ବରଗଡ଼ ଅଫିସ/ଅମ୍ବାଭୋନା,୧୬ା୯(ଡି.ଏନ୍.ଏ.): ଛତିଶଗଡ଼ ଅଞ୍ଚଳରେ ପ୍ରବଳ ବର୍ଷା ହେବା ଯୋଗୁ ଗୁରୁବାର ସୀମାନ୍ତ ବରଗଡ଼ ଜିଲା ଅମ୍ବାଭୋନା ବ୍ଲକ ଅନ୍ତର୍ଗତ ଚିଖିଲି, ଅନ୍ତରାଡ଼ି, ବେନିଆଁପାଲି ଏବଂ ଘୁଘୁରାପାଲି ଅଞ୍ଚଳରେ ବନ୍ୟା ପରିସ୍ଥିତି ଉପୁଜିଛି। ହୀରାକୁଦ ଜଳଭଣ୍ଡାରର ପଛୁଆ ପାଣି ପଶିବାରୁ ବନ୍ୟାଜଳ ଘେରରେ ଚିଖିଲି ଗ୍ରାମ ରହିଛି। ସେହିପରି ଅନ୍ତରାଡି, ଚିଖିଲି, ବେନିଆପାଲି, ଘୁଘୁରାପାଲି ଗ୍ରାମର ୬୦୦ ହେକ୍ଟରରୁ ଊଦ୍ଧର୍ବ ଚାଷଜମି ଜଳମଗ୍ନ ହୋଇ ପଡ଼ିଥିବା ସୂଚନା ମିଳିଛି। ଚିଖିଲି ଗ୍ରାମରେ ଉଦ୍ଧାର କାର୍ଯ୍ୟ ଜାରି ରହିଛି। ବରଗଡ଼ ଅତିରିକ୍ତ ଜିଲାପାଳ ନବୀନ ପଟେଲଙ୍କ ସମେତ ଅନ୍ୟ ପ୍ରଶାସନିକ ଅଧିକାରୀମାନେ ଉପସ୍ଥିତ ରହି ସ୍ଥିତି ନିରୀକ୍ଷଣ କରୁଛନ୍ତି।