ଚଣ୍ଡିଖୋଲ, ୧୮ା୬’(ପ୍ରଦୀପ୍ତ କୁମାର ପୃଷ୍ଟି):ଆଧୁନିକତାର ସାମାଜିକ ବ୍ୟବସ୍ଥା ଧୀରେଧୀରେ ଆମ ପୁରୁଣା ସଂସ୍କୃତି ଓ ଐତିହ୍ୟ ହଜାଇ ଦେଉଥିବାବେଳେ ଏବେବି କେତେକ ସ୍ଥାନରେ ଆମର ପୁରୁଣା ପାଲା ସଂସ୍କୃତି ବଞ୍ଚତ୍ରହିଛି। ୮୩ ବର୍ଷ ଧରି ପାଲା ଅନବରତ ଆଜି ପର୍ଯ୍ୟନ୍ତ ଚାଲୁରହିଛି। ଏହା ଧୀରେଧୀରେ ଗୋଟିଏ ଦଳରୁ ଆରମ୍ଭ ହୋଇ ବାଦୀପାଲାରେ ପରିଣତ ହୋଇ ଚାଲିଥିଲାବେଳେ ପିଢ଼ି ପରେ ପିଢ଼ି ଏହାକୁ ଉଜ୍ଜୀବିତ କରି ରଖିବା ନିଶ୍ଚିତ କଷ୍ଟକର ବ୍ୟାପାର। ତେବେ ଯେତେ ଝଡ଼ ଖଞ୍ଜା ଆସୁ ପଛେ ୩ ଗ୍ରାମର ଲୋକେ ଆଜି ପର୍ଯ୍ୟନ୍ତ ଏହି ପରମ୍ପରାକୁ ପ୍ରତ୍ୟେକ ବର୍ଷ ରଜରେ ପାଳନ କରନ୍ତି। ରଜ ୩ ଦିନ ଧରି ଏଠାରେ ପାଲା ପରିବେଷଣ କରାଯାଏ। ଏଭଳି ନିଆରା ତଥା ସଂସ୍କୃତିପ୍ରେମୀ ବାଦୀପାଲା ଅନୁଷ୍ଠିତ ହୋଇଆସୁଛି ଯାଜପୁର ଜିଲା ବଡ଼ଚଣା ବ୍ଲକ ଅନ୍ତର୍ଗତ ପଲେଇ ପଞ୍ଚାୟତର କେଶରାଇପୁର, କଟକ ଜିଲା ମାହାଙ୍ଗା ବ୍ଲକ ଅନ୍ତର୍ଗତ ଲଳିତଗିରି ଓ ରହାଡ଼ଗିରି ଗ୍ରାମରେ।
ଗ୍ରାମବାସୀଙ୍କ କହିବା ଅନୁସାରେ ୧୯୪୦ରେ ଏହି ୩ ଗ୍ରାମର ସ୍ବର୍ଗତ ବେବର୍ତ୍ତା ହରିବଲ୍ଲଭ ଦାସ, ନେତ୍ରାନନ୍ଦ ଦାସ, ବିଷ୍ଣୁଚରଣ ତ୍ରିପାଠୀ, ଧ୍ରୁବଚରଣ ସିଂହ, ଦୋଳ ଗୋବିନ୍ଦ ଦାସ, ବୈଷ୍ଣବ ପାତ୍ର ଓ ସନାତନ ସାହୁଙ୍କ ପ୍ରଚେଷ୍ଟାରେ ପାଲା ସଂସ୍କୃତି ଆରମ୍ଭ ହୋଇଥିଲା। ମହାଭାରତ, ରାମାୟଣ ଓ ବିଭିନ୍ନ ପୁରାଣ ସହିତ ଦେଶାତ୍ମବୋଧକ ଭାବନା ଜାଗ୍ରତ ହେଉଥିଲା। ଆମ ଗ୍ରାମର ଐତିହ୍ୟ ଓ ସଂସ୍କୃତି ଏହି ପାଲା ମାଧ୍ୟମରେ ଲୋକେ ଜାଣିଥିଲେ। ସେଥିପାଇଁ ଏହି ପରମ୍ପରାକୁ ବଞ୍ଚାଇ ରଖିବାକୁ ଆମେ ଉଦ୍ୟମ କରିଛୁ। ଚଳିତ ବର୍ଷ ଗାୟକ ସୁଧାକର କାଶୀନାଥ ଜେନା ଓ ଗାୟକ ବୈଷ୍ଣବ ଦୋଳ ଗୋବିନ୍ଦ ଅଧିକାରୀ ପାଲା ପରିବେଷଣ କରିଛନ୍ତି। ଉଭୟ ଗାୟକ ୩ ଘଣ୍ଟା କରି ରଜ ତିନିଦିନ ପାଲା ପରିବେଷଣ କରିଛନ୍ତି। ଆଜିର ଯୁବପିଢ଼ି ସେହି ପରମ୍ପରାକୁ ବଜାଇ ରଖିବାରେ ସକ୍ଷମ ହୋଇଛନ୍ତି। ବହୁ ବଡ଼ବଡ଼ ଗାୟକ ଏଠାକୁ ଆସି ପାଲା ପରିବେଷଣ କରିଛନ୍ତି। ଏହି ବାଦୀପାଲା ମହୋତ୍ସବକୁ ଶରତ ଚନ୍ଦ୍ର ଦାସ, ଗୋବିନ୍ଦ ଚନ୍ଦ୍ର ସାମଲ, ପ୍ରଦୀପ୍ତ ପାତ୍ର, ଅନିରୁଦ୍ଧ ପାତ୍ର, ବେବର୍ତ୍ତା ଅଜୟ ବଲ୍ଲଭ ଦାସ, ଅଙ୍କୁର ସାମଲ ଓ ହରେକୃଷ୍ଣ ସିଂହ ପ୍ରମୁଖ ପରିଚାଳନା କରିଥିଲେ। ଆମେ ବଞ୍ଚିଥିବା ପର୍ଯ୍ୟନ୍ତ ଆମ ପିତୃ ପୁରୁଷମାନେ ଆରମ୍ଭ କରିଥିବା ଏହି ପାଲା ପରମ୍ପରା ବଞ୍ଚାଇ ରଖିବାକୁ ଚେଷ୍ଟା କରିବୁ ବୋଲି ସେମାନେ ପ୍ରକାଶ କରିଛନ୍ତି।
