ରଗଡି,୯।୪(ଡି.ଏନ.ଏ.): ଯାଜପୁର ଜିଲା କୋରେଇ ବ୍ଲକ ଅଧୀନ ରଗଡି ଛକ ଆନନ୍ଦପୁରର ମୁଖ୍ୟ ଫାଟକ ଭାବେ ପରିଚିତ। କେନ୍ଦୁଝର ସୀମାନ୍ତରୁ ମାତ୍ର ୨ କି.ମି ପୂର୍ବରୁ ଅବସ୍ଥିତ ଏହି ଛକରେ ପ୍ରତିଦିନ ପ୍ରାୟ ହଜାରରୁ ଊର୍ଦ୍ଧ୍ୱ ଲୋକଙ୍କ ଭିଡ଼ ଜମେ । ରଗଡି ଉପକାରାଗାର ଓ ସରକାରୀ ପଲିଟେକନିକ ବ୍ୟତୀତ ସରକାରୀ ଓ ବେସରକାରୀ ପ୍ରତିଷ୍ଠାନ ଏହି ଛକରେ ଗଢି ଉଠିଛି । ପ୍ରତିଦିନ ଶତାଧିକ ଯାନବାହନ ଏହି ଛକ ଦେଇ ଯିବା ଆସିବା କରୁଥିବାରୁ ବ୍ୟବସାୟୀଙ୍କ ଆଗ୍ରହ ଏଠାରେ ବଢ଼ିବାରେ ଲାଗିଛି । ଆଖପାଖ ଅଞ୍ଚଳର ଛୋଟ ବଡ଼ ମିଶି ପ୍ରାୟ ୫୦୦ରୁ ଊର୍ଦ୍ଧ୍ୱ ବ୍ୟବସାୟ ପ୍ରତିଷ୍ଠାନ ରହିଛି। ତେବେ ଏହି ଛକରେ ମୁଖ୍ୟ ସମସ୍ୟା ଜଳ ସଙ୍କଟ ।ଶୁଦ୍ଧ ପାନୀୟ ଜଳ ପାଇଁ କୌଣସି ବ୍ୟବସ୍ଥା ହୋଇ ପାରିନାହିଁ। ଅଚଳ ନଳକୂପର ବିଷାକ୍ତ ଦୁର୍ଗନ୍ଧଯୁକ୍ତ ପାଣି ସ୍ଥାନୀୟ ବ୍ୟବସାୟୀ ଓ ଖାଉଟିଙ୍କ ଶୋଷ ମେଣ୍ଟାଉଛି ।
ରଗଡି ଛକ ଏକ ଜନ ବହୁଳ ସ୍ଥାନ ହୋଇଥିବାବେଳେ ଏଠାରେ କୌଣସି ସରକାରୀ ନଳକୂପ ନାହିଁ। ଫଳରେ ବ୍ୟବସାୟୀମାନେ ପାଣି ପାଇଁ ଅସୁବିଧାର ସମ୍ମୁଖୀନ ହେଉଥିବା ଅଭିଯୋଗ ହୋଇଛି। ପୂର୍ବରୁ ଥିବା ଦୁଇଟି ନଳକୂପ ମଧ୍ୟରୁ ଗୋଟିଏ ଗତ ୩ ବର୍ଷ ହେବ ସମ୍ପୂର୍ଣ୍ଣ ଅଚଳ ହୋଇ ପଡ଼ିଛି। ଅନ୍ୟଟି ଜଣେ ଶିକ୍ଷକ ବ୍ୟକ୍ତିଗତ ସ୍ବାଥର୍ର୍ ପାଇଁ ମୋରମ ପକାଇ ଅବରୋଧ କରିଥିବା ସ୍ଥାନୀୟ ଲୋକେ କହିଛନ୍ତି । ପାନୀୟ ଜଳ ସୁବିଧା ପାଇଁ ବ୍ୟବସାୟୀମାନେ ବାରମ୍ବାର ପ୍ରଶାସନିକ ଅଧିକାରୀଙ୍କ ନିକଟରେ ଅଭିଯୋଗ କରିଥିଲେ ମଧ୍ୟ କୌଣସି ସୁଫଳ ମିଳିନାହିଁ ବୋଲି କେତେଜଣ ବ୍ୟବସାୟୀ କହିଛନ୍ତି । ପ୍ରତିବର୍ଷ ଗ୍ରୀଷ୍ମ ପ୍ରବାହ ସମୟରେ ଏପରି ଜଳ ସମସ୍ୟା ବ୍ୟବସାୟୀ ଓ ଖାଉଟିଙ୍କ ମୁଣ୍ଡ ବ୍ୟଥାର ପ୍ରମୁଖ କାରଣ ହୋଇଛି। ପ୍ରଶାସନର ନିଷ୍କ୍ରିୟତା ବ୍ୟବସାୟୀମାନଙ୍କୁ ନିରାଶ କରିଛି । ତୁରନ୍ତ ଏ ସଂକ୍ରାନ୍ତରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ରଗଡି ବ୍ୟବସାୟୀ ସଂଘ ଜିଲା ପ୍ରଶାସନ ନିକଟରେ ଦାବି କରିଛି।
