉଛି। ସେଥିମଧ୍ୟରୁ କେତେକ କାର୍ଯ୍ୟକାରୀ ହେଉଥିବାବେଳେ ଆଉ କେତୋଟି ଯୋଜନା ଫାଇଲ ଭିତରେ ରହିଯାଉଛି। ସରକାର ନକ୍ସା ପ୍ରସ୍ତୁତ କରୁଥିଲେ ମଧ୍ୟ ଅଧିକାରୀମାନଙ୍କ ଉଦାସୀନତା ମନୋଭାବ କାରଣରୁ ବିଭିନ୍ନ ପ୍ରକଳ୍ପ କାର୍ଯ୍ୟକ୍ଷମ ହୋଇପାରୁନାହିଁ। ସେହିଭଳି ଏକ ଯୋଜନା ହେଉଛି ଅର୍ବାନ ହିଷ୍ଟ୍ରି ମ୍ୟୁଜିୟମ (ସହରାଞ୍ଚଳ ଇତିହାସ ସଂଗ୍ରହାଳୟ)। ୫ବର୍ଷ ତଳେ ଏହି ମ୍ୟୁଜିୟମ ପ୍ରତିଷ୍ଠା ପାଇଁ ଯୋଜନା ପ୍ରସ୍ତୁତ ହୋଇଥିଲା। ହେଲେ ଏପର୍ଯ୍ୟନ୍ତ ତାହା କାର୍ଯ୍ୟକ୍ଷମ ହୋଇପାରିନାହିଁ। ଫଳରେ ଏହି ମ୍ୟୁଜିୟମର ଭାଗ୍ୟ ଏବେ ବି ଅନିଶ୍ଚିତତା ଘେରରେ ରହିଛି।
ସହର ଭୁବନେଶ୍ୱରରୁ ସ୍ମାର୍ଟସିଟି ସହରର ଯାତ୍ରାକୁ ଗୋଟିଏ ଛାତ ତଳେ ପ୍ରଦର୍ଶନ ନିମନ୍ତେ ଅର୍ବାନ ହିଷ୍ଟ୍ରି ମ୍ୟୁଜିୟମ କରିବାକୁ ଯୋଜନା ହୋଇଥିଲା। ୨୦୧୬ରେ ତତ୍କାଳୀନ ମୁଖ୍ୟ ଶାସନ ସଚିବ ଆଦିତ୍ୟ ପ୍ରସାଦ ପାଢୀଙ୍କ ଅଧ୍ୟକ୍ଷତାରେ ଏକ ବୈଠକ ଅନୁଷ୍ଠିତ ହୋଇ ଏହି ନିଷ୍ପତ୍ତି ନିଆଯାଇଥିଲା। ଭୁବନେଶ୍ୱର ସ୍ମାର୍ଟସିଟିକୁ ନକ୍ସା ପ୍ରସ୍ତୁତ ଏବଂ ବିଡିଏକୁ ନିର୍ମାଣ ଦାୟିତ୍ୱ ଦିଆଯାଇଥିଲା। ମାତ୍ର ଇତିମଧ୍ୟରେ ୫ବର୍ଷରୁ ଅଧିକ ସମୟ ବିତିଯାଇଥିଲେ ବି ନିର୍ମାଣ କାର୍ଯ୍ୟ ତ ଦୂରର କଥା ଏଥିପାଇଁ ଶିଳାନ୍ୟାସ ମଧ୍ୟ ହୋଇପାରିନାହିଁ। ଏଥିରୁ କର୍ତ୍ତୃପକ୍ଷଙ୍କ ଦାୟିତ୍ୱହୀନତା ବାରି ହେଉଛି। ପ୍ରକଳ୍ପ କାର୍ଯ୍ୟକାରୀ ହୋଇଥିଲେ ସମସ୍ତେ ବାହାବା ନେବାକୁ ଆଗେଇ ଆସିଥାନ୍ତେ। ମାତ୍ର କେଉଁ କାରଣ ଲାଗି ପ୍ରକଳ୍ପ ଆରମ୍ଭ ହେଉନାହିଁ ସେ ସମ୍ପର୍କରେ କେହି ମୁହଁ ଖୋଲିବାକୁ ନାରାଜ। ଭୁବନେଶ୍ୱର ସ୍ମାର୍ଟସିଟିର ଜଣେ ଅଧିକାରୀ କହିଛନ୍ତି, ଏହି ଯୋଜନା ବହୁ ପୁରୁଣା। ଏହାର ନିର୍ମାଣ ଦାୟିତ୍ୱ ବିଡିଏକୁ ଦିଆଯାଇଥିଲା। ତେଣୁ କ’ଣ ପାଇଁ ଏ ପର୍ଯ୍ୟନ୍ତ କାମ ଆରମ୍ଭ ହୋଇନାହିଁ, ସେ ସମ୍ପର୍କରେ ଆମେ କହିପାରିବୁ ନାହିଁ। ଅପରପକ୍ଷେ ବିଡିଏ ସେକ୍ରେଟାରି କବୀନ୍ଦ୍ର କୁମାର ସାହୁ କହିଛନ୍ତି, ମୁଁ ସେ ସମ୍ପର୍କରେ ଜାଣିନାହିଁ। ସେ ଫାଇଲ ମୋ’ ପାଖକୁ ଆସିନାହିଁ। ଇଞ୍ଜିନିୟରିଂ ବିଭାଗରେ ପଚାରିଲେ ସେମାନେ କହିପାରିବେ। ଅପରପକ୍ଷେ ଇଞ୍ଜିନିୟରିଂ ବିଭାଗର ଜଣେ ଅଧିକାରୀ କହିଛନ୍ତି, ସେ ସମ୍ପର୍କରେ ମୋ ପାଖରେ ସୂଚନା ନାହିଁ। ମୁଁ ଜାଣିବାରେ ଏହାର ନିର୍ମାଣ ଦାୟିତ୍ୱ ସ୍ମାର୍ଟସିଟିକୁ ଦିଆଯାଇଛି। ବିଡିଏକୁ ସେପରି କିଛି ପ୍ରକଳ୍ପ ଦିଆଯାଇନାହିଁ ବୋଲି ସେ ସ୍ପଷ୍ଟ କରିଛନ୍ତି। ସରକାରଙ୍କ ଏତେ ବଡ଼ ପ୍ରକଳ୍ପ ସମ୍ପର୍କରେ ବିଭାଗୀୟ ଅଧିକାରୀମାନେ କିପରି ଜାଣିନାହାନ୍ତି ତାହା ପ୍ରଶ୍ନବାଚୀ ସୃଷ୍ଟି କରୁଛି। ଏ ନେଇ କୌଣସି ରାଜନୈତିକ ଦଳ ସ୍ବର ଉଠାଉ ନାହାନ୍ତି କି ସରକାର କିଛି ସ୍ପଷ୍ଟ କରୁନାହାନ୍ତି।
ଏଜି ଛକ ନିକଟରେ ପ୍ରାୟ ୧୦ କୋଟି ଟଙ୍କା ବ୍ୟୟରେ ୨.୩୪୧ ଏକର ଜମିରେ ଏହି ପ୍ରକଳ୍ପ କରିବାକୁ ପ୍ରଥମେ ନିଷ୍ପତ୍ତି ନିଆଯାଇଥିଲା। ଉକ୍ତ ମ୍ୟୁଜିୟମରେ ପ୍ରଥମ ପର୍ଯ୍ୟାୟରେ ୨ହଜାର ବର୍ଷ ତଳର ପ୍ରାଚୀନ ଭୁବନେଶ୍ୱରର ଇତିହାସ ଏବଂ ଦ୍ୱିତୀୟ ପର୍ଯ୍ୟାୟରେ ୧୯୪୮ ପରଠାରୁ ଭୁବନେଶ୍ୱର ସମ୍ପର୍କରେ ତଥ୍ୟ ପ୍ରଦର୍ଶନ ହୋଇଥାନ୍ତା। ସହରର କେତେକ ବିରଳ ଚିତ୍ର ସ୍ଥାନିତ ହେବା ସହ କଳିଙ୍ଗ ଯୁଦ୍ଧଠାରୁ ଆରମ୍ଭ କରି ଶିଶୁପାଳଗଡ଼ ଏବଂ ଅନ୍ୟ ଐତିହ୍ୟ ସ୍ଥାନର ବିବରଣୀ ସମେତ ଦୃଶ୍ୟଶ୍ରାବ୍ୟ ମାଧ୍ୟମରେ ଓଡ଼ିଶାର ପର୍ଯ୍ୟଟନ ଶିଳ୍ପ, ଶିକ୍ଷାର ପ୍ରସାର ଆଦି ସମ୍ପର୍କରେ ସୂଚନା ଦିଆଯାଇଥାନ୍ତା। ତେବେ ଏଜି ଛକ ନିଟକସ୍ଥ ଉକ୍ତ ସ୍ଥାନର ଅଧିକାଂଶ ଜମି ଜବରଦଖଲରେ ରହିଥିଲା। ଏହାକୁ ନେଇ ଜବରଦଖଲକାରୀମାନେ ଅଦାଲତର ଆଶ୍ରୟ ନେଇଥିଲେ। ୨୦୧୮ ବେଳକୁ ଏହି ମାମଲାର ଅନ୍ତ ଘଟିବା ପରେ ସଂଗ୍ରହାଳୟ ପାଇଁ ଏହା ଉପଯୁକ୍ତ ସ୍ଥାନ ନୁହେଁ ବୋଲି କୁହାଯାଇଥିଲା। ଫଳରେ ପ୍ରକଳ୍ପ କାର୍ଯ୍ୟ ବନ୍ଦ ରହିଥିଲା। ପରେ ୨୦୨୦ରେ ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନ ବନ୍ଦର ପଛ ପାର୍ଶ୍ୱସ୍ଥ ଜାଗମରା-ସୁନ୍ଦରପଦା ଯାଇଥିବା ରାସ୍ତା ନିକଟରେ ଜମି ଚିହ୍ନଟ କରାଗଲା। ବିମାନବନ୍ଦର ନିକଟରେ ସଂଗ୍ରହାଳୟ ହେଲେ ଦେଶ ବିଦେଶର ପର୍ଯ୍ୟଟକ ଏଠାକୁ ଆସିବେ ଓ ଭୁବନେଶ୍ୱରର ଗୌରବମୟ ଇତିହାସ ସମ୍ପର୍କରେ ଅବଗତ ହୋଇପାରିବେ ବୋଲି ଆଶା କରାଯାଉଥିଲା। ମାତ୍ର ସେଠାରେ ମଧ୍ୟ କାମ ଆରମ୍ଭ ହେଲା ନାହିଁ। ବିଭାଗୀୟ ଅଧିକାରୀଙ୍କ ଉଦାସୀନତା ମନୋଭାବ ପାଇଁ ଉକ୍ତ ଯୋଜନା ସରକାରୀ ଫାଇଲରେ ଅଟକି ରହିଛି।
ବନ୍ଦନା ସେଠୀ