ରସୁଲପୁର/ଧର୍ମଶାଳା, ୨୨ା୩(ଡି.ଏନ୍.ଏ.):ଯାଜପୁର ଜିଲା ରସୁଲପୁର ବ୍ଲକ ରାଉତରାପୁର ପଞ୍ଚାୟତ କୁଣ୍ଡପାଟଣା ଗ୍ରାମରେ ରବିବାର ମଧ୍ୟାହ୍ନରେ ଗ୍ୟାସ ଚୁଲାରୁ ନିଆଁ ବ୍ୟାପୀ ୨୬ବଖରା ଜଳି ପାଉଁଶ ହୋଇଯାଇଛି। ଏହି ଘଟଣାରେ କେହି ମୃତାହତ ହୋଇନାହାନ୍ତି। ତେବେ ନିଅଁାର ପ୍ରକୋପ ଏତେ ଅଧିକ ଥିଲା ଯେ, ଜୀବନ ବଞ୍ଚାଇବାକୁ ଗଁା ଲୋକେ ଯିଏ ଯୁଆଡ଼େ ପାରିଲେ ଦୌଡ଼ିଥିଲେ।
ମିଳିଥିବା ସୂଚନାନୁଯାୟୀ, କୁଣ୍ଡପାଟଣାର ନରହରି ପୃଷ୍ଟିଙ୍କ ଭୋଜି ପାଇଁ ରୋଷେଇ ହେଉଥିଲା। ସେଥିରେ ବ୍ୟବହୃତ ଚୁଲାରୁ ଗ୍ୟାସ ଲିକ୍ ହୋଇ ଆଖି ପିଛୁଳାକେ ନେତ୍ରାନନ୍ଦ ପୃଷ୍ଟିଙ୍କ ଘରେ ନିଆଁ ଲାଗିଯାଇଥିଲା। ଚାହୁଁଚାହୁଁ ନିଆଁ ଗାଁ ଭିତରକୁ ବ୍ୟାପୀ ଯାଇଥିଲା। ଅଗ୍ନିକାଣ୍ଡରେ ନେତ୍ରାନନ୍ଦ ପୃଷ୍ଟିଙ୍କ ୫ ବଖରା, ନରହରି ପୃଷ୍ଟିଙ୍କ ୨ ବଖରା, ପୂର୍ଣ୍ଣ ପୃଷ୍ଟିଙ୍କ ୨, ଅଭୟ ପୃଷ୍ଟିଙ୍କ ୧, ବିଜୟ ପୃଷ୍ଟିଙ୍କ ୧, ଗୋକୁଳ ପୃଷ୍ଟିଙ୍କ ୨, ବିଷ୍ଣୁ ପୃଷ୍ଟିଙ୍କ ୧, ମୀନାକ୍ଷୀ ପୃଷ୍ଟିଙ୍କ ୧, ନଟବର ପୃଷ୍ଟିଙ୍କ ୧, ଟିକ ପୃଷ୍ଟିଙ୍କ ୨, ଧରଣୀ ପୃଷ୍ଟିଙ୍କ ୨, ଦିନବନ୍ଧୁ ପୃଷ୍ଟିଙ୍କ ୨, ବିନୋଦ ପୃଷ୍ଟିଙ୍କ ୨, ସୁବଳ ପୃଷ୍ଟିଙ୍କ ୧ ଓ ଧବଳ ପୃଷ୍ଟିଙ୍କ ୧ ବଖରାକୁ ମିଶାଇ ୨୬ ବଖରା ପୋଡ଼ିଯାଇଥିବା ଅଗ୍ନିଶମ ବିଭାଗ ପକ୍ଷରୁ ସୂଚନା ମିଳିଛି। ସେମାନଙ୍କ ମଧ୍ୟରୁ ଏକାଧିକ ଲୋକଙ୍କ ଘରେ ଥିବା ବାଇକ୍, ସାଇକେଲ, ଲୁଗାପଟା, ଧାନ ଚାଉଳ, ବାସନକୁସନ, ସୁନା ଅଳଙ୍କାର ପୋଡ଼ି ଯାଇଛି। ବିପନ୍ନ ପରିବାର କଂସାପିତ୍ତଳ କାରିଗର ହୋଇଥିବାରୁ ସେମାନଙ୍କ ଲକ୍ଷାଧିକ ଟଙ୍କାର ପିତ୍ତଳ କଂସାବାସନ ପୋଡି ମୁଣ୍ଡା ହୋଇଯାଇଛି, ଯାହାର ଆନୁମାଲିକ ମୂଲ୍ୟ ୫୦ଲକ୍ଷରୁ ଊର୍ଦ୍ଧ୍ୱ ହେବ ବୋଲି କୁହାଯାଉଛି। ଖବର ପାଇ ଧର୍ମଶାଳା ପୋଲିସ ଓ ପରେ ଧର୍ମଶାଳା ଓ ଚଣ୍ଡିଖୋଲରୁ ଅଗ୍ନିଶମ ବାହିନୀ ପହଞ୍ଚତ୍ଥିଲେ। କିନ୍ତୁ ସେତେବେଳକୁ ସବୁ ଛାରଖାର ହୋଇଯାଇଥିଲା। ରସୁଲପୁର ଅତିରିକ୍ତ ତହସିଲଦାର ମୋହନ ଚରଣ ଜେନା, ସାମନ୍ତରାପୁର ଆର୍ଆଇ ନୃସିଂହ ଚରଣ ବେହେରା, ନରସିଂହପୁର ଆର୍ଆଇ ଦୁର୍ଜେୟ ଷଡ଼ଙ୍ଗୀ ପହଞ୍ଚତ୍ କ୍ଷୟକ୍ଷତି ଆକଳନ କରିଥିଲେ। ପ୍ରାଥମିକ ଅବସ୍ଥାରେ ବିପନ୍ନ ପରିବାରକୁ ପଲିଥିନ ପ୍ରଦାନ କରାଯାଇଛି। ୩ଦିନ ରନ୍ଧାଖାଦ୍ୟ ପ୍ରଦାନ କରିବାକୁ ସରପଞ୍ଚଙ୍କୁ ନିର୍ଦ୍ଦେଶ ଦିଆଯାଇଛି। ସୋମବାର ବିପନ୍ନ ପରିବାରକୁ ରେଡକ୍ରସ ପକ୍ଷରୁ ଆର୍ଥିକ ସହାୟତା ଦିଆଯିବ ବୋଲି ରସୁଲପୁର ତହସିଲଦାର ଜ୍ୟୋତିକାନ୍ତ ଭୁଜବଳ ପ୍ରକାଶ କରିଛନ୍ତି।
