କଟକ ଅଫିସ,୧୦ା୩: କଟକ ଶଙ୍କରପୁର ଢିଅସାହି ଅଞ୍ଚଳରେ ମଙ୍ଗଳବାର ଅପରାହ୍ନରେ କାନ୍ଥ ଭୁଶୁଡି ଜଣେ ଶ୍ରମିକଙ୍କ ମୃତ୍ୟୁ ଘଟିଛି। ସେ ହେଲେ କଟକ ନୂଆରାଉସାପାଟଣା ଅଞ୍ଚଳର ଡି.ସୁରିଆ ରାଓ(୩୪)। ବାଦାମବାଡି ଥାନା ଅଧିକାରୀ ରଶ୍ମି ରଞ୍ଜନ ମହାପାତ୍ରଙ୍କ ସୂଚନା ଅନୁଯାୟୀ, ଢିଅସାହି ଅଞ୍ଚଳରେ ମ୍ୟୁନିସିପାଲିଟିର ନାଳ ନିର୍ମାଣ କାର୍ଯ୍ୟ ଚାଲିଥିଲା। ସେଠାରେ ରାଓ ଶ୍ରମିକ ଭାବେ କାମ କରୁଥିଲେ। ଅପରାହ୍ନ ପ୍ରାୟ ସାଢେ ୪ଟାରେ ନାଳପାର୍ଶ୍ୱକୁ ଲାଗିଥିବା ଘରର କାନ୍ଥ ତାଙ୍କ ଉପରେ ପଡିଯାଇଥିଲା। ଗୁରୁତର ଅବସ୍ଥାରେ ତାଙ୍କୁ ଏସ୍ସିବି ମେଡିକାଲରେ ଭର୍ତ୍ତି କରାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଅନ୍ୟପକ୍ଷରେ ସ୍ଥାନୀୟ ଅଞ୍ଚଳର ମାଳତୀ ମହାନ୍ତି କହିଛନ୍ତି, ଏହି ନାଳ କାମ ପ୍ରାୟ ୧୫ ଦିନ ହେବ ଚାଲିଛି। କଣ୍ଟ୍ରାକ୍ଟରଙ୍କୁ ଯେତେ କହିଲେ ମଧ୍ୟ ସେ ନ ଶୁଣି ଘରର କାନ୍ଥଗୁଡିକୁ ଲଗାଇ ଡ୍ରିଲ କରି ଖୋଳୁଛନ୍ତି। ଫଳରେ ମଙ୍ଗଳବାର ଶ୍ରମିକ ଜଣକ କାନ୍ଥପାର୍ଶ୍ୱକୁ ଲଗାଇ ଡ୍ରିଲ କରୁଥିବାବେଳେ ତାହା ତାଙ୍କ ଉପରେ ପଡିଯାଇଥିଲା। ଯଦି କଣ୍ଟ୍ରାକ୍ଟର ଏ ଦିଗରେ ଦୃଷ୍ଟି ନ ଦିଅନ୍ତି, ତେବେ ଆଗାମୀ ଦିନରେ ଏଭଳି ଦୁର୍ଘଟଣାକୁ ଏଡାଇ ଦିଆଯାଇ ନ ପାରେ।