ନୂଆଦିଲ୍ଲୀ,୮ା୨: ପୋଲିସ କିମ୍ବା ବିଚାରବିଭାଗୀୟ ହାଜତରେ ଅଟକ ଥିବା ମହିଳା ଅଭିଯୁକ୍ତମାନଙ୍କ କୁମାରିତ୍ୱ ପରୀକ୍ଷା କରାଇବା ଅସାମ୍ବିଧାନିକ। ଏହି ପଦକ୍ଷେପ ସମ୍ବିଧାନ ଅନୁଚ୍ଛେଦ ୨୧ର ଖୋଲାଖୋଲି ଉଲ୍ଲଂଘନ ବୋଲି ଦିଲ୍ଲୀ ହାଇକୋର୍ଟ ମଙ୍ଗଳବାର ସ୍ପଷ୍ଟ କରିଛନ୍ତି। ସିଷ୍ଟର ଅଭୟାଙ୍କ ହତ୍ୟା ଅଭିଯୁକ୍ତ ସିଷ୍ଟର ସେଫିଙ୍କ ଭର୍ଜିନିଟି ଟେଷ୍ଟ କରାଇଥିବା କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ)କୁ ଜଷ୍ଟିସ ସ୍ବର୍ଣ୍ଣକାନ୍ତ ଶର୍ମାଙ୍କ ଜଣିକିଆ ଖଣ୍ଡପୀଠ ଭର୍ତ୍ସନା କରିଛନ୍ତି। ହାଜତରେ ଥିଲେ ମଧ୍ୟ ଜଣେ ବ୍ୟକ୍ତିଙ୍କ ମୌଳିକ ମର୍ଯ୍ୟାଦା ଅକ୍ଷୁଣ୍ଣ ରହିବା ଆବଶ୍ୟକ ବୋଲି ଗୁରୁତ୍ୱପୂର୍ଣ୍ଣ ଟିପ୍ପଣୀ ଦେଇଛନ୍ତି।
ସିଷ୍ଟର ସେଫି ହେଉଛନ୍ତି ୨୦୨୦ରେ ନନ୍ ଅଭୟା ହତ୍ୟା ମାମଲାର ୨୮ ବର୍ଷ ପରେ କେରଳର ଏକ ସ୍ବତନ୍ତ୍ର ସିବିଆଇ କୋର୍ଟ ଦ୍ୱାରା ଦୋଷୀ ସାବ୍ୟସ୍ତ ହୋଇଥିବା ବ୍ୟକ୍ତିମାନଙ୍କ ମଧ୍ୟରୁ ଅନ୍ୟତମ। ୧୯୯୨ରେ ସିଷ୍ଟର ଅଭୟାଙ୍କ ମୃତଦେହ କୋଟ୍ଟାୟାମ୍ର କନ୍ଭେଣ୍ଟରେ ମିଳିଥିଲା। ଉକ୍ତ ମାମଲାର ଅନ୍ୟତମ ଦୋଷୀ ଫାଦର ଥୋମାସ୍ କୋଟ୍ଟୁର ଜଣେ ପାଦ୍ରୀ। ପୂର୍ବରୁ ଥୋମାସ୍ ଓ ସିଷ୍ଟର ସେଫିଙ୍କୁ ଅଭୟା ଅସଞ୍ଜତ ଅବସ୍ଥାରେ ଦେଖିଥିଲେ। ଫଳରେ ସେମାନେ ଅଭୟାଙ୍କ ମୁଣ୍ଡରେ କୁରାଢ଼ିରେ ଆଘାତ ଦେଇ ହତ୍ୟା କରିବା ପରେ ଏକ କୂଅକୁ ମୃତଦେହ ଫିଙ୍ଗିଦେଇଥିବା ଅଭିଯୋଗ ହୋଇଥିଲା। ତଳ କୋର୍ଟରେ ସେମାନଙ୍କ ଦୋଷ ପ୍ରମାଣିତ ହୋଇଥିଲା। ସେଫି ଯୌନ ସମ୍ପର୍କରେ ଲିପ୍ତ ଥିବା ବିଷୟ ଲୁଚାଇବା ପାଇଁ ଡାକ୍ତରୀ ଉପାୟ ଆପଣାଇଥିଲେ। ସିବିଆଇ ଦ୍ୱାରା ଗିରଫ ହେବାର ଅବ୍ୟବହିତ ପୂର୍ବରୁ ସେ ନିଜ ଶରୀରରେ ଏହି ପ୍ରକ୍ରିୟା କରାଇଥିବା କୋର୍ଟ କହିଥିଲେ। ସେଫି ୨୦୧୮ରେ ଗିରଫ ହେବା ପରେ ସିବିଆଇ ବିରୋଧରେ ଅଭିଯୋଗ ଆଣିଥିଲେ ଯେ, ତଦନ୍ତକାରୀ ସଂସ୍ଥା ତାଙ୍କ ବିନା ଅନୁମତିରେ କୁମାରୀତ୍ୱ ପରୀକ୍ଷା କରାଇଥିଲା। ଏହି ଅଭିଯୋଗକୁ ନେଇ ସିବିଆଇକୁ ବିଭିନ୍ନ ମହଲରେ ସମାଲୋଚିତ ହେବାକୁ ପଡ଼ିଥିଲା। ଦିଲ୍ଲୀ ହାଇକୋର୍ଟ ମଙ୍ଗଳବାର କୁମାରୀତ୍ୱ ପରୀକ୍ଷାକୁ ଅସାମ୍ବିଧାନିକ ଦର୍ଶାଇଛନ୍ତି। ଏପରି ଯାଞ୍ଚ ପାଇଁ ଦେଶରେ କୌଣସି ଆଇନ ନାହିଁ। ମହିଳାଙ୍କ ଶରୀର ଉପରେ ସିବିଆଇର ହସ୍ତକ୍ଷେପ ମାନବାଧିକାର ଉଲ୍ଲଂଘନ। କାରଣ ଏହା ତାଙ୍କ ମାନସିକ ସ୍ଥିତିରେ ମଧ୍ୟ ନକାରାମତ୍କ ପ୍ରଭାବ ପକାଇଛି। ଏହା ଏକ ଅମାନବୀୟ ବ୍ୟବହାର କହିବା ସହ ତଦନ୍ତକାରୀ ଅଧିକାରୀମାନଙ୍କୁ ଉକ୍ତ ପ୍ରସଙ୍ଗରେ ସଚେତନ କରାଇବା ଲାଗି କେତେକ ନିର୍ଦ୍ଦେଶନାମା ଜାରି କରିଛନ୍ତି। ସିଷ୍ଟର ସେଫିଙ୍କୁ ସିବିଆଇ ବିରୋଧରେ କ୍ଷତିପୂରଣ ସମେତ ଆଇନଗତ ପଦକ୍ଷେପ ନେବା ପାଇଁ ଅନୁମତି ପ୍ରଦାନ କରିଛନ୍ତି।