ନୂଆପଡ଼ା,୨୪।୭(ମକାରୁ ବେମାଲ): ନୂଆପଡା ଜିଲାରେ ହିଂସ୍ରଜନ୍ତୁଙ୍କ ଆତଙ୍କରେ ଶିକ୍ଷା ଓ ଚାଷ କାର୍ଯ୍ୟରେ ବାଧାପ୍ରାପ୍ତ ହୋଇଛି। ଜିଲାର ଉତ୍ତର ଦିଗକୁ ସିନାପାଲି ବ୍ଲକ ସୀମାନ୍ତରେ ହାତୀ ଆତଙ୍କ ଲାଗିରହିଥିବା ବେଳେ ଦକ୍ଷିଣରେ ନୂଆପଡା ବ୍ଲକରେ ବାଘ ଆତଙ୍କ ଖେଳାଉଛି। ଜିଲାର ମଧ୍ୟ ଭାଗ କୋମନା ବ୍ଲକରେ ଭାଲୁ ଆତଙ୍କରେ ଲୋକେ ଆତଙ୍କିତ। ଜଲାରେ ବନ୍ୟଜନ୍ତୁଙ୍କ ଦୌରାମତ୍ ଯୋଗୁ ଲୋକେ ଆତଙ୍କିତ ହୋଇ ପିଲାଛୁଆଁଙ୍କୁ ବାହାରକୁ ଛାଡୁନାହାନ୍ତି। ଫଳରେ ଛାତ୍ରୀଛାତ୍ରମାନେ ସ୍କୁଲକୁ ଯାଉ ନ ଥିବାରୁ ପାଠପଢ଼ାରେ ବ୍ୟାହତ ହେଉଛି। ବର୍ତ୍ତମାନ ଚାଷ ସମୟ ବାଘ, ଭାଲୁ, ହାତୀ ଆତଙ୍କରେ ଭୟଭୀତ ହୋଇ ଲୋକେ ଚାଷ ଜମିକୁ ମଧ୍ୟ ଯାଉନାହାନ୍ତି। ଫଳରେ ଚାଷ କାର୍ଯ୍ୟ ମଧ୍ୟ ବାଧାପ୍ରାପ୍ତ ହେଉଛି। ଚାଷୀଙ୍କ ରୁଆ, ବେଉଷଣ କାର୍ଯ୍ୟ ବତର (ଉପଯୁକ୍ତ ପାଣି) ହୋଇଥିଲେ ମଧ୍ୟ ଚାଷ ଜମିକୁ ଯିବା ପାଇଁ ଚାଷୀ ଭୟ କରୁଛି। କୋମନା ବିଜାଖମନ ଜଙ୍ଗଲରେ ଗତ ୧୬ ତାରିଖରେ ଭାଲୁ ଆକ୍ରମଣରେ ବାପାଙ୍କ ମୃତ୍ୟୁ ହୋଇଥିବା ବେଳେ ପୁଅ ଗୁରୁତର ଆହତ ହୋଇଛନ୍ତି। ପୁଣି ୧୮ ତାରିଖରେ ସେହି ଜଙ୍ଗଲରେ ୪ଜଣ ବନ କର୍ମଚାରୀଙ୍କୁ ଭାଲୁ ଆକ୍ରମଣରେ ଜଣେ ବନ କର୍ମଚାରୀଙ୍କ ମୃତ୍ୟୁ ହୋଇଥିବା ବେଳେ ୩ଜଣ ଆହତ ହୋଇନ୍ତି। ଏ ସବୁ ଶୁଣି ଲୋକେ ଅଧିକ ଆତଙ୍କିତ ହୋଇପଡିଛନ୍ତି। ଗତ ୨୦ରେ ସଦର ରେଞ୍ଜ ଆମାନାରା ପଞ୍ଚାୟତ ତରିଆମହୁଆଭଟାରେ ଗୋବିନ୍ଦ ନାଏକଙ୍କ ବାଛୁରିକୁ ଗୁହାଳରୁ ବାଘ ଖାଇବା ପରେ ଅଞ୍ଚଳରେ ଆତଙ୍କିତ ଅବସ୍ଥାରେ ଅଛନ୍ତି। ତରିଆମହୁଆଭଟା ପ୍ରସ୍ତାବିତ ସଂରକ୍ଷିତ ମୁଷରଙ୍ଗୀ ଜଙ୍ଗଲକୁ ଲାଗି ୧୦ଟି ଡୋଙ୍ଗରୀ (ଛୋଟ ପାହାଡ) ରହିଛି। ଏହି ଡଙ୍ଗର ମଧ୍ୟ ଭାଗରେ ତରିଆମହୁଆଭଟା ରହିଥିବା ବେଳେ ଜଙ୍ଗଲକୁ ଲାଗି ପାୱାରତୋଳା, ସୁକ୍ଲିଡୁବରୀ, ଜରିଡିହି, ମୋହରାଡିହି ଆଦି ଗାଁ ରହିଛି। ପାହାଡିଆ ଓ ଜଙ୍ଗଲରେ ଦିନ ବେଳେ ବାଘ ବୁଲୁଥିବାରୁ ରାସ୍ତାଘାଟ ଶୂନଶାନ ହୋଇ ପଡୁଛି। ଗାଁରେ ମଧ୍ୟ ତାଟି କବାଟ ବନ୍ଦ ରହୁଥିବାରୁ ଜନଶୂନ୍ୟ ଭଳି ଜଣାପଡୁଛି। ଭୟରେ ଛାତ୍ରୀଛାତ୍ର ବିଦ୍ୟାଳୟ ଯାଉ ନ ଥିବା ବେଳେ ଚାଷୀମାନେ ଚାଷ ଜମିକୁ ଯାଉନାହାନ୍ତି। ଲୋକଙ୍କ ସୁରକ୍ଷା ଦୃଷ୍ଟିରୁ କୋମନା ବନ ବିଭାଗ ପକ୍ଷରୁ ବିଜାଖମନ ଜଙ୍ଗଲରେ ଲଟାବୁଦା ସଫା କରାଯାଉଥିବା ବେଳେ ନୂଆପଡା ବନ ବିଭାଗ ଦେଖାନାହିଁ। ଆତଙ୍କିତ ଅଞ୍ଚଳକୁ ମଧ୍ୟ ଯାଉ ନ ଥିବା ଲୋକେ ଅଭିଯୋଗ କରିଛନ୍ତି। ଏ ସଂକ୍ରାନ୍ତରେ ନୂଆପଡା ବନ ବିଭାଗ ରେଞ୍ଜର ବିନିତା ଭୋଇଙ୍କୁ ଯୋଗାଯୋଗ କରିବାରୁ ହୋଇ ପାରିଲାନାହିଁ। ଚାଷୀଙ୍କୁ ବନଜନ୍ତୁଙ୍କ କବଳରୁ ସୁରକ୍ଷା ଯୋଗାଇ ନ ଦେଲେ ଚାଷ କାର୍ଯ୍ୟ ବାଧାପ୍ରାପ୍ତ ହୋଇ ଦାଦନ ସଂଖ୍ୟା ଜିଲାରେ ବଢିବ ବୋଲି ବୃଦ୍ଧିଜିବୀ ମହଲରେ ଚର୍ଚ୍ଚା ହେଉଛି।