ମୋହନା,୯ା୬: ବସୁଧା ଯୋଜନା ଓ ଅମୃତ ସରୋବର ଯୋଜନା ନାମରେ ରାଜ୍ୟ ସରକାର କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି। ହେଲେ ଏମିତି କିଛି ଗାଁ ରହିଛି ଯେଉଁଠି ଏହି ଯୋଜନାର ସୁଫଳ ପାଉନାହାନ୍ତି ଲୋକେ। ଗାଁରେ ଜଳସମସ୍ୟା ପାଇଁ ପ୍ରଶାସନକୁ ବାରମ୍ବାର ଗୁହାରି କରି କରି ନୟାନ୍ତ ହେବା ପରେ ଶେଷରେ ନିଜ ଉଦ୍ୟମରେ ଗ୍ରାମବାସୀ ପୋଖରୀ ଖୋଳିଛନ୍ତି। ପିଲାଠାରୁ ବୁଢା ପର୍ଯ୍ୟନ୍ତ ସମସ୍ତେ ଲାଗିପଡିଛନ୍ତି ପୋଖରୀ ଖୋଳାରେ। ଏହା ଦେଖିବାକୁ ମଳିଛି ଗଜପତି ଜିଲା ମୋହନା ବ୍ଲକ ମାଣିକପୁର ପଞ୍ଚାୟତ ମଳିକ ସାହିର। ଏହି ଗାଁ ରେ ୨୫ ପରିବାରର ପ୍ରାୟ ୩ ଶହ ଜନସାଧାରଣ ବସବାସ କରନ୍ତି। ହେଲେ ଗାଁରେ ଲାଗି ରହିଛି ଜଳ ସମସ୍ୟା। ଗାଁ ମୁଣ୍ଡରେ ଦୁଇଟି ପୋଖରୀ ଅଛି ଗୋଟିଏ ଶୁଖିଯାଇ ଲଟାବୁଦା ମାଡି ଗଲାଣି ଅନ୍ୟଟି ବର୍ଷା ହେଲେ ସ୍ବଳ୍ପ ପାଣି ରହୁଛି ତା’ପରେ ଶୁଖିଯାଉଛି। ଯେଉଁଠି ପୋଖରି ନାହିଁ ସେଠୀ ନିର୍ମାଣ ହୋଇଛି ଲୁଗା ପଟା ବଦଳାଇବା ଗୃହ। ଯେଉଁଠି ପାଣି ଝରଣା ଅଛି ସେଠାରେ ବର୍ଷ ସାରା ପାଣି ଝରୁଛି। କିନ୍ତୁ ସେଠାରେ ସ୍ଥାୟୀ ଭାବେ ଗୋଟିଏ ପୋଖରୀ ଖନନ ପାଇଁ ପଞ୍ଚାୟତଠାରୁ ଆରମ୍ଭ କରି ଉଚ୍ଚସ୍ତରୀୟ ଅଧିକାରୀଙ୍କୁ ଗୁହାରୀ ଜଣାଇଆସୁଥିଲେ ଗ୍ରାମବାସୀ। ହେଲେ କେହି ବୁଝିଲେନି। ତେଣୁ ଘରେ ଘରେ ଚାନ୍ଦା ଆଦାୟ କରି ଜେସିବି ସାହାର୍ଯ୍ୟରେ କିଛି ଖୋଳିବା ପରେ ଟଙ୍କା ନିଅଣ୍ଟ ହେବାରୁ ନିଜ ଉଦ୍ୟମରେ ପୋଖରୀ ଖୋଳା ଚାଲିଛି। ଅନ୍ୟପଟେ ଏହି ଗାଁରେ ଗୋଟିଏ ସୋଲାର ଜଳଯୋଗାଣ ବ୍ୟବସ୍ଥା ରହିଛି। କିନ୍ତୁ ସେଥିରେ ସ୍ବଳ୍ପ ପରିମାଣର ପାଣି ବାହାରୁଥିବାରୁ ଅସୁବିଧା ହେଉଛି। ଗାଁ ନିକଟ ରାସ୍ତା କଡରେ ଗୋଟିଏ ନଳକୂପ ଥିଲେ ମଧ୍ୟ ସେଥିରୁ କଳଙ୍କିଯୁକ୍ତ ହଳଦିଆ ପାଣି ବାହାରୁଛି। ତେଣୁ ତାହାକୁ ପାନୀୟ ଜଳ ରୂପେ ବ୍ୟବହାର କରିବା କଷ୍ଟସାଧ୍ୟ ଥିବା ଅଭିଯୋଗ କରିଛନ୍ତି। ଏପରିକି ଭୋଟ ସମୟରେ ପ୍ରତିଶୃତିର ପାହାଡ ଥୋଇ ଦିଅନ୍ତି ଭୋଟ ସରିଲେ କାମ ହେବାର ନା ଧରୁନାହାନ୍ତି ବୋଲି ଗ୍ରାମବାସୀ କହିଛନ୍ତି। ତେଣୁ ଗାଁରେ ଥିବା ପୋଖରୀ ଗୁଡିକୁ ପୁନରୁଦ୍ଧାର କରି ଅମୃତ ସରୋବର ନିର୍ମାଣ କରିବା ସହ ବିଶୁଦ୍ଧ ପାନୀୟ ଜଳ ଯୋଗାଇବା ପାଇଁ ସରକାରଙ୍କୁ ଦାବି କରିଛନ୍ତି ଗ୍ରାମବାସୀ। ଏନେଇ ମୋହନା ବିଡ଼ିଓ ତପସ୍ବନୀ ହାଂସଦାଙ୍କୁ ଯୋଗାଯୋଗ କରିଥିଲେ ସେ କୌଣସି ପ୍ରତିକ୍ରିୟା ଦେଇନାହାନ୍ତି।