ନବରଙ୍ଗପୁର,୨୩ା୧(ବି.ପ୍ର.):ଆବାସ ଯୋଜନା ଗୃହ ଆବଣ୍ଟନରେ ଅନିୟମିତତା ଅଭିଯୋଗ କରି ନବରଙ୍ଗପୁର ବ୍ଲକ ବଡ଼କୁମୁଲି ପଞ୍ଚାୟତ ଅନ୍ତର୍ଗତ ଚିକିଲି ଗ୍ରାମବାସୀ ରବିବାର ପଞ୍ଚାୟତ କାର୍ଯାଳୟରେ ତାଲା ଠୁଙ୍କିଛନ୍ତି। ଫଳରେ ଜିଆର୍ଏସଙ୍କୁ ଗ୍ରାମବାସୀ ୩ ଘଣ୍ଟା ଧରି ବନ୍ଦ କୋଠରୀରେ ରହିବାକୁ ପଡ଼ିଛି। ସେହିପରି ବିଡିଓ ଶିବ ପ୍ରସାଦ ପଟ୍ଟନାୟକଙ୍କୁ ମଧ୍ୟ ଗାଁର ମହିଳା ଘେରିଥିଲେ।
ଚିକିଲି ଗ୍ରାମରେ ଆବାସ ଯୋଜନାରେ ଦୃର୍ନୀତି ଏବଂ ପିସି କରବାର ହୋଇଛି। ପ୍ରକୃତ ହିତାଧିକାରୀଙ୍କୁ ଆବାସ ଯୋଜନାରେ ସାମିଲ ନ କରି ବଡ଼ବଡ଼ଆଙ୍କୁ ଆବାସ ଗୃହ ଦିଆଯାଇଛି। ଚାଉଳ, ପେନସନ ପ୍ରତି ମାସରେ ଠିକ୍ ସମୟରେ ପ୍ରଦାନ କରାଯାଉନାହିଁ ବୋଲି ଗ୍ରାମବାସୀ ଅଭିଯୋଗ କରିଛନ୍ତି। ଚିକିଲି ଗ୍ରାମରେ ରାସ୍ତା, ପାଣି ଏବଂ ବିଭିନ୍ନ ସମସ୍ୟା ନେଇ ଗ୍ରାମବାସୀ ସରପଞ୍ଚଙ୍କୁ ଜଣାଇଥିଲେ। ହେଲେ ସରପଞ୍ଚ ଏହାକୁ ଅଣଦେଖା କରିଥିଲେ। ଫଳରେ ଗ୍ରାମର ମହିଳା ଏବଂ ପୁରୁଷ ମିଳିତ ଭାବେ ପଞ୍ଚାୟତ କାର୍ଯାଳୟରେ ତାଲା ପକାଇବାକୁ ବାଧ୍ୟ ହୋଇଥିବା ପ୍ରକାଶ କରିଛନ୍ତି। ସମସ୍ୟାର ସମାଧାନ ନ ହେବା ପର୍ଯ୍ୟନ୍ତ ଧାରଣାରୁ ହଟିବୁ ନାହିଁ ବୋଲି ଗ୍ରାମବାସୀ କହିଛନ୍ତି। ଜିଆର୍ଏସ୍ ପଞ୍ଚାୟତ କାର୍ଯ୍ୟାଳୟ ଭିତରେ ଥିବାବେଳେ ଗ୍ରାମବାସୀ ତାଲା ଆମେ ଖୋଲିବୁ ନାହିଁ ବୋଲି ଜିଦ୍ରେ ଗେଟ୍ ବାହାରେ ବସିଥିବା ଦେଖିବାକୁ ମିଳିଥିଲା। ପରେ ନବରଙ୍ଗପୁର ବିଡିଓ, ଜିପିଓ, ସରପଞ୍ଚ ଏବଂ ପୋଲିସ ପହଞ୍ଚି ଗ୍ରାମବାସୀଙ୍କୁ ବୁଝାଶୁଝା କରିବା ପରେ ପଞ୍ଚାୟତ କାର୍ଯ୍ୟାଳୟରୁ ତାଲା ଖୋଲି ଜିଆର୍ଏସ୍ଙ୍କୁ ମୁକ୍ତ କରିଥିଲେ। ବିଡିଓଙ୍କୁ ଗ୍ରାମବାସୀ ସମସ୍ୟା ଜଣାଇଥିଲେ ମଧ୍ୟ ସମସ୍ୟାର ସମାଧାନ ହୋଇନାହିଁ। ଲିଖିତ ଭାବେ ଅଫିସରେ ସମସ୍ୟା ଜଣାଇବାକୁ ବିଡିଓ ଗ୍ରାମବାସୀଙ୍କୁ କହିଛନ୍ତି। ତେବେ ଗ୍ରାମବାସୀ ବିଡିଓଙ୍କ କଥାକୁ ନାପସନ୍ଦ କରିବା ସହ ବିଡିଓଙ୍କ ଗାଡ଼ି ଅଟକାଇ ଘେରାଉ କରିଥିଲେ। ପୂର୍ବରୁ ମଧ୍ୟ ବିଡିଓ ଏଭଳି ପ୍ରତିଶ୍ରୁତି ଦେଇ ଠକିଛନ୍ତି ବୋଲି ସେମାନେ କହିଛନ୍ତି। ବିଡିଓ ମଧ୍ୟ କୌଣସି ପ୍ରତିଶ୍ରୁତି ନ ଦେଇ ଚାଲିଯାଇଥିବା ଗ୍ରାମବାସୀ କହିଛନ୍ତି। ଅନ୍ୟପକ୍ଷରେ ଦୁଇଦିନ ମଧ୍ୟ୍ୟରେ ସମସ୍ୟାର ସମାଧାନ ନ ହେଲେ ନବରଙ୍ଗପୁର ବ୍ଲକ କାର୍ଯାଳୟ ଏବଂ ଜିଲାପାଳଙ୍କ କାର୍ଯାଳୟ ସମ୍ମୁଖରେ ଧାରଣା ଦିଆଯିବ ବୋଲି ଚେତାବନି ଦିଆଯାଇଛି।