ଭୁବନେଶ୍ୱର, ୨।୧୨(ବ୍ୟୁରୋ): ଏକ ନିର୍ମାଣାଧୀନ ଆପାର୍ଟମେଣ୍ଟର ସ୍ବେରେଜ ଟାଙ୍କି ଖୋଳାଯାଉଥିବାବେଳେ ପାଚେରୀ ଭୁଶୁଡି ପଡ଼ିବାରୁ ଏହା ତଳେ ଚାପି ହୋଇ ଜଣେ ମହିଳା ଶ୍ରମିକଙ୍କ ମୃତ୍ୟୁ ଘଟିଛି। ଏଥିସହ ଆଉଜଣେ ମହିଳା ଶ୍ରମିକ ଗୁରୁତର ଆହତ ହୋଇଛନ୍ତି। ଭରତପୁର ଥାନା ଅନ୍ତର୍ଗତ କଳିଙ୍ଗ ନଗରର କେ-୮ ଅଞ୍ଚଳରେ ଗୁରୁବାର ସନ୍ଧ୍ୟା ଘଟିଛି ଏହି ଦୁଃଖଦ ଘଟଣା। ମୃତା ମହିଳା ଜଣକ ହେଲେ ଗଞ୍ଜାମ ଜିଲା ପୁରୁଷୋତ୍ତମପୁରର ଏ. କମଳା ରେଡ୍ଡୀ ଓ ଆହତ ହେଲେ ଶିବାନୀ ରେଡ୍ଡୀ। ଶିବାନୀଙ୍କୁ ସ୍ଥାନୀୟ ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଛି। ଏଥିସହ ପୋଲିସ ମୃତଦେହ ଜବର କରି ବ୍ୟବଚ୍ଛେଦ ପାଇଁ ହସ୍ପିଟାଲ ପଠାଇ ଘଟଣାର ଅଧିକ ତଦନ୍ତ ଚଳାଇଛି। ବେଆଇନ ଭାବେ ଉକ୍ତ ଖନନ ହେଉଥିବାବେଳେ ବିଲ୍ଡର ସଂସ୍ଥାର ମୁଖ୍ୟ କିମ୍ବା ଠିକାଦାର ଏଥିଲାଗି ସେପରି କିଛି ଅନୁମତି ନେଇ ନ ଥିବା ଓ ବିନା ସୁରକ୍ଷା ଉପକରଣରେ ବିପଦପୂର୍ଣ୍ଣ ଭାବେ ପାଚେରି ମୂଳର ଖୋଳାଯାଉଥିବା ତଦନ୍ତବେଳେ ଜଣାପଡିଛି। ତେବେ ଏପରି ଖାମଖିଆଲି ପାଇଁ ଜଣେ ଶ୍ରମିକଙ୍କ ଅକାଳ ମୃତ୍ୟୁ ଘଟିଥିବାବେଳେ ଆଉଜଣେ ଜୀବନ ସହ ସଂଗ୍ରାମ କରୁଛନ୍ତି। ସମ୍ପୃକ୍ତ ବିଲ୍ଡର ଓ ଠିକାଦାରଙ୍କ ଉପରେ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ସ୍ଥାନୀୟ ଲୋକେ ଦାବି କରିଛନ୍ତି।
ସୂଚନାନୁସାରେ, ଉକ୍ତ ଟାଙ୍କି ଖୋଳିବାରେ ୬ଜଣ ଶ୍ରମିକ ନିୟୋଜିତ ହୋଇଥିଲେ। ୨ ମହିଳା ଶ୍ରମିକ ତଳେ ରହି ଖୋଲୁଥିବାବେଳେ ଅନ୍ୟମାନେ ଉପରେ ମାଟି ଉଠାଇବା ସହ ସ୍ଥାନାନ୍ତର କରୁଥିଲେ। ଏହାକୁ ଲାଗି ରହିଥିବା ପାଚେରି ମାଙ୍କଡ଼ା ପଥରରେ ତିଆରି ହୋଇଥିଲା। ଏହା ମୂଳରେ ୧୦ ଫୁଟ ଖୋଳାଯିବା ପରେ ଭୁଶୁଡି ପଡିଥିଲା।