ବାରିପଦା ଅଫିସ,୨୩ା୧:ମୟୂରଭଞ୍ଜ ଜିଲା ବାରିପଦା ସଦର ଥାନା ଅଧୀନ ଗୁଞ୍ଜୁସାହି ଅଞ୍ଚଳରେ ବଳାତ୍କାର ଉଦ୍ୟମକାରୀଙ୍କୁ ଜଣେ ମହିଳା କୋଦାଳରେ ପିଟି ହତ୍ୟା କରିଛନ୍ତି। ଗତ ରବିବାର ଏହି ଘଟଣା ଘଟିଥିବା ବେଳେ ୭ ଦିନ ପରେ ଗଳିତ ମୃତଦେହକୁ ପୋଲିସ ଜବତ କରିଛି। ମୃତକ ହେଲେ ଉକ୍ତ ଗ୍ରାମର ମଙ୍ଗଲ ମୁର୍ମୁ(୨୨)। ଘଟଣାରେ ଅଭିଯୁକ୍ତ କୁନି ମୁର୍ମୁଙ୍କୁ ପୋଲିସ ଗିରଫ କରିିଛି। ପୋଲିସ ସୂଚନା ଅନୁଯାୟୀ, ଗତ ୧୫ ତାରିଖ( ରବିବାର) ମକର ମେଳା ଦେଖିବାକୁ ଆସି ମଙ୍ଗଲ ଆଉ ଘରକୁ ଫେରି ନ ଥିଲେ। ମଙ୍ଗଲଙ୍କ ମା’ ମାଇସି ମୁର୍ମୁ ଖୋଜାଖୋଜି କରି ନ ପାଇବାରୁ ପରଦିନ ଥାନାରେ ଅଭିଯୋଗ କରିଥିଲେ। ପ୍ରାଥମିକ ତଦନ୍ତରୁ ମଙ୍ଗଲ ନିଶାସକ୍ତ ଅବସ୍ଥାରେ ସ୍ଥାନୀୟ ଜଣେ ମହିଳାଙ୍କୁ ଗୁଞ୍ଜୁସାହି ଜଙ୍ଗଲରେ ବଳାତ୍କାର ଉଦ୍ୟମ କରିଥିଲେ। ଏହି ସମୟରେ ମହିଳା ଜଣକ ମଙ୍ଗଲଙ୍କୁ ଏକ କୋଦାଳ ସାହାଯ୍ୟରେ ପିଟିପିଟି ହତ୍ୟା କରିଥିଲେ। ପରେ ସେଠାରୁ ପଳାଇଥିଲେ। ରବିବାର ଜଙ୍ଗଲରେ ଦୁର୍ଗନ୍ଧ ହେବାରୁ ଗ୍ରାମବାସୀ ଦେଖି ପୋଲିସକୁ ଖବର ଦେଇଥିଲେ। ପୋଲିସ ଓ ସାଇଣ୍ଟିଫିକ ଟିମ୍ ପହଞ୍ଚତ୍ ମୃତଦେହ ବ୍ୟବଚ୍ଛେଦ ପାଇଁ ପିଆର୍ଏମ୍ ହସ୍ପିଟାଲକୁ ପଠାଇଥିଲେ। ମଙ୍ଗଲଙ୍କ ମା’ ଗତ ସୋମବାର ସଦର ଥାନାରେ କରିଥିବା ନିଖୋଜ ମାମଲା ଆଧାରରେ ପୋଲିସ ପରିଚୟ ପାଇଥିଲା। ଏନେଇ ଥାନାରେ ଏକ ମାମଲା (ନଂ. ୧୯/୨୩) ରୁଜୁ ହୋଇଛି। ଅଭିଯୁକ୍ତ ମହିଳାଙ୍କୁ ଗିରଫ କରାଯାଇ ତଦନ୍ତ ଚାଲିଥିବା ଥାନା ଅଧିକାରିଣୀ ମଧୁସ୍ମିତା ମହାନ୍ତି କହିଛନ୍ତି।