ନୂଆଦିଲ୍ଲୀ, ୨ା୧୦: ଇରାନରୁ ପେଟ୍ରୋକେମିକାଲ ଏବଂ ପ୍ରେଟ୍ରୋଲିୟମ ଉତ୍ପାଦ କିଣୁଥିବା ଭାରତର ଏକ କମ୍ପାନୀ ଉପରେ ଆମେରିକା କଟକଣା ଲଗାଇଛି। ଇରାନୀୟ ଉତ୍ପାଦ କିଣି ତାହାକୁ ଦକ୍ଷିଣ ଓ ପୂର୍ବ ଏସିଆ ପଠାଉଥିବା ୮ କମ୍ପାନୀର ଅନ୍ତର୍ଜାତୀୟ ନେଟଓ୍ବର୍କ ଉପରେ ଆମେରିକାର ଅର୍ଥ ବିଭାଗ ଏହି କଟକଣା ଜାରି କରିଛି। ଇରାନକୁ ନେଇ କୌଣସି ଭାରତୀୟ କମ୍ପାନୀ ଉପରେ ଓ୍ବାଶିଂଟନ୍ର ଏପରି ପଦକ୍ଷେପ ପ୍ରଥମ ଘଟଣା। କଟକଣା ଲାଗିଥିବା ଏହି ଭାରତୀୟ କମ୍ପାନୀ ତିବାଲାଜୀ ପେଟ୍ରୋକେମ୍ ପ୍ରାଇଭେଟ ଲିମିଟେଡର କାର୍ଯ୍ୟାଳୟ ମୁମ୍ବାଇରେ ରହିଛି।
ବହୁ କଟକଣାର ଶିକାର ଇରାନର ଦଲାଲମାନେ ବାସ୍ତବରେ ଅନେକ ବୈଶ୍ୱିକ କମ୍ପାନୀଗୁଡ଼ିକୁ ପେଟ୍ରୋକେମିକାଲ ଓ ପେଟ୍ରୋଲିୟମ ଉତ୍ପାଦର ପରିବହନ ସହ ଆର୍ଥିକ କାରବାର କରିଥାନ୍ତି। ଆମେରିକାର କହିବା ଅନୁସାରେ, ତିବାଲାଜୀ ପେଟ୍ରୋକେମ୍ ଇରାନରୁ ଏହି ଉତ୍ପାଦ କିଣି ତାହାକୁ ଚାଇନା ପଠାଉଥିଲା। ଏଥିରେ ଇରାନରେ ଥିବା ହଂକଂର ଟ୍ରିଲିଆନ୍ସ ପେଟ୍ରୋକେମିକାଲ କୋ. ଲିଃ ନେଟଓ୍ବର୍କର ଶାଖା କମ୍ପାନୀ ଦଲାଲ ଭୂମିକା ନିଭାଇଛି। ଟ୍ରିଲିଆନ୍ସ ଲକ୍ଷ ଲକ୍ଷ ଡଲାର ମୂଲ୍ୟର ପେଟ୍ରୋଲିୟମ ଉତ୍ପାଦ ଭାରତକୁ ମଧ୍ୟ ପଠାଇଥିବା ଓ୍ବାଶିଂଟନ ଦାବି କରିଛି। ୨୦୧୯ରେ ଭାରତ ଇରାନରୁ ତୈଳ ଉତ୍ପାଦ ଆମଦାନୀ ନ କରିବାକୁ ନିଷ୍ପତ୍ତି ନେଇଥିଲା।
ଅମେରିକା ନେତୃତ୍ୱରେ ପାଶ୍ଚାତ୍ୟ ରାଷ୍ଟ୍ର ଇରାନ୍ ସହ ଜଏଣ୍ଟ କମ୍ପ୍ରେହେନ୍ଶିଭ୍ ପ୍ଲାନ୍ ଅଫ୍ ଆକ୍ସନ (ଜେସିପିଓଏ) ଆଣବିକ ଚୁକ୍ତି କରିଥିଲା। ଏଥିରେ ତେହରାନ୍ ଏହାର ନ୍ୟୁକ୍ଲିୟର ପ୍ରୋଗ୍ରାମରୁ ପଛକୁ ହଟିଥିଲା। ୨୦୧୮ରେ ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଏହି ଚୁକ୍ତିରୁ ଓହରିବା ସହ ଇରାନ ଉପରେ ଭାରୀ କଟକଣା ଲଗାଇଥିଲେ।
