ଭବାନୀପାଟଣା,୧୨ା୧(ଉତ୍ତମ କୁମାର ଦାଶ): କଳାହାଣ୍ଡି ଜିଲା ଭବାନୀପାଟଣା ସଦର ଥାନା ଅନ୍ତର୍ଗତ ଭଟାଙ୍ଗପଦର ପଞ୍ଚାୟତ କନର୍ଲା ଗାଁରେ ଆଦିବାସୀଙ୍କ ପର୍ବ ଚାଲିଥିବା ସମୟରେ ଅବକାରୀ ଚଢ଼ାଉ ଓ ପରବର୍ତ୍ତୀ ଆକ୍ରମଣ-ପ୍ରତିଆକ୍ରମଣର ନିରପେକ୍ଷ ତଦନ୍ତ ଦାବି
କରିଛି ଜିଲା ଦଳିତ ଆଦିବାସୀ ମହାସଂଘ। ପୁରୁଷ-ମହିଳା ଓ ଶିଶୁଙ୍କ ଉପରେ ପୋଲିସ-ଅବକାରୀ ବିଭାଗ ଅମାନୁଷିକ ଆକ୍ରମଣ କରିଥିବା ଅଭିଯୋଗ କରି ମହାସଂଘ ଦୃଢ଼ କାର୍ଯ୍ୟାନୁଷ୍ଠାନ ଦାବି କରିଛି।
ପ୍ରାପ୍ତସୂଚନା ଅନୁସାରେ, ଗତ ବୁଧବାର ଅପରାହ୍ନରେ କନର୍ଲା ଗାଁରେ ସେମିଯାତ୍ରା ତଥା ଟୋକିପରବ ଚାଲିଥିଲା। ଏହି ସମୟରେ ଅବକାରୀ ବିଭାଗ ଅତର୍କିତ ଚଢ଼ଉ କରିଥିଲା।କର୍ମଚାରୀମାନେ ଦେଶୀ ରନ୍ଧା ମଦ ଜବତ କରିବା ନାଁରେ ଜୋତାପିନ୍ଧି ଧରଣୀଗୁଡ଼ି ଓ ପୂଜାସ୍ଥଳ ମଧ୍ୟକୁ ପଶିଯିବାରୁ ଗାଁ ଲୋକେ ବାରଣ କରିଥିଲେ। ଅବକାରୀ ବିଭାଗର କର୍ମଚାରୀମାନେ ଗାଁ ଲୋକଙ୍କୁ ଦେଶୀ ମଦ ରାନ୍ଧି ବିକ୍ରି କରୁଛ ବୋଲି ଅଭିଯୋଗ କରି ଗାଳିଗୁଲଜ କରିବା ସହିତ ପୂଜାସ୍ଥଳରେ ଫିଙ୍ଗାଫୋପଡ଼ା କରିଥିଲେ।
ଏହି ଚଢ଼ାଉକୁ ଗାଁ ଲୋକେ ବିରୋଧ କରିବାରୁ ଉଭୟପକ୍ଷ ମଧ୍ୟରେ ଯୁକ୍ତିତର୍କ ଓ ଧସ୍ତାଧସ୍ତି ହୋଇଥିଲା। ଗାଁ ଲୋକଙ୍କ ପ୍ରତିବାଦ ଓ କମ ସଂଖ୍ୟକ ଅବକାରୀ କର୍ମଚାରୀ ଥିବାରୁ ସେମାନେ ଫେରିଆସି ପୁଣି ସକାଳେ ପୋଲିସ ଫୋର୍ସ ସହିତ ଗାଁକୁ ଯାଇ ପୁରୁଷ, ମହିଳା
ସମସ୍ତଙ୍କୁ ଘରୁ ଡାକିଆଣି ତଥା ଗୋଡ଼ାଇ ଗୋଡ଼ାଇ ନିର୍ଘାତ ମାଡ଼ ମାରିଥିବା ଅଭିଯୋଗ ହୋଇଛି।
ଶନିବାର ଘଟଣାସ୍ଥଳକୁ ଜିଲା ଦଳିତ ମହାସଂଘର ସଭାପତି ପରମାନନ୍ଦ ମାଝୀ, କାର୍ଯ୍ୟକାରୀ ସଭାପତି ଧର୍ମେନ୍ଦ୍ର ନାଏକ, ମହାସଚିବ ଦେବୀପ୍ରସାଦ ସିନ୍ଦୂର, ସାଧାରଣ ସଂପାଦକ ସୁଶୀଲ ବାଗ, ସଦସ୍ୟ ରମେଶ ଚନ୍ଦ୍ର ନାଏକ ପ୍ରମୁଖ କନର୍ଲା ଗାଁ ଗସ୍ତ କରି ତଥ୍ୟ ସଂଗ୍ରହ କରିଛନ୍ତି।ସେମାନଙ୍କ କହିବା ଅନୁସାରେ, ଅବକାରୀ ବିଭାଗ ଆଦିବାସୀଙ୍କ ଧର୍ମୀୟ ବିଶାସ ଓ ପରମ୍ପରା ଉପରେ ଆଘାତ ପହଞ୍ଚାଇବାରୁ ଏଭଳି ପ୍ରତିକ୍ରିୟା ପ୍ରକାଶ ପାଇବା ସ୍ବାଭାବିକ । ଗତ ତିନିଦିନ ହେଲା ଗାଁରେ ସମସ୍ତଙ୍କ ଘରେ ତାଟି କବାଟ ପଡ଼ିଥିବା ବେଳେ ପୋଲିସର ଗିରଫଦାରୀ ଭୟରେ ଗାଁର ପୁରୁଷ ମହିଳା ପ୍ରବଳ ଶୀତ ସତ୍ତ୍ବେ ପିଲାଛୁଆ ଧରି ଜଙ୍ଗଲରେ ଲୁଚିଛନ୍ତି। ଗାଁର ୩ ଜଣ ଶିଶୁ ପାଞ୍ଚ ଜଣ ବୁଢ଼ାବୁଢ଼ୀଙ୍କ ସମେତ ୩୨ ଜଣ ପୋଲିସ ଓ ଅବକାରୀ କର୍ମଚାରୀଙ୍କ ମାଡ଼ରେ ଗୁରୁତର ଆହତ ହୋଇଥିବା ସେମାନେ ଦର୍ଶାଇଛନ୍ତି। ମହାସଂଘ ତରଫରୁ ଏ ନେଇ ଦୃଷ୍ଟି ଆକର୍ଷଣ କରିବା ସହିତ ଏକ ପାଞ୍ଚ ଦଫା ସମ୍ବଳିତ ଦାବିପତ୍ର ଏସ୍ପିଙ୍କୁ ପ୍ରଦାନ କରାଯାଇଛି।
