କୋରୁକୋଣ୍ଡା,୯ା୮(ଡି.ଏନ୍.ଏ.):ରାଜ୍ୟ ଓ କେନ୍ଦ୍ର ସରକାର ଗମନାଗମନର ସୁବିଧା ପାଇଁ ପକ୍କାରାସ୍ତା ନିର୍ମାଣରେ ଅର୍ଥ ଖର୍ଚ୍ଚ କରୁଛନ୍ତି। କିନ୍ତୁ ସ୍ଥାନୀୟ ପ୍ରଶାସନ ଏବଂ ଠିକାଦରଙ୍କ ମିଳିତ ଦୁର୍ନୀତି ଯୋଗୁ ରାସ୍ତାକାମ ନିମ୍ନମାନର ହେବା ସହ କମ୍ ଦିନରେ ନଷ୍ଟ ହେଉଛି। ମାଲକାନଗିରି ଜିଲା କୋରୁକୋଣ୍ଡା ବ୍ଲକ ପୋଟ୍ରେଲ ପଞ୍ଚାୟତର ପରମିଲା ପଦର ଗ୍ରାମରେ ଏଭଳି ସ୍ଥିତି ଦେଖିବାକୁ ମିଳିଛି। ନିମ୍ନମାନର ରାସ୍ତାକାମ ଯୋଗୁ ଗ୍ରାମବାସୀ ରାସ୍ତାକାମ ବନ୍ଦ କରିଛନ୍ତି।
ପରମିଲା ପଦର ଛକଠାରୁ ଏମ୍ଭି-୫୨ ଗ୍ରାମଦେଇ ସୋର୍ଲୋକୋଣ୍ଡା ପର୍ଯ୍ୟନ୍ତ ୩.୯୭ କିମି ରାସ୍ତାକୁ ପ୍ରଧାନମନ୍ତ୍ରୀ ଗ୍ରାମ୍ୟ ସଡ଼କ ଯୋଜନା(ପିଏମ୍ଜିଏସ୍ଓ୍ବାଇ)ରେ ପକ୍କାରାସ୍ତା କରିବା ନିମନ୍ତେ ୧୭୬.୪୩ ଲକ୍ଷ ବ୍ୟୟ ଅଟକଳରେ ଅଗଷ୍ଟ ୨ ରେ ମାଲକାନଗିରି ଡିଆର୍ଡିଏ ପକ୍ଷରୁ ତରଫରୁ ଏସ୍. ପ୍ରଭାକର ନାମକ ଠିକାଦାରଙ୍କୁ କାମ ହସ୍ତାନ୍ତର କରଯାଇଥିଲା। କାମ ଆରମ୍ଭ ହୋଇ ରାସ୍ତାରେ ମେଟାଲ ପକାଇ ରୋଲର ସାହାଯ୍ୟରେ ସମତୁଲ କରାଯାଉଥିଲା। ଏହି ସମୟରେ କ୍ରଶର ମେଟାଲ ବଦଳରେ ହାତ ଭଙ୍ଗା ମେଟାଲରେ ଉକ୍ତ ରାସ୍ତାକାମ ହେଉଥିଲା। ରୋଲର ଦ୍ୱାରା ସମତୁଲ ସମୟରେ ମେଟାଲ ଗୁଣ୍ଡ ହେଉଥିବା ଦେଖି ଏମ୍ଭି-୫୨ ଗ୍ରାମର ଲେକେ ବିରୋଧ କରିଥିଲେ। ସରକାରଙ୍କ ନିୟମ ଅନୁସାରେ କାମ ହେଉ ନ ଥିବାରୁ ଗ୍ରାମବାସୀ କାମ ବନ୍ଦ କରିବା ସହ ଏହାର ପ୍ରତିବାଦ କରିଥିଲେ। ଏ ନେଇ ଗ୍ରାମବାସୀ ବିଭାଗୀୟ ଅଧିକାରୀଙ୍କୁ ଅଭିଯୋଗ କରିବା ପରେ ରାସ୍ତାକାମକୁ ସ୍ଥଗିତ ରଖି ରାସ୍ତାରେ ପଡ଼ିଥିବା ହାତଭଙ୍ଗା ମେଟାଲ ମେଟାଲକୁ ଉଠାଇବା କାମ ଆରମ୍ଭ ହୋଇଥିଲା। ତେବେ ରାସ୍ତାକାମ ଆରମ୍ଭରୁ ଅନିୟମିତତା ଦେଖାଦେଇଛି। ଏବେ ମଧ୍ୟ ରାସ୍ତାକାମ ପାଇଁ ପଡ଼ିଥିବା କ୍ରଶର ମେଟାଲରେ ଗୁଣ୍ଡ ଅଧିକ ଥିବା ଗ୍ରାମର ନୀତିଶ ବିଶ୍ବାସ, ଯୋଗେନ୍ଦ୍ର ସେନ, ପ୍ରେମାନନ୍ଦ ମଣ୍ଡଳ, ଅରବେନ୍ଦୁ ସେନ, ଦେବେନ୍ଦ୍ର ସେନ, ଇନ୍ଦ୍ର ପଡିଆମି ପ୍ରମୁଖ ଅଭିଯୋଗ କରିଛନ୍ତି। ଆଗକୁ କାମରେ ଅନିୟମିତତା ହେଲେ ଘୋର ବିରୋଧ କରାଯିବ ବୋଲି ସେମାନେ କହିଛନ୍ତି। ଏନେଇ ବିଭାଗୀୟ କନିଷ୍ଠ ଯନ୍ତ୍ରୀ ମଣିକ କୁମ୍ଭାରଙ୍କୁ ପଚାରିବାରୁ ସେ କହିଛନ୍ତି, ଘଟଣାସ୍ଥଳକୁ ଯାଇ ଅନୁଧ୍ୟାନ କରିବା ପରେ ଠିକାଦାରଙ୍କୁ ତାଗିଦ କରାଯାଇଛି। କ୍ରଶର ମେଟାଲ ବ୍ୟବହାର ପାଇଁ କୁହାଯାଇଥିବା ସେ ପ୍ରକାଶ କରିଛନ୍ତି।