ଭୁବନେଶ୍ୱର,୮।୨(ବ୍ୟୁରୋ): ଭୁବନେଶ୍ୱର ସହରାଞ୍ଚଳ ପୋଲିସ ଜିଲାରେ ଅପରାଧ, ଦୁର୍ଘଟଣା ଭଳି ଜରୁରୀକାଳୀନ ପରିସ୍ଥିତିରେ ଜନସାଧାରଣଙ୍କୁ ତ୍ୱରିତ ସହାୟତା ଦେବା ପାଇଁ କମିଶନରେଟ ପୋଲିସ ପକ୍ଷରୁ କାର୍ଯ୍ୟ କରୁଛି ଭିକ୍ଟର କଣ୍ଟ୍ରୋଲ ରୁମ୍। ଜାନୁୟାରୀ ମାସରେ ଏହି କଣ୍ଟ୍ରୋଲ ରୁମ୍ ଦ୍ୱାରା ୭୫୧୬ ଜରୁରୀକାଳୀନ ସେବା ପ୍ରଦାନ କରାଯାଇପାରିଛି। ଇଆର୍ଆର୍ଏସ୍-୧୧୨ ସେବାକୁ ବିଭିନ୍ନ ଥାନାଞ୍ଚଳରୁ ଆସିଥିବା ମୋଟ ୩୭୩୬ ଫୋନ୍ କଲ୍ ମାଧ୍ୟମରେ ପୋଲିସ ବିଭିନ୍ନ ଅସୁବିଧାରେ ଥିବା ଲୋକଙ୍କ ପାଖରେ ତୁରନ୍ତ ପହଞ୍ଚତ୍ ସହାୟତା ଯୋଗାଇ ଦେଇଛି। ସେହିପରି ଭୁବନେଶ୍ୱର ୟୁପିଡ଼ିରେ ୩୫ଟି ପିସିଆର୍ ଭ୍ୟାନ ରହିଛି। ଏହି ପିସିଆର୍ ଭ୍ୟାନ କର୍ମଚାରୀମାନେ ୩୭୮୦ କଲ୍ ପାଇ ଗଣ୍ଡଗୋଳର ପ୍ରାକ୍ ସମାଧାନ କରିବା ସହ ଅପରାଧୀଙ୍କୁ କାବୁ କରିଛନ୍ତି। ଏଥିସହ ପିସିଆର୍ କର୍ମଚାରୀମାନେ ଦୁର୍ଘଟଣାର ଶିକାର ପୀଡିତଙ୍କୁ ଆବଶ୍ୟକ ଡାକ୍ତରୀ ସେବା ପ୍ରଦାନ କରାଇବାର ସମସ୍ତ ବ୍ୟବସ୍ଥା କରିବା ସହ ଅନ୍ୟାନ୍ୟ ସହାୟତା ପ୍ରଦାନ ପାଇଁ ଉଦ୍ୟମ କରିଛନ୍ତି। ଏତଦ୍ବ୍ୟତୀତ କୋଭିଡ଼ କଟକଣା ତଥା ରାତ୍ରକାଳୀନ କର୍ଫ୍ୟୁ ବ୍ୟବସ୍ଥାକୁ କାର୍ଯ୍ୟକାରୀ କରିବା ସହିତ ଜନସାଧାରଣଙ୍କୁ ସରକାରଙ୍କ ଦ୍ୱାରା ଜାରି କରାଯାଇଥିବା ସତର୍କତା ତଥା ନିୟମାବଳୀ ବିଷୟରେ ସଚେତନ କରିବାରେ ପିସିଆର୍ ପ୍ରମୁଖ ଭୂମିକା ଗ୍ରହଣ କରିଆସିଛି।