ମହାକାଳପଡ଼ା,୧୩ା୫(ଡି.ଏନ.ଏ.): ପରିବେଶ ପ୍ରଦୂଷଣ ଓ ମୃତ୍ତିକା ଅବକ୍ଷୟକୁ ରୋକିବାକୁ ବୃକ୍ଷ ରୋପଣ ମୁଖ୍ୟ ଭୂମିକା ନିର୍ବାହ କରିଥାଏ। ଏହାକୁ ଦୃଷ୍ଟିରେ ରଖି ରାଜ୍ୟ ସରକାରଙ୍କ ଜଙ୍ଗଲ ଓ ପରିବେଶ ବିଭାଗ ପକ୍ଷରୁ ସ୍ଥାନୀୟ ମହାକାଳପଡ଼ା ବନ୍ୟ ଜୀବ ବନାଞ୍ଚଳ ୨୦୨୧/୨୨ ଆର୍ଥିକ ବର୍ଷରେ ପଥପ୍ରାନ୍ତ ବନୀକରଣ ଯୋଜନା ଆରମ୍ଭ ହୋଇଥିଲା। ବ୍ଲକର ପେଟଛେଲା ପଞ୍ଚାୟତର ସ୍ଥାନୀୟ କେନ୍ତିଆ ଗାଁ ହନୁମାନ ମନ୍ଦିରଠାରୁ କୋଚିଳା ଗାଁ ପର୍ଯ୍ୟନ୍ତ ୨ କିମି ରାସ୍ତାର ଉଭୟପାର୍ଶ୍ୱରେ ୧୫୦୦ ଚାରା ରୋପଣ କରାଯାଇଛି। ବୁଲଗୋରୁ, ଛେଳି ମେଣ୍ଢା କବଳରୁ ସୁରକ୍ଷା ଦେବାକୁ ବାଡ଼ ସହ ଜାଲ ଘେରାଯାଇଛି। ଗଛର ଯତ୍ନ ନେବା ରକ୍ଷଣାବେକ୍ଷଣ ଓ ବଞ୍ଚାଇ ରଖିବା ପାଇଁ କେନ୍ତିଆ ଗାଁର ବିଚିତ୍ର କୁମାର ପ୍ରଧାନଙ୍କୁ ଅସ୍ଥାୟୀ ଜଗୁଆଳି ଭାବେ ନିଯୁକ୍ତି ଦିଆଯାଇଥିଲା। ହେଲେ ବନ ବିଭାଗ ତାଙ୍କୁ ମଜୁରି ବାବଦ ଅର୍ଥ ଦେଉ ନ ଥିବାରୁ ସେ ହଇରାଣ ହେଉଛନ୍ତି। ବିଚିତ୍ର କୋଡା ଖୋସା, ଘାସ ବାଛି ୧୫୦୦ ଗଛକୁ ବଞ୍ଚାଇ ରଖିପାରିଛନ୍ତି ବୋଲି ଗାଁର ନିରାକାର ସ୍ବାଇଁ, ଅଭୟ ରାଉତ, ନାଥ ଭୋଳ ପ୍ରମୁଖ କହିଛନ୍ତି। ବିଚିତ୍ରଙ୍କୁ ବନ ବିଭାଗ ପକ୍ଷରୁ ମାସିକ ୬୪୫୦ ଟଙ୍କାରେ ଦୁଇବର୍ଷ ପାଇଁ ଦିଆଯିବ କହି ନିୟୋଜିତ କରିଥିଲା। ତେବେ ନିୟୋଜିତ ହୋଇଥିବା ଜଗୁଆଳି ବିଚିତ୍ରଙ୍କୁ ମଜୁରି ବାବଦରେ ମାତ୍ର ୧୨ ହଜାର ଟଙ୍କା ପ୍ରଦାନ କରାଯାଇଛି ବୋଲି ସେ କହିଛନ୍ତି। ବକେୟା ପାଉଣା ବାବଦ ଟଙ୍କାକୁ ବନ ବିଭାଗ ନ ଦେଇ ବିଚିତ୍ରଙ୍କୁ ଆଜିକାଲି କହି ଭୁଆଁ ବୁଲାଉଛି ବୋଲି ଅଭିଯୋଗ କରିଛନ୍ତି। ବିଚିତ୍ର ମଜୁରି ଲାଗିଲେ ଅଭାବୀ ପରିବାରର ଚୁଲି ଜଳେ। ତେବେ ବନ ବିଭାଗ ଅଧିକାରୀ କାହିଁକି ଗଛ ଜଗୁଥିବା ବିଚିତ୍ରଙ୍କୁ ମଜୁରି ଟଙ୍କା ନ ଦେଇ ଦିନ ଗଡ଼ାଇ ଚାଲିଛି ତାହା ଜଣାପଡୁନି। ମଜୁରି ନ ମିଳିଲେ ବନ ବିଭାଗ କାର୍ଯ୍ୟାଳୟ ସମ୍ମୁଖରେ ବିଚିତ୍ର ଅନଶନ କରିବେ ବୋଲି କହିଛନ୍ତି। ଏ ସମ୍ପର୍କରେ ମହାକାଳପଡ଼ା ବାନଞ୍ଚଳ ଅଧିକାରୀ ସାହାଜୀ ଚରଣ ବିଶ୍ୱାଳଙ୍କ ପଚାରିବାରେ ବୃକ୍ଷ ଜଗୁଆଳି ବିଚିତ୍ରଙ୍କ ମଜୁରି ବାବଦରେ ବକେୟା ଥିବା ଅର୍ଥ ଖୁବ୍ଶୀଘ୍ର ପ୍ରଦାନ କରାଯିବ ବୋଲି ସେ କହିଛନ୍ତି। ଗାଁ
