ଧାମନଗର, ୧୮।୪: ପ୍ରତ୍ୟେକ ଘରକୁ ପାନୀୟଜଳ ଯୋଗାଇ ଦେବା ଲାଗି ଭଦ୍ରକ ଜିଲା ଧାମନଗର ବ୍ଲକରେ ଗ୍ରାମୀଣ ଜଳ ଯୋଗାଣ ବିଭାଗ ପକ୍ଷରୁ ପ୍ରକଳ୍ପ ନିର୍ମାଣ କରାଯାଉଛି। କେନ୍ଦ୍ର ସରକାରଙ୍କ ସ୍ବଜଳ ଧାରା ଏବଂ ରାଜ୍ୟ ସରକାରଙ୍କ ବସୁଧା ଯୋଜନାରେ ଗ୍ରାମାଞ୍ଚଳରେ ଘରକୁ ଘର ପାଇପ୍ ଏବଂ ନଳକୂପ ଦ୍ୱାରା ପାନୀୟଜଳ ଯୋଗାଣ ନିମନ୍ତେ କୋଟି କୋଟି ଟଙ୍କା ଖର୍ଚ୍ଚ କରାଯାଉଛି। ହେଲେ ଯନ୍ତ୍ରୀ ଓ ଠିକାଦାରଙ୍କ ସଲାସୁତୁରାରେ ବ୍ୟାପକ ଅର୍ଥ ହରିଲୁଟ ହେଉଥିବା ବେଳେ ଏଠାରେ ଏହି ଯୋଜନାର ସଫଳ ରୂପାୟନ ହୋଇପାରୁ ନାହିଁ। ବ୍ଲକର ୩୧ ପଞ୍ଚାୟତରେ ନିର୍ମିତ ପାଣିଟାଙ୍କିର ୯୦ ପ୍ରତିଶତ ଟାଙ୍କିରୁ ପାଣି ଟୋପାଏ ବାହାରୁ ନାହିଁ। ଏପରିକି କେତେକ ପଞ୍ଚାୟତରେ ନିର୍ମାଣ ହୋଇଥିବା ଟାଙ୍କି ଧୀରେ ଧୀରେ ଅଚଳ ହୋଇଗଲାଣି। କେତେକ ଟାଙ୍କିକୁ ଡ୍ୟାମେଜ ଘୋଷଣା କରାଯାଇ ସେହି ଟାଙ୍କି ନିକଟରେ ନୂତନ ଟାଙ୍କି ମଧ୍ୟ ନିର୍ମାଣ କରାଯାଉଛି। ନିର୍ମାଣ କାର୍ଯ୍ୟ ଚାଲୁଥିବା ବେଳେ ବିଭାଗୀୟ ଅଧିକାରୀ ଅନୁପସ୍ଥିତ ରହୁଥିବାରୁ ନିମ୍ନମାନର କାମ ହେଉଥିବା ଅଭିଯୋଗ ହେଉଛି। ଅନ୍ୟପଟେ ଡ୍ୟାମେଜ ଘୋଷିତ ପାଣି ଟାଙ୍କିର ମରାମତି ଓ ରଙ୍ଗ ମାରି ଲକ୍ଷାଧିକ ଟଙ୍କା ହଡ଼ପ କରାଯାଉଛି।
ହେବ ନିର୍ମାଣ ହୋଇ ପଡ଼ିଥିବା ପାଣି ଟାଙ୍କି ବ୍ୟବହାର ହୋଇ ନ ଥିବାବେଳେ ସେଥିରୁ ବିଭିନ୍ନ ଗ୍ରାମକୁ ସଂଯୋଗୀକରଣ କରାଯାଇଥିବା ପାଣି ପାଇପ୍ ଓ ଟ୍ୟାପ୍ ଭାଙ୍ଗିରୁଜି ଯାଇଛି। ମରାମତି ଓ ରଙ୍ଗ କରାଯିବା ନେଇ ବ୍ୟୟ ଅଟକଳ ପାଇଁ କୌଣସି ସୂଚନା ଫଳକ ମଧ୍ୟ ରହୁନାହିଁ। ଫଳରେ ଏହି ଯୋଜନାରେ ଦୁର୍ନୀତି ନେଇ ସାଧାରଣରେ ଅଭିଯୋଗ ହେଉଛି। ବିଭାଗୀୟ ଅଧିକାରୀ ଏଥିପ୍ରତି ଦୃଷ୍ଟି ଦେଇ ନିମ୍ନମାନର କାର୍ଯ୍ୟ ନେଇ ତଦନ୍ତ କରିବା ସହ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହୋଇଛି। ଏ ସମ୍ପର୍କରେ ବିଭାଗୀୟ କନିଷ୍ଠ ଯନ୍ତ୍ରୀ ଶିବ ବୁଦୁଲା କହିଛନ୍ତି, ପ୍ରକଳ୍ପ ନିର୍ମାଣ କାର୍ଯ୍ୟ କେବେ ସରିବ ସେ ଜାଣିନାହାନ୍ତି। ତେବେ ଦୁଇଟି ପଞ୍ଚାୟତରେ କଁା ଭଁା ସ୍ଥାନରେ ପାଣି ଯୋଗାଣ ହେଉଛି।