ବୌଦ୍ଧ,୩ା୮(ଅଜିତ କୁମାର ବାରିକ): ବୌଦ୍ଧ ଜିଲାରେ ଲଗାଣ ବର୍ଷା ଯୋଗୁ ଏକ ପ୍ରକାର ବନ୍ୟା ପରିସ୍ଥିତି ଦେଖାଦେଇଛି। ମହାନଦୀ ଜଳସ୍ତର ବଢିବା ସହିତ ବିଭିନ୍ନ ନଦୀ ଫୁଲିବାରେ ଲାଗିଛି। ଜିଲାର ତଳିଆ ଅଞ୍ଚଳ ଜଳମଗ୍ନ ହୋଇପଡିଛି। ଅନେକ ଲୋକଙ୍କ ଘରେ ପାଣି ପଶିଯାଇଛି। ବୌଦ୍ଧ ଜିଲାରେ ମହାନଦୀରେ ବିପଦ ସଙ୍କେତ ୮୭.୮୦ ଥିବା ବେଳେ ବୁଧବାର ରାତିରେ ୮୭.୮୦ ଜଳସ୍ତର ରହିଥିବା ଜଣାପଡିଛି। ପୁରା ଜଗନ୍ନାଥ ସଡକ ବୌଦ୍ଧ ଠାରୁ ମାରଡା ପର୍ଯ୍ୟନ୍ତ ବିଭିନ୍ନ ସ୍ଥାନରେ ରାସ୍ତା ଉପରେ ପାଣି ବୋହୁଥିବାରୁ ଯୋଗାଯୋଗ ବିଛିନ୍ନ ହୋଇପଡିଛି। ଜଗନ୍ନାଥ ସଡକର କୃଷ୍ପମୋହନପୁର. ତେନୁଲିପଦର, ଧଳପୁର, ସୁରଣ୍ଡି, ଭେଜିଗୋଡା, କୋଡାସିଙ୍ଗା ଓ ମାରଡା ଠାରେ ପାଣି ପ୍ରବାହିତ ହେବା ଯୋଗୁ ଯୋଗାଯୋଗ ସମ୍ପୂର୍ଣ୍ଣ ବିଚ୍ଛିନ୍ନ ହୋଇପଡିଛି। ମହାନଦୀ କୂଳ ପାଣିଘରା ଗ୍ରାମର ଖଣ୍ଡିସାହି, ତେନ୍ତୁଲିପଦର, ଝରାସାହି, ମାରଡା, ଭେଜିଗୋରା, ସୁରୁଣ୍ଡି, ଧଳପୁର, ଖଣ୍ଡିଧଳପୁର ଉଆଁଳ, ତିରଡ, କୁମାରୀ ଗ୍ରାମ ମୁଣ୍ଡରେ ପାଣି ରହିଥିବା ଦେଖିବାକୁ ମିଳିଛି। ରାମଜାଙ୍ଗି ନାଳରେ ପାଣି ତୁଡା ମାରିବା ଯୋଗୁ କେନ୍ଦ୍ରୀୟ ବିଦ୍ୟାଳୟ ଭିତରକୁ ବର୍ଷା ପାଣି ପ୍ରବେଶ କରିଛି। ଜିଲାର ଶହ ଶହ ଏକର ଚାଷ ଜମିରେ ବର୍ଷା ପାଣି ଜମି ବ୍ୟାପକ କ୍ଷତି ଘଟାଇଛି। ଏପରି କି ମତ୍ସ୍ୟବିଭାଗ କାର୍ଯ୍ୟାଳୟ ଭିତରେ ଥିବା ପୋଖରୀଗୁଡିକରେ ପାଣି ଭର୍ତ୍ତି ହୋଇଯିବାରୁ ପୋଖରୀରେ ଥିବା ମାଛ ଓ ଜାଆଁଳ ଭାସିଯାଇ ପାଖରେ ଥିବା ମହାନଦୀକୁ ପଳାଇଥିଲେ।