ଖପ୍ରାଖୋଲ, ୧୩ା୧୨(ଡି.ଏନ୍.ଏ.) ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ବାଘମୁଣ୍ଡ ପଞ୍ଚାୟତ ଅନ୍ତର୍ଗତ ଖୋଲାଗଡ ଗାଁରେ ଦେଖାଦେଇଛି ପାନୀୟ ଜଳ ସମସ୍ୟା। ଗାଁରେ ଥିବା ୪ଟି ନଅକୂପରୁ ତିନୋଟି ଦୁଇମାସ ହେଲା ଅଚଳ ହୋଇପଡିଛି। ଅନ୍ୟ ନଳକୂପରେ ସୋଲାର ପମ୍ପ ଲଗାଯାଇଥିଲେ ବି ଠିକ୍ରେ ପାଣି ବାହାରୁନାହିଁ। ଏ ନେଇ ଗ୍ରାମବାସୀ ବାରମ୍ବାର ପଞ୍ଚାୟତ କର୍ତ୍ତୃପକ୍ଷଙ୍କୁ ଜଣାଇଥିଲେ ବି ତାହା ମରାମତି ହେଉନାହିଁ। ଅନ୍ୟପକ୍ଷରେ ଗାଁରେ ଥିବା କୂଅଗୁଡିକରୁ ଭଲ ପାଣି ବାହାରୁନାହିଁ। ଗ୍ରୀଷ୍ମଋତୁରେ ପରିସ୍ଥିତି ସଙ୍ଗିନ। ଫଳରେ ଗାଁରେ ବସବାସ କରୁଥିବା ୨୫୦ରୁ ଊର୍ଦ୍ଧ୍ୱ ଲୋକେ ବର୍ଷସାରା ପାନୀୟ ଜଳ ପାଇଁ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଅନନ୍ୟୋପାୟ ହୋଇ ସେମାନେ ପୋଖରୀ ଓ ଯୋରର ଦୂଷିତ ପାଣିକୁ ପାନୀୟ ଜଳଭାବେ ବ୍ୟବହାର କରିବାକୁ ବାଧ୍ୟ ହେଉଥିବା ଗାଁର ଶ୍ୟାମସୁନ୍ଦର ବାରିକ, ସୁଶୀଲ ପଧାନ, ଉପ ବରିହା, ଉଗ୍ରସେନ ପରୁଆ ପ୍ରମୁଖ ଅଭିଯୋଗ କରିଛନ୍ତି। ବ୍ଲକ ସଦର ମହକୁମାଠାରୁ ଏହି ଗାଁର ଦୂରତା ପ୍ରାୟ ୪୭କି.ମି। ଅବସ୍ଥିତି ଦୃଷ୍ଟିରୁ ପ୍ରଶାସନର ଦୃଷ୍ଟି ଆଢୁଆଳରେ ରହି ଯାଉଥିବା ଏହି ଗାଁକୁ ଏବେ ପ୍ରଧାନମନ୍ତ୍ରୀ ସଡ଼କ ଯୋଜନା ଦ୍ୱାରା ସଂଯୋଗ ହୋଇଛି। ତଥାପି ଅନେକ ମୌଳିକ ସୁବିଧା ପାଇବାରୁ ଗ୍ରାମବାସୀ ବଞ୍ଚିତ ରହିଛନ୍ତି। ପାନୀୟ ଜଳାଭାବ ନେଇ ବିଡିଓ ତରଣୀ ସୁନାଙ୍କୁ ପଚାରିବାରୁ ନଳକୂପ ଅଚଳ ନେଇ ମୋ ପାଖରେ କୌଣସି ଖବର ନାହିଁ। ତେବେ ବିଭାଗୀୟ କର୍ମଚାରୀଙ୍କୁ ପଠାଇ ଯୁଦ୍ଧକାଳୀନଭିତ୍ତିରେ ନଳକୂପ ମରାମତି କରାଯିବ ବୋଲି ସେ କହିଛନ୍ତି।